ގޭތެރޭގައި ގަސް ހެއްދުމަކީ މިހާރު ވަރަަށް ޢާއްމު ކަމެކެވެ. ބައެއް މީހުން ގަސް ހައްދާ އުޅެނީ އެއިން ލިބޭ ގިނަ ފައިދާ ހުރުމުން ކަމަށްވާއިރު އަނެއްބައި މީހުން ގޭތެރެ ޒީނަތްތެރިކުރުމުގެ ގޮތުން ހުސްވަގުތުތަކުގައި ގަސް ހައްދައެވެ. 

ގޭތެރޭގައި ހައްދާ ގަސްގަހާގެހިން އަހަރެމެންނަށް ފައިދާގެ އިތުރުން ރަނގަޅު އިހުސާސްތަކެއް ކޮށްދެއެވެ. ދިރާސާތަކުން ދައްކާ ގޮތުގައި ގޭތެރޭގައި ހުންނަ ގަސްގަހާގެހިން އިންސާނާގެ މިޒާޖު ރަނގަޅުކޮށްދީ، އުފެއްދުންތެރިކަން އިތުރުކޮށްދީ، ސްޓްރެސް ކުޑަކޮށްދީ، އަދި މާހައުލުގެ ވައި ތަޣައްޔަރުވުން ކުޑަކޮށްދީ، ކަންނެތްކަމާއި ވަރުބަލިކަން ކުޑަކޮށްދެއެވެ.

ގަސްގަހާގެހި އަހަރެމެންނަށް މާޔޫސްކަން ފިލުވާ އުފާވެރިކަން ގެނެސްދެއެވެ. މި އިހުސާސްތައް ކޮަށްދެނީ ހަމައެކަނި ގޭތެރޭގެ ގަސްގަހާގެހި ހުރުމުން އެކަންޏެއް ނޫނެވެ. "ތީރުން" ހޯދި ހޯދުމުގައި ސައިންޓިފިކް ފީލްޑް ދިރާސާތަކުން ދައްކަނީ ގަސްގަހާގެހި ގިނަ މަސައްކަތު މާހައުލުތަކުގައި މަސައްކަތުގެ ނަތީޖާ އިތުރުވެ، މުވައްޒަފުންގެ ދުޅަހެޔޮކަން ރަނގަޅުވެ، މުވައްޒަފުންގެ ތެރޭގައި ބަލިތައް ޖެހުން މަދުވެ، ބަލިވާ މުވައްޒަފުންގެ އަދަދު މަދުކަމަށެވެ.

ނާސާގެ ކްލީން އެއާ ސްޓަޑީ އިން ދައްކާ ގޮތުގައި ގޭތެރޭގެ ގަސްގަހާގެއްސާއި އެ ގަސްގަހާގެއްސާއި ގުޅުން ހުރި މައިކްރޯއޮގަނިޒްމްތަކުން ގޭތެރޭގެ ވައިގެ ތެރޭގައި އުފެދޭ ޖަރާސީމީ ކޮމްޕައުންޑްތައް ނައްތާލެވޭނެ އެވެ. އަދި ގުދުރަތީ ގޮތުން ފިލްޓަރ ކުރެވިފައިވާ ވައި ބައިޕްރޮޑަކްޓެއްގެ ގޮތުގައި ދޫކޮށްލެވޭނެއެވެ. ގަސްގަހާގެހި މިކަން ކުރަނީ ފަތްތަކުގެ ތެރެއިން ތަޣައްޔަރުކުރުވާ މާއްދާތައް ގަހުގެ ތެރެއަށް ނަގާ، އެ ވިހަ މާއްދާތައް ގަސްތެރެއަށް ފޮނުވައިގެން، ގަހުގެ ކާނާގެ މަސްދަރަކަށް ބަދަލުކޮށްގެންނެވެ.

ަކަން މިހެން ހުރުމާއި އެކު ގޭތެރޭގައި ނުވަތަ މަސައްކަތު މާހައުލުގައި ޤުދުރަތީ ގަސް އިންދާ ހެއްދުމަކީ މުހިއްމު ކަމެކެވެ. މިކަމުން ލިބެނީ ހަމަ އެކަނި ނަފްސާނީ ފައިދާ އެކަންޏެއް ނޫނެވެ. ޖިސްމާނީ އެތައް ފައިދާއެއްވެސް މިކަމުން ލިބެއެވެ. "ތީރުން" ހޯދި ހޯދުމުގައި ދިވެހި ރާއްޖޭގެ ގިނަ އޮފީސްތަކުގެ މަސައްކަތު މާހައުލު ތަކުގައި ކޮންމެވެސް ކަހަލަ ޤުދުރަތީ ގަހެއް އިންދާ ހައްދާފައި ހުރެއެވެ.