މިއީ އުމުރުން 16 އަހަރުގެ ކުއްޖަކު، "މަރު އެތިފަހަރަކުން" ސަލާމަތްވި ގޮތުގެ ވާހަކައެވެ. މި ވާހަކައަށް ގިނަ ބައެއްގެ ޝައުގުވެރިކަން ވަނީ އަމާޒުވެފައެވެ. ހާއްސަކޮށް ސިއްހީދައިރާގެ މީހުންނާއި މަސްވެރިންނެވެ.

އިންޑޮނޭޝިއާގެ ހުޅަނގު ދެކުނު ސުލަވެސީ ޕްރޮވިންސްގައި މަހަށް ގޮސް އުޅުނު މުހައްމަދު އިދުލް ނަމަކަށް ކިޔާ މި ކުއްޖާ މަހަށް ގޮސް އުޅުނީ އޭނާގެ އާއިލާގެ ބަޔަކާއި އެކުގައެވެ. މަހަށް ގޮސް، މަސްވެރިކަމުގެ މަސައްކަތުގައި އެކުއްޖާވެސް ބައިވެރިވަމުން ގެންދިޔައެވެ. އެގިތުގައި މަސްވެރިކަން ކުރަން އުޅެނިކޮށް، އެ ދޯނީގައި މަސް ބާނަށް އުޅުނު އެހެން މީހެއްގެ ނަނުގައި މަހެއް ގަތެވެ. އެ މަސް ވަކި ހިސާބަކުން ފެނުމައްޗަށް އެރިއެވެ. އެއީ ތޮޅިއެކެވެ. ފެނުމަށްޗަށް މި ތޮޅި އެރުމަށްފަހު، ފުމެމުން ފުމެމުން އެސޮރު އުޅެން ފެށިއެވެ.

މިގޮތަށް ފުމެމުން ފުމެމުން އަންނަނިކޮށް އެސޮރު ދޯންނާ ކައިރިވީތަނާ ފުންމާލިގޮތަށް ދޯންޏާއި ދިމާލަށް އައެވެ. އޭރު ދޯނީގައި އިން މުހައްމަދު އިދުލް ގެ ކަރަށް އެ ތޮޅީގެ ތުންގަނޑު އަމާޒުވިއެވެ. ތޮޅި ފުމެމުން އައި ބާރުމިނުގެ ސަބަބުން އެ ތޮޅީގެ ތުންގަނޑު އޭނާގެ ކަރަށް ހެރި އަނެއްކޮޅުން ވަނީ ފޫވެސް އަޅާފައެވެ. ކަރުގެ ވާތްފަރާތުން ވަދެ، ކަރުގެ ކަނާތްފަރާތުން އެ ތުންގަނޑު އޮތީ ނުކުމެފައެވެ.

މިހާލަތުގައި އެ ދޯނި އަވަހަށް ލަފާ، އޭނާ ހޮސްޕިޓަލަކަށް ގެންދެވުނެވެ. ހޮސްޕިޓަލުގައި އޭނާ އަށް އަވަސް ފަރުވާ ދޭން ފެށުނެވެ. ލޭގެ ތެރޭގައި އޮކްސިޖަން ހުރި މިންވަރު، ދަށެއް ނޫނެވެ. ލޭގެ ޕުރެސަރު މަތިވެފައި ހުރިނަމަވެސް ކަންބޮޑުވާ ވަރެއްް ނޫނެވެ. ކަންއޮތީ މިހެން ކަމުން ފަރުވާދިން ޑަކްޓަރުންވެސް ހައިރާން ވިއެވެ. ލޭވެސް މާ ގިނައިން އައިސްފައި ނެތުމާއި އެކުގައެވެ. އެކްސްރޭ އެއް ނެގިއެވެ. އެކްސްރޭ އިން ފެންނަ ގޮތުގައި އެ ކުއްޖާ ނޭވައި ހޮޅިއަށް އެއްވެސް ގެއްލުމެއް ލިބިފައެއް ނެތެވެ. ޑަކްޓަރުން އެ ކުއްޖާގެ އޮޕަރޭޝަން ފަށާ މާ ގިނަ ވަގުތެއް ނުވެ، ނިންމާލިއެވެ. އެ އޮޕަރޭޝަން ކާމިޔާބެވެ. އެ ކުއްޖާގެ ކަރުގެ އެއްވެސް މައި ލޭހޮޅިއަކަށްވެސް އެއްވެސް ގެއްލުމެއް ލިބިފައެއް ނުވެއެވެ. ތޮޅީގެ ތުންގަނޑު ހެރިފައި ހުރީ ނޭވައި ހޮޅީގެ ފަހަތުން މައިބަދައިގެވެސް ފަހަތުން ކަރުގެ މަސްގަނޑަށެވެ. 

ޑަކްޓަރުން ބުނާ ގޮތުގައި މިއީ މަރު އެތިފަހަރެކެވެ. ނަމަވެސް މާތް ﷲ ކަމަކަށް އިރާދަކުރައްވައިފިނަމަ އެކަމެއް ވެދާނެއެވެ. އެ މަރުތެރިފަހަރުން އުމުރުން 16 އަހަރުގެ އެ ކުއްޖާ ސަލާމަތްވީ އަޖައިބެއްކަހަލަ ގޮތަކަށެވެ. 

 

ހަވާލާ: ދަ މެޑިކަލް ނޮލެޖް - 2023