ސިޙުރުހާހޫރަ ހަދާ މީހުންނާއި އެބައިމީހުންގެ ކައިރިޔަށް ސިޙުރު ހަދުވަން ދާ މީހުންގެ ނުބައިކަމާއެވެ! ނިކަން ވިސްނަވާށެވެ. ތޫނު ހަތިޔާރެއް ހިފައިގެން ގޮސް މީހަކަށް ހަމަލަދީ އޭނާ ޒަޚަމްކޮށްލުމަކީ ކިހައި ނުބައި ނުލަފާ ކަމެއްތޯއެވެ؟ އެ ކަމަށް ވުރެ މީހަކަށް ސިޙުރު ހެދުން މާ ނުބައިވެގެން ވެއެވެ. ސިޙުރުގެ ސަބަބުން އެ ސިޙުރު ޖެހުނު މީހާ އުފުލަން ޖެހޭ ވޭނާއި ކެކުޅުމަކީ އޭނާ ނޫން އެހެން އެއްވެސް މީހަކަށް އިޙްސާސްވާނޭ ކަމެއް ނޫނެވެ. އެ ވޭނަކީ ޤަތުލުވުމަށް ވުރެ އޭނާ އަށް ވޭން ހުރި ކަމަކަށް ވެގެން އެބަ ދެއެވެ. އެ މީހެއްގެ މުޅި ދިރިއުޅުން ބަރުބާދުވެގެން އެބަ ދެއެވެ. މުޅި ޙަޔާތް އެ ފުށްމިފުށަށްޖެހިގެން އެބަ ދެއެވެ.

ސިޙުރު ޖެހިގެން އުމުރު ދުވަހަށް އެ ކަމުގެ ވޭނުގައި އެތައް ބަޔަކަށް އުޅެންޖެހިފައި ވެއެވެ. އަދި އެތަށް އަހަރެއް ވާންދެން އެ ވޭނުގައި އުޅުމަށްފަހު، އޭނާ މަރުވެގެން ދަނީ ވެސް އެ ސިޙުރުގެ ސަބަބުންނެވެ.  މި ކަންކުރާ މީހުން މާތް ﷲގެ ޙަޟްރަތުގައި ނަޖާވާނީ ކިހިނަކުންތޯއެވެ؟ ސިޙުރު ހަދާ މީހުން ބަރުބާދު ކޮށްފައިވަނީ ކުށެއް ނެތް ކިތައް މީހުންގެ ދިރިއުޅުންތޯއެވެ؟ ސިޙުރު ހަދާ މީހުން ދުއްވައިލައިފައި ވަނީ ކިތައް މީހުންގެ ފުރާނަތޯއެވެ؟

ހެޔޮ ނުވާނެ އެވެ! ސިޙުރާ ގާތް ނުވާށެވެ. ސިޙުރުވެރީން ކައިރިޔަށް ނުދާށެވެ. ސިޙުރުވެރީންނަކީ މާތް ﷲ އަށް ކާފިރުވެފައިވާ ބައެކެވެ. އެބައިމީހުން ޖިންނި ޝައިތާނުންގެ ކިބައިން ކަންކަން ފުއްދައިގަންނަނީ، ބަދަލެއްގެ ގޮތުން މާތް ﷲ އަށް ކާފިރުވެ، މާތް ﷲގެ ދީނަށް ބޭއަދަބީކޮށް ހިތައި، ދީނީ ޝިއާރުތަކަށް ގޮންޖަހައި، ދީނީ މުޤައްދަސް އެއްޗެހި ނަޖިސްކޮށްގެންނެވެ.

މިފަދަ ބައެއްގެ ކައިރިޔަށް ގޮސް މިއީ ކުޑަކަމެކޭ ހިތައި ސިޙުރުގެ އެއްވެސް ކަމަކާ ކައިރިނުވާށެވެ. ލޯބިވެރިޔާ ހޯދަން، ނުވަތަ ދެމަފިރިޔަކު ވަރިކުރުވަން، ނުވަތަ ރުޅިއަރާ މީހަކު ނެތިކޮށްލަން، ނުވަތަ މަސްވެރިކަން ރަނގަޅުކުރާން، ނުވަތަ ފާލުބަލަން، ނުވަތަ ގެއްލުނު އެއްޗެހި ހޯދަން މިހިރަމިހިރަ ކަންކަން ކުރާން ސިޙުރުވެރީން ކައިރިޔަށް ނުދާށެވެ. މި ކަންކަން ކުރުމުގެ ސަބަބުން ދީނުން ވެސް ބޭރުވެދާނެ އެވެ. މިއީ ކުދިކުދި ކަންކަމެއް ނޫނެވެ. މިއީ ބޮޑެތި ކަންކަމެވެ. 

ސިޙުރު ހިމެނެނީ އެންމެ ބޮޑު ހަތް ފާފައިގެ ތެރޭގައެވެ. ޞަޙީޙް ބުޚާރީގައި ވާ ޙާދީޘްފުޅެއްގެ މާނައިގައި ވެއެވެ. "ތިޔަބައިމީހުން، ހަލާކުކުރަނިވި ހަތް ފާފައިން ދުރުވާށެވެ! ޞަޙާބީން ސުވާލުކުރެއްވިއެވެ. އެ ފާފަތަކަކީ ކޮބައިތޯއެވެ؟ އެކަލޭގެފާނު ޙަދީޘްކުރެއްވިއެވެ. އެއީ މާތް ﷲއާ ޝަރީކުކުރުމާއި، ސިޙުރު ހެދުމާއި، މާތް ﷲ ޙުރުމަތްތެރިކުރައްވައިފައިވާ ނަފުސެއް އެއްވެސް ޙައްޤަކާއި ނުލައި މެރުމާއި، ރިބާ ކެއުމާއި، ޔަތީމުންގެ މުދާ ކެއުމާއި، ހަނގުރާމައިގައި ދެ ލަޝްކަރު ބައްދަލުވާ ހިނދު ފިލަން ދުވުމާއި، އިއްފަތްތެރި އަންހެނުންގެ ބޮލުގައި ޒިނޭގެ ތުހުމަތު އެޅުވުމެވެ." ސިޙުރުވެރިޔާގެ ޙައްދެއްގެ ގޮތުގައި ޢުމަރުގެފާނުގެ ޚިލާފަތުގައި އެކަލޭގެފާނު ކަނޑައަޅުއްވައިފައި ވަނީ، ކަނޑިން ޖަހައި އެ މީހެއްގެ ބޯ ކަނދުރާއިން ވަކިކޮށްލުމެވެ.

ދުޢާއަކީ، ސިޙުރާއި ސިޙުރުވެރީންނާއި އެބައިމީހުންގެ ކައިރިޔަށް އެ ކަން ކުރުވަންދާ މީހުންގެ ނުބައިކަމުން އަޅަމެން ސަލާމަތްކުރައްވައި ރައްކައުތެރިކުރެއްވުމެވެ. އާމީން!

 

(ސިޙުރު ހަދާ މީހުންނާއި ސިޙުރު ހަދުވާ މީހުންގެ ނުބައިކަމާއެވެ! - އައްޝެއިޚް ޝަފީޢު ޢަބްދުﷲ؛ ދީނުގެ މަގު، އަހަރު 3، އަދަދު 29، ޞ.4 -14 ޖުލައި 2023)