މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ކެންސަރު ސްކްރީނިން އެޕްލިކޭޝަނަކާއި ޑޭޓާބޭސް އެކުލަވާލުމުގައި އެހީތެރިވުމުގެ ގޮތުން ކެންސަރ ސޮސައިޓީ އޮފް މޯލްޑިވްސް (ސީއެސްއެމް) އަށް އެއް ލައްކަ ރުފިޔާ ހަދިޔާކޮށްފިއެވެ.
އެމްއޭސީއެލް ކޯޕަރޭޓް އޮފީހުގައި ބޭއްވި ހާއްސަ ރަސްމިއްޔާތެއްގައި އެ ކުންފުނީގެ މެނޭޖިން ޑިރެކްޓަރު އަދި ސީއީއޯ އަލްފާޟިލް މަހުޖޫބު ޝުޖާއު ވަނީ ކެންސަރ ސޮސައިޓީ އޮފް މޯލްޑިވްސްގެ ޚަޒާންދާރު އަލްފާޟިލާ ނީނާ މަންސޫރަށް ޗެކް ހަވާލުކޮށްދެއްވާފައެވެ.
އެމްއޭސީއެލްގެ ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރު) ގެ ދަށުން، މި ދެއްވި އެހީގެ މައިގަނޑު މަގްޞަދަކީ ސީއެސްއެމް އަށް ކެންސަރު ސްކްރީނިން ޕްރޮގްރާމްތަކަށް އެހީތެރިވުމެވެ. މިއީ މުޖުތަމައަށް އެހީތެރިވުމަށް އެމްއޭސީއެލް އިން ކުރާ މަސައްކަތުގެ މިސާލެއް ކަމަށާއި، ރާއްޖޭގެ ސިއްހީ ދާއިރާ ކުރިއެރުވުމަށް އެކުންފުނިން ކުރާ ވަރުގަދަ އަޒުމުގެ މައްޗަށް އަލިއަޅުވާލާ ކަމެކެވެ.
މިހާރު ކެންސަރުގެ ހުރިހާ ސްކްރީނިންތަކެއް ވެސް ކުރިއަށް ގެންދަނީ ފިޒިކަލް ފޯމްތައް ބޭނުންކޮށްގެން ކަމަށާއި، ޑޭޓާ މެނޭޖް ކުރަނީ އަމިއްލައަށް ކަމަށްވާއިރު، އާ އެޕްލިކޭޝަން ތަރައްގީ ކުރުމުން އެ މަސައްކަތްތަކަށް އިންގިލާބެއް އައިސް، ބަލިމީހުންގެ ފޮލޯއަޕްތަކާއި، އަފްޑޭޓްތަކުގެ އިތުރުން ޒަމާނީ ގޮތަށް ރެކޯޑްތައް ފަސޭހަކަމާއި ރައްކާތެރިކަމާއެކު ބެލެހެއްޓޭނެ އެވެ. އަދި މި އެޕްލިކޭޝަންގެ ސަބަބުން ކެންސަރާ ގުޅޭ ދިރާސާތަކާއި އެއަށްފަހު އެއްކުރެވޭ މަޢުލޫމާތުތައް ބެލެހެއްޓުމުގައި ވެސް މިހާރަށްވުރެ ބޮޑުތަނުން ފަސޭހަވެގެންދާނެ އެވެ.
ސީއެސްއެމް އިން މިހާރު ވަނީ އުރަމަތީގެ ކެންސަރާއި، އަނގައިގެ ކެންސަރު، އަދި ސާވިކަލް ކެންސަރު ހިމެނޭ ގޮތަށް އެކި ވައްތަރުގެ ކެންސަރަށް 20،900 އަށް ވުރެ ގިނަ މީހުން ސްކްރީންކޮށްފަ އެވެ. މީގެއިތުރުން، މި އަހަރު ކެންސަރު ސޮސައިޓީން ދަނީ ޕްރޮސްޓޭޓް އަދި ކޮލޮރެކްޓަލް ކެންސަރު ސްކްރީނިން ތައާރަފްކޮށް އަދި މި ހިދުމަތް އާބާދީގެ ބޮޑުބަޔަކަށް ފޯރުކޮށްދިނުމުގެ މަސައްކަތްކުރަމުންނެވެ.
އެމްއޭސީއެލް އިން ސީއެސްއެމް އަށް މި ދެއްވި އެހީތެރިކަމާއެކު ކެންސަރާ މެދު މީހުން ހޭލުންތެރިކުރުމާއި، ސްކްރީނިން ފޯރުކޮށްދިނުމާއި، ކެންސަރާ ގުޅުންހުރި މަޢުލޫމާތު އެއްކޮށް، ބެލެހެއްޓުމުގައި ލުއި ފަސޭހަތައް ލިބިގެންދާނެ އެވެ. އަދި އެ ކުންފުނީގެ އަމާޒަކީ ހުރިހާ ފަރާތެއްގެ ފުރިހަމަ ބައިވެރިވުމާއެކު ރަނގަޅު ބަދަލެއް ގެނެސްދީ، ރާއްޖޭގެ ސިއްހީ ދާއިރާއަށް ކުރިއެރުންތައް ހޯދައިދިނުން ކަމަށެވެ.