ދިވެހި އަދަބީބަސްތަކުގެ ތެރެއިން ވަގުންގެ ފޮށި ބާރަށް ބަންނާނޭ ބުނާ ބަހަކީ މުސްކުޅި ބަހެކެވެ. މިއީ ހަގީގަތުގައިވެސް ވަރަށް ރަނގަޅު ވާހަކައެކެވެ.

މި ބަހުގެ ބަހަވީ މާނައަށް ބަލާލާއިރު، މި ބަހުގައި މި ބުނެވެނީ ވަގަކު އޭނާގެ އަމިއްލަ ފޮށި ބަންނަ ވާހައެކެވެ. އަދި އެ ފޮށި މާ ބާރަށް ބަންނަ ވާހަކައެވެ.

މި ބަހުގެ މުސްކުޅި މާނަ ނިސްބަތް ކުރަނީ ވަގުން، އެމީހުންގެ މުދަލަށް މާ ބޮޑަށް ރައްކާތެރިވާނޭ ބުނުމުގެ މާނައިގައެވެ. އެހެނީ އެމީހުންނަށް އަބަދުވެސް ހީވެފައި އޮންނާނީ އެމީހުން އެ އުޅޭހެން އެހެން މީހުންވެސް އުޅެފާނެ ކަމަށެވެ. އެހެންކަމުން ވަގުން އެހެން މީހުންގެ މުދާ ފޭރިގަންނަ ގޮތަށް އެހެން މީހަކު އެ ވަގުންގެ މުދާ ފޭރިގަނެފާނެ ކަމަށް ބިރު، އެ މުދާތަކަށް ރައްކާތެރިވުމުގެ ގޮތުން އެތައް އެތައް ގޮތަކުން އެ މުދާތައް ރައްކާތެރިކޮށްފައި ހުންނާނެއެވެ. އާއްމު މީހާ އޭނާގެ މުދަލަށް ފަރުވާތެރިނުވާ މިންވަރަށް ވަގުމީހާ އޭނާގެ މުދަލަށް ފަރުވާތެރިވާނެއެވެ.