ވައި ރޯޅި ފަހި ޖެހިލާ ހިނދުން، ދެރިޔާ ނަގާ ދުއްވާ މަ ލީން

   ހައިބަތު ނިކަން ހުރި އޮޑިއަކުން، ދަންމާނު އެވަލަށް ވާން ލަމުން

 

މަންޒިލް އަމާން ފެނިދާނެޔޭ، މާލަސްތަކެއް ނުވެ އުދަރެހުން

   މަންޒަރުވެދާން އޮންނާނެޔޭ، ހިކިފަސް ބިމެއް އަދި މާ ދުރުން

 

އުންމީދަކީ ޒާތެއްގެ ވާ، އެއްޗެއް އިނގޭ ދަރިޔާ މަގޭ

    އުންމީދު ހުރި ގޮތް އެނގިދެޔޭ، ފުންކޮށް ނިކަން ވިސްނާލުމުން

 

ފަހި ވައިތެރޭ ދުއްވާދިޔަސް، އުންމީދު ލިބިދީފާ އަދި އޮތަސް

   މަހިތަށް އަރާ ހަމަ އެއްޗަކުން، އުންމީދު ދޭ ފުނޑުފުނޑުވަމުން

 

އުންމީދު މިގޮތަށް ފަނޑުވެފާ، ހުއްޓާ ނުވާނޭ އެއްކަމެސް

    ހުންގާނު ހިފިޔަސް ކެޔޮޅުބޭ، މިސްރާބު ހެޔޮ ނުވެޔޭ ނިކަން

 

އުންމީދުގައި ކޮޅުފައިން ޖަހާ، އެއްޗެއް އެއީ ޝައްކާ ވަހުމް

   ތުންތުން މަތިން ފުރުޅޭ ދޮގާ، އެއްކޮށް ގިރާ ވާހަކަ ތަކުން

 

ކަންތައްތަކެއް އުންމީދު ފަނޑު، ކޮށްލާނެ އަދު ހުންނާނެކަން

   ކަންކަން ކުރާއިރު ދޭހުގާ، އަމުދުން ހަނދާންވެސް ވޭ ކުރަން

 

ކަންކަން ކުރާއިރު ދަރިފުޅާ، އުންމީދު ފަނޑުކޮށް އަދު ނުލާ

   ކަންވާނެ ގޮތް ފަހި ވައިގަ ދާ، އޮޑިއެއްގެ ކެޔޮޅަސް ނޭނގެޔޭ