ޖާހިލިއްޔަ އަޅުވެތިކަމަކީ މިއަދުގެ ޒުވާން ޖީލަށް އިޙުސާސްކުރެވޭނޭ ކަމެއް ނޫނެވެ. ބުނެދީ ކިޔައިދިނަސް ވާނީ ހީއެކެވެ. އޭގެ ފުރިހަމަ ތަސައްވުރެއް އަންދާޒާ ވެސް ނުކުރެވޭނެ އެވެ.

އަމިއްލަ ދަރި، ދިރި ހުއްޓާ ވަޅުލަނީއެވެ. އަންހެނުން އެއީ ބާޒާރުގައި ވިއްކައިލެވޭ މުދަލެއްގެ ގޮތުގައި އިހާނެތި ކުރަނީ އެވެ. އަޅުމީހާ ދެކެ ރުޅި އަންނަ ސާހިބާގެ ހިތަށް އެރި ކޮންމެ ކަމެއް އަޅުކަލޭގެ މައްޗަށް ތަންފީޒުކުރަނީ އެވެ. މަނާ ކުރާނެ ހަމަ އެކަކު ވެސް ނުހުރެއެވެ. އޭނާގެ މިލްކިއްޔާތުގައި އޮތް ވިޔަފާރު މުދަލެއް ކަމުގައި ނޫނީ އެ އަޅުކަލޭގެ ނުވެއެވެ. ރައްބެއް، ރަސޫލެއް ޤަބޫލު ކުރުމެއް ނެތެވެ. ބާރު ދެމިއޮތީ ކަނޑީގެ މިޔައިގައެވެ.

މި ނިކަމެތި ޙާލުން އިންސާނީ ނައު ސަލާމަތްކުރައްވައި މިނިވަންކަމުގެ ޝިއާރައިގެން އިލާހީ ދަރުބާރުން ފޮނުއްވެވީ ޢާލަމްތަކަށް ރަޙުމަތެއް ކަމުގައި ލެއްވެވި މާތް ސާޙިބާ މުޙައްމަދު ނަބީކަލޭގެފާނެވެ. މާތް ﷲ އިތުރު އެކަލޭގެފާނަށް ޞަލާވާތާއި ސަލާމާއި ބަރަކާތް ލައްވާށިއެވެ. މި މަތިވެރި ނަބިއްޔާ ގޮވައިލެއްވީ އަޅުންގެ އަޅުވެތިކަމުން އިލާހީ އަޅުވެތިކަމަށް އައުމަށެވެ. އެއީ އިންސާނީ ފިތުރަތުގެ ޠަބީޢަތް އެ ކަމަށް ހެކިވާ ދަޢުވަތެވެ. ޙަޤީޤީ މިނިވަންކަމެވެ.

އިލާހީ އަޅުވެތިކަމަކީ ފިޠުރީ މިނިވަންކަމެވެ. މަޚްލޫޤުތައް ޚާލިޤަށްވާ ކިޔަމަނެވެ. ކޮންމެ މަޚުލޫޤެއްގެ ހަދަފަކީ ﷲގެ ރުުހުން ހޯދުމެވެ. އާޚިރަތުގެ އުފާ ލިބިގަތުމެވެ. 

އަޅުގަނޑުމެންގެ ދިވެހިންނަކީ ވެސް އިސްތިޢުމާީ އަޅުވެތިކަމެއްގެ ތެރެއިން ސަލާމަތްވެ އިސްތިޤްލާލީ މިނިވަންކަމެއް އިޙްތިފާލުކުރާ ބަޔަކީމުއެވެ. މި ހިނގާ ޖުލައި މަހުގެ 26 ވަނަ ދުވަހަކީ އިނގިރޭސީންގެ އަތްދަށުން ދިވެހިރާއްޖެ މިނިވަންކުރުމުގެ އުފާ ފާހަގަ ކުރާ ދުވަހެވެ. ދިވެހިންނަށް އެ ކަމުން ލިބޭ އެންމެ ބޮޑު އުފަލަކީ ހަރުބީ ކާފިރު ދައުލަތެއްގެ މަކަރުވެރި ވަކިތަކުން ދިވެހި ފަސްގަނޑާއި މި ޤައުމުގެ މުވާޠިނުން ސަލާމަތްވި ސަލާމަތްވުމެވެ. 

އެ ދުވަހު ހިތްވަރާ އެކު ޤުރުބާނީ ދެއްވި ބޭބޭފުޅުން މިއަދު ތިއްބެވި ނަމަ، ވިދާޅުވާނީ ކީކޭބާއެވެ؟ އަޅުގަނޑުމެންނަށް މި ތިބެވެނީ އޭރު ހޯދި ޙަޤީޤީ މިނިވަންކަމުގައި ބާއެވެ؟ ޖިސްމާނީ އަޅުވެތިކަމެއް ފެންނާން ނެތަސް، އަޅުގަނޑުމެންގެ ސިކުނޑިތަކުގައި ވަނީ ފިކުރީ ހަނގުރާމައިގެ ކިއްލާތައް ބިނާކުރުވައިފައެވެ. ޝައްކާއި ވަހުމާއި ވަސްވާހުގެ އަނދިރި މަގުމަގު ވަނީ މަމެންގެ އެންމެ ހިމަނާރާ ހަމައަށް ފޯރައިފައެވެ. ދިވެހިންގެ ތެރޭ އޮތް އަޚުވަންތަކަން ފިލައި ގޮއްސިއެވެ. ބޮޑެތި މީހުންނަށް އިޙުތިރާމުކޮށް، ކުޑަކުދިންނަށް އަޅައިލާ ބަޔަކު ނުފެނެއެވެ. އިސްލާމްދީނާ މެދު އޮތް ޣީރަތްތެރިކަން ފަނޑުވެއްޖެއެވެ. އަޅުކަމުގެ ފޯރި ކެނޑެމުން ގޮސް، ތަޤުވާގެ ބައްތި ނިވެން ގާތްވެއްޖެއެވެ. ނަމާދު އެޅުން ވެސް އެއީ މިނިވަންކަމަށް ވެއްޖެއެވެ. އިލާހީ އަޅުވެތިކަމުގެ ބޭރުން ލިބޭ މިނިވަން ކަމުގައި އޮތީ ކޮން ހިތްހަމަޖެހުމެއްތޯއެވެ؟

 

(އިލާހީ އަޅުވެތިކަމަކީ ފިޠުރީ މިނިވަންކަމެވެ. - އައްޝެއިޚް މުޙައްމަދު އަފްޟަލް؛ ދީނުގެ މަގު، އަހަރު 3، އަދަދު 30، ޞ.1 - 21 ޖުލައި 2023)