ދިވެހި ރަދީފުގައި "ބަނގުރޫޓު" މި ލަފުޒުގެ މާނައަކީ ހުރި ހަރުމުދަލަށްވުރެ ދަރަނި ބޮޑުވެގެން ހުރިހާ މުދާ ވިއްކަން ޖެހޭ ޖެހުމެވެ. އާދޭހެވެ! މިއަދު "ބަނގުރޫޓު" މި ލަފުޒުގެ އަޑު ވަރަށް ގަދަޔަށް އެބަ އިވެއެވެ. ދަރަނީގެ ވާހަކަވެސް ވަރަށް ގަދަޔަށް އެބަ އިވެއެވެ. ބަޔަކު ދައްކާތީ ހަމަ އިވެނީއެވެ. ލޮލަށް ފެންނަނީކީއެއް ނޫނެވެ. އަތުން ހިފެނީކީއެއް ނޫނެވެ. ނަމަވެސް ހަމަ ބަޔަކު ކިޔާތީ އަޑު އިވެނީއެވެ.

ބަނގުރޫޓުވެފަވާ ރައުސްމާލަކުން، ނުވަތަ މިއިން ޒަމާނަކުންވެސް އަދާ ނުކުރެވޭވަރުގެ ބޮޑު ދަރަންޏެއް އޮތް ރައުސްމާލަކުން ދެންވެސް ބޮޑެތި ހޭދަތަކެއް ކުރާނީ ކިހިނެއްތޯއެވެ. ބަނގުރޫޓުވެފައިވާނަމަ ފުރަތަމަ އޮންނަންވާނީ އެކަމެއް ހައްލުކުރުމެވެ. ނަމަވެސް އެކަން ހައްލުކުރާން ބަޔަކު ގެނެސްދޭ މާ ހަރުދަނާ ވިސްނުމެއް، ތަސައްވަރެއް އަދި ފަލްސަފާއެއް ނެތެވެ. ސަބަބަކީ ކޮބައިތޯއެވެ؟

އުތުރަށް މޫނުލައިގެން ހުރެ ދައްކަނީ ބަނގުރޫޓު ވެފައިވާ ރައުސްމާލަކާއި މިއިން ދުވަހަކު އަދާނުކުރެވޭނެފަދަ ބޮޑު ދަރަންޏެއްގެ ވާހަކައެވެ. ހަމަ އެ ނޭވާގައި ދެކުނަށް އެނބުރިލާފާ މި ދައްކަނީ އެއްކަލަ ބަނގުރޫޓުވެފައިވާ ކަމަށް ބުނާ ރައުސްމާލު ތިމާގެ އަތަށް އަރައިފިނަމަ އެ ރައުސްމާލުން ކުރާނެ ބޮޑެތި ހަރަދު ތަކުގެ ވާހަކައެވެ. މިވާގޮތެއް ސާފެއް ނުވެއެވެ. މިއިން ދުވަހަކު އަދާނުވާނެ ކަމަށް ބުނި ދަރަނި ދެންވެސް ހަމަ އަދާނުކޮށް، ހަރަދުތަކެއް ކުރާން ވިސްނަނީ ބާވައެވެ؟ ނުވަތަ ބަނގުރޫޓުވެފައިވާ ރައުސްމާލު ހައްލު ނުކޮށް އިތުރަށް ބަނގުރޫޓު ކުރަން ވިސްނަނީ ބާވައެވެ؟

ޝަކުވާ އަކީ ނުވަތަ ކަންބޮޑުވުމަކީ ބަނގުރޫޓު ވުމާއި މިއިން ދުވަހަކު އަދާނުކުރެވޭފަދަ ބޮޑު ދަރަންޏެވެ. އެ ދަރަނީގެ ސަބަބުން އަޅުވެތިކަމުގެ ރަހަ ލާ ވާހަކައެވެ. ނަމަވެސް ދެންވެސް ފެންނަނީ ހަމަ އެ ދަރަނި ބޮޑުވާނޭފަދަ ކަންކަން ކުރާން ބުނާ ތަނެވެ. އެ ބަނގުރޫޓުވެފައިވާ ރައުސްމާލުން މާސިންގާ ބޮޑެތި މަޝްރޫއުތައް ހިންގާން ބުނާ ތަނެވެ. އަޖައިބު އަންތަރީސް ވެއްޖައީމެވެ. މިހިރަ ކިޔާ އެއްޗެއްގެ ކޮޅެއް މެދެއް އެނގޭ ހެއްޔެވެ؟

ފަހަރުގައި ބަނގުރޫޓުވެފައިވާ އެ ރައުސްމާލު އެބަޔަކާއި ހަމަ ހަވާލުވާގޮތަށް، އެކަންކަން ހައްލުވަނީ ކަމަށް ވެދާނެއެވެ. ދަރަނިތައް އަދާވެ ނުވަތަ މައާފްވެ ނިމެނީ ކަމަށް ވެދާނެއެވެ! އެނޫންނަމަ ބަނގުރޫޓުވެފައިވާ ރައުސްމާލަކުން މާސިންގާހާ ބޮޑެތި ހަރަދު ހިނގާ ކަންކަން ކުރާކަށް، ބުއްދި ސަލާމަތުން ހުރި މީހަކު ނުބުނާނެތާއެވެ. އަދި އެވެސް އެހެން ބަޔަކު ބަނގުރޫޓު ކުރުވި ރައުސްމާލަކާ ތިމާމެން ހަވާލުވާ ވާހަކަ ދައްކަމުންނެވެ. ފަހަރުގައި އެ ރައުސްމާލެއް ބަނގުރޫޓުވެފައި ނުވި ނަމަވެސް މަސްތީ ދަހިވެތިކަމެއްގައި ކޮންމެވެސް ފަރިއްސެއް ކިޔާން ވެގެން ބަނގުރޫޓާ ދަރަނީގެ ވާހަކަ ދައްކަނީ ކަމަށްވެސް ވެދާނެއެވެ.

ދުނިޔޭގައި ކަންހިނގާ އުސޫލަކީ މިއީއެވެ. ވެރިކަމަކީ މަސްތީ ދަހިވެތިކަމެކޭ ދިވެހި ޅެންވެރިއަކު ބުނެފައި ވެއެވެ. ވެރިކަން ބޭނުން ވެގެން ކޮންމެ މީހަކުވެސް ކޮންމެވެސް ވާހަކައެއް ދައްކާނެއެވެ. އަސާސެއް އަސްލެއް ނެތަސް ފަރުވާލެއް ނެތެވެ. ބަނގުރޫޓު ވުމާއި މިއިން ދުވަހަކު އަދާނުކުރެވޭނެ ދަރަނީގެ ވާހަކަވެސް މި ކިޔެނީ މިފަދަ އުސޫލަކުން ބާވައެވެ. ދައްކާ ވާހަކަ ދެކޮޅު ޖައްސަން ވާނެއެވެ. ދެކޮޅު ޖެހެންވާނެއެވެ. ނުޖެހޭނަމަ ކޮންމެވެސް ގޮތަކުން ދެކޮޅު ޖައްސަން ވާނެއެވެ. އުޅެ އުޅެވެސް ދެކޮޅު ނުޖެއްސޭނަމަ ބުއްދިވެރިއެއްނަމަ އިހްތިޔާރު ކުރާނީ ހަނުހުރުމެވެ.