ތިމަރަފުށީ އެކުވެރިންގެ އާރޫޚް އާ ފަޅުމަސް ސްޕޯޓްސް ކްލަބު ގުޅިގެން ބޭއްވި މި ފަހަރުގެ އަޟްޙާ ޢީދު ކުލަގަދަކޮށް، ކާމިޔާބުކަމާއެކު ނިންމާލެވުނީ ވަރަށް ގިނަ ބައެއްގެ ފަރާތުން ލިބުނު އެހީތެރިކަމާއެކުގައިކަން އެ ޖަމްޢިއްޔާ އިން ވަނީ ފާހަގަކޮށްފައެވެ.
"އެމްޖީއެޗް ޢީދު ރޫޚު 1444" ގެ ނަމުގައި މި ބޭއްވުނު ޢީދު ކުޅިވަރުތައް ގެނެސްދިނުމުގައި ޓައިޓަލް ސްޕޮންސަރަކީ އެމްޖީއެޗް އިންވެސްޓްމަންޓް އެވެ. މި ފަހަރުގެ ޢީދު ކުޅިވަރުތައް ބޭއްވުމަށްޓަކައި ތިމަރަފުށީ ދާއިރާގެ ރައްޔިތުން މަޖިލީހުގެ އިއްޒަތްތެރި މެންބަރު އޮނަރަބަލް އަބްދުﷲ ރިޔާޒް އާއި ތިމަރަފުށީ ކައުންސިލުންވަނީ ވަރަށް ބޮޑު އެހީތެރިކަމެއް ފޯރުކޮށްދީފައެވެ. ކޯ ސްޕޮންސަރެއްގެ ގޮތުގައި ތިމަރަފުށީ ކައުންސިލް ހަމަޖައްސާފައިވާއިރު އިވެންޓް ކިޓް ޕާޓްނަރަކަށް އެއިރޯ ލޮޖިސްޓިކް، ޑިޒައިނިންގ ޕާޓްނަރަކީ އެކްސްބީއެޗް މޯލްޑިވްސް އެވެ. ޕްރިންޓިން ޕާޓްނަރަކީ އަލިމަސް ލިންކް އެވެ.
އިތުރު ޕާޓްނަރުންގެ ތެރޭގައި؛ ޑެއިޒީ ފްލާވަރ، ތްރީ އެންޑް ސިކްސް ބްރަދާސް، ބޯލްސްޓާރ ޓީ، ޒާވީ ޕްލަސް، ކޮފީޑޫ، ސެލް ޓެކް އިލެކްޓްރޯނިކްސް، މަރިޔާޒް ސްޓޯރ އަދި ފެމްސް ކެފޭ އަދި އަނާޔާ އިންވެސްޓްމަންޓް ހިމެނެއެވެ.
މީގެއިތުރުން، ތިމަރަފުށީ އެއަރޕޯޓް، ތިމަރަފުށީ ހެލްތު ސެންޓަރ، ތިމަރަފުށީ ޕޮލިސް ސްޓޭޝަން، ތ. އަތޮޅު ތައުލީމީ މަރުކަޒުގެ ފަރާތުން ވެސް ވަރަށް ބޮޑު އެހީތެރިކަމަކާއި އެއްބާރުލުން ލިބިފައިވާ ކަމަށް ތިމަރަފުށީ އެކުވެރިންގެ އާރޫޚުން ވަނީ ބުނެފައެވެ. އަދި އެ ރަށު"ފަޅުމަސް ސަރަހައްދު" އަންހެން ކަނބަލުންނާއި ފިރިހެން ބޭފުޅުންނާއި، "ފުނަގަސް ސަރަހައްދު" އަންހެން ކަނބަލުންނަށް ވެސް ވަރަށް ހާއްސަ ޝުކުރެއް އެ ޖަމްޢިއްޔާ އިން ވަނީ އަދާކޮށްފައެވެ.
އަޟްޙާ ޢީދުގައި ބޭއްވުނު ކުޅިވަރުތައް:
-އެމްޖީއެޗް ޢީދު ރޫޚު 1444 ގިވްއަވޭ (ސްޕޮންސާކުރީ ސެލް ޓެކް އިލެކްޓްރޯނިކްސްގެ ފަރާތުން)
-ޢީދު ބަޑި ރޯކުރުން
-ބިރުވެރި ހޮހޮޅަ
-ކުޑަކުދިންގެ ހަވީރު
-ބޯނަސް މުބާރާތް (ކާށި އެހެފަ، ހުނި ގާނާފަ، ފުށް މޮޑެފަ، އުނދުން ރޯކޮށްފަ، ރޮށި ފިހުމަށްފަހު، ކެއުމުގެ މުބާރާތެއް)
-ވާދެމުމުގެ މުބާރާތް
-ގިރިސް ދަނޑިއަށް އެރުން
-ބޮޑުމަސް ދުއްވުން
ފިރިހެނުންގެ ވާދެމުމުގެ މުބާރާތުގެ ޗެމްޕިއަންކަން ހޯދި "ޓީމް ކަނބުލޮ" އަށް އާ ރޫޚު އަދި ފަޅުމަސް ސްޕޯޓްސް ކްލަބުގެ ފަރާތުން ވަނީ 7،000ރ. ހަތް ހާސް ރުފިޔާގެ ފައިސާ އިނާމެއް ދީފައެވެ. ބޯލްސްޓަރ ޓީ އިން 500ރ. ފައް ސަތޭކަ ރުފިޔާގެ ފައިސާގެ އިނާމެއް، ފެއިމްސް ކެފޭ އިން 200ރ. ދުއިސައްތަ ރުފިޔާގެ ވައުޗަރއެއް ދީފައިވާއިރު، ޒާވީ ޕްލަސް އިން ވަނީ މިލްކުވާ ޓްރޮފީއެއް ދީފައެވެ.
ވާދެމުމުގެ މުބާރާތުގެ ރަނަރަޕް މަގާމަށް ހޮވުނު "ޓީމް މަދޫ" އަށް އާ ރޫޚު އަދި ފަޅުމަސް ސްޕޯޓްސް ކްލަބުގެ ފަރާތުން ވަނީ 3،000ރ. ތިން ހާސް ރުފިޔާގެ ފައިސާގެ އިނާމެއް ދީފައެވެ. އަދި ބޯލްސްޓަރ ޓީ އިން ވަނީ 500ރ. ފައް ސަތޭކަ ރުފިޔާގެ ފައިސާގެ އިނާމެއް ދީފައެވެ.
އަންހެނުންނަށް ހާއްސަކޮށް ބޭއްވި ވާދެމުމުގެ މުބާރާތުގެ ޗެމްޕިއަންކަން ހޯދި "ޓީމް ދަމާ ކަނޑާ" އަށް އާ ރޫޚު އަދި ފަޅުމަސް ސްޕޯޓްސް ކްލަބުގެ ފަރާތުން ވަނީ 7،000ރ (ހަތް ހާސް) ރުފިޔާގެ ފައިސާ އިނާމެއް ދީފައެވެ. ބޯލްސްޓަރ ޓީ އިން 500ރ. ފައް ސަތޭކަ ރުފިޔާގެ ފައިސާގެ އިނާމެއް، ފަމްސް ކެފޭ އިން 200ރ. ދުއިސައްތަ ރުފިޔާގެ ވައުޗަރއެއް ދީފައިވާއިރު، ޒާވީ ޕްލަސް އިން ވަނީ މިލްކުވާ ޓްރޮފީއެއް ދީފައެވެ.
މި އިވެންޓްގެ ރަނަރަޕަށް ހޮވުނު "ޓައިމްސް އަންހެން" ޓީމަށް އާ ރޫޚު އަދި ފަޅުމަސް ސްޕޯޓްސް ކްލަބުގެ ފަރާތުން ވަނީ 3،000ރ. ތިން ހާސް ރުފިޔާގެ ފައިސާގެ އިނާމެއް ދީފައެވެ. އަދި ބޯލްސްޓަރ ޓީ އިން ވަނީ 500ރ. ފައް ސަތޭކަ ރުފިޔާގެ ފައިސާގެ އިނާމެއް ދީފައެވެ.
ބޯނަސް މުބާރާތް އެންމެ އަވަހަށް ނިންމާ ތިން ޓީމެއް ހޮވާފައިވާއިރު، 1 ވަނަ އަށް ދިޔަ "ޓިމް ވަތުކިބަ" އަށް 2،000ރ. ދެ ހާސް ރުފިޔާ، 2 ވަނަ އަށް ހޮވުނު "އާރްކޭއެމް ފައިވް ސްޓާސް" އަށް 1،500ރ. ފަނަރަ ސަތޭކަ ރުފިޔާ އަދި 3 ވަނަ މަގާމް ހާސިލްކުރި "ޓީމް ތްރީ އެންޑް ސިކްސް" އަށް 1،000ރ. އެއް ހާސް ރުފިޔާ ދީފައިވެއެވެ. މި މުބާރާތް ސްޕޮންސާކުރީ ޑެއިޒީ ފްލާވަރ ފިހާރައިންނެވެ.
ބިރުވެރި ހޮހޮޅަ - ޓިކެޓްގެ އަގަކީ 20ރ. ވިހި ރުުފިޔާ
ކޮންމެ ރެއެއްގައި ބިރުވެރި ހޮހޮޅަ އަށް ޓިކެޓްނެގި ފަރާތްތަކުގެ މެދުގައި ނެގި ގުރުއަތުލުމުން ނަސީބުވެރި ފަރާތެއް ހޮވިއިރު، އެ ފަރާތަށް ވަނީ ތްރީ އެންޑް ސިކްސް ފިހާރައިން 500ރ (ފަސް ސަތޭކަ) ރުފިޔާގެ ވައުޗަރ އެއް ދީފައެވެ.
ޢީދުގެ ފުރަތަމަ ރޭގެ ނަސީބުވެރިޔާ: އައިޝަތު ސަދާ / ވާރޭވިލާ
ޢީދުގެ ދެވަނަ ރޭގެ ނަސީބުވެރިޔާ: އަހުމަދު ޔާމީން / ބޮޑުގެ
ޢީދުގެ ތިންވަނަ ރޭގެ ނަސީބުވެރިޔާ: ސޮފޫރާ / ފެހިވިދުވަރުގެ
ބިރުވެރި ހޮހޮޅައިން ލިބުނު ހުރިހާ ފައިސާއެއް ހަދިޔާކުރުމަށް ހަމަޖެހިފައިވަނީ ހާއްސަ އެހީތެރިކަމަށް ބޭނުންޖެހިފައިވާ ފަރާތްތަކަށް ކަމަށް އެކުވެރިންގެ އާ ރޫޚުން ވަނީ ބުނެފައެވެ.
ތިމަރަފުށީ އެކުވެރިންގެ އާރޫޚަކީ 2004 ވަނަ އަހަރުން ފެށިގެން ރަށުގެ އިޖްތިމާޢީ ގޮތުންނާއި ރަށުގެ މަންފާ އަށް އެތައް ގުނަ ޙިދުމަތެއް މެދުކެނޑުމެއްނެތި ކުރަމުން އަންނަ ޖަމްޢިއްޔާ އެކެވެ.
ފަޅުމަސް ސްޕޯޓްސް ކްލަބަކީ މި އަހަރުގެ މެއި މަހުގެ ތެރޭގައި ރަށުގައި ކުޅިވަރުތައް ދިރުވާ އާލާކުރުމަށް ރަޖިސްޓްރީކުރެވި، އުފެއްދުނު ކްލަބެކެވެ. އެ ކްލަބުން ވަނީ ވަރަށް އަވަހަށް ފުޓްބޯޅަ އާއި ހޭންޑްބޯލް އެކަޑެމީއެއް ފަށާނެ ކަމަށް އިޢްލާންކޮށްފައެވެ.