ރާއްޖޭގައި ހިނގައިދިޔަ ކަމަކަށް ނުވިނަމަވެސް، މިއީ ދިވެހި މުޖުތަމައާ ވަރަށް ގުޅޭ ހާދިސާއެކެވެ. އަހަރެމެންގެ ދިރިއުޅުމުގެ ވައްޓަފާޅީގައި، ހާއްސަކޮށް ޒުވާނުންނާ ވަރަށްބޮޑަށް ގުޅިފައިވާ ކަމެކެވެ. މިއީ ސައުދީގައި ހިނގާދިޔަ ހާދިސާ އެކެވެ. މިވާހަކަ މީސްމީޑިޔާގެ ބައެއް މަންސަތަކުގައި ތިލަވެފައި އޮތެވެ.

 އުމުރުން އެއްމެ 7 އަހަރުގެ ކުޑަ ކުއްޖަކު އޭނާގެ މަންމަ އާއި ދިމާލަށް ބުނި ޖުމުލައެކެވެ. "މަންމާއެވެ! ފޭސްބުކުގައި ހަޑި އެއްޗެހި ނުލިޔައްޗޭ!" އާދޭހެވެ! މި ހަބަރު މީސްމީޑިޔާގެ މަންސައަކުން ފެނުމާއި އެކު، ދިވެހި މުޖުތަމައާއި މިކަން ގުޅިފައިވާ މިންވަރު އިހުސާސް ކުރެވި، މިކަމިގެ މައްޗަށް ލިޔުމެއް ލިޔުމުގެ ޝައުގު އުފެދުނެވެ.

މިއަދުގެ މި ތަހުޒީބު މުޖުތަަމައުތަކުގައި ފޭސްބުކް ފަދަ މީސްމީޑިޔާގެ މަންސަތަކަކީ ވަރަށް ގިނަ މީހުން ބޭނުން ކުރާ ތަނެކެވެ. އެކި އުމުރިގެ ދެ ޖިންސުގެ މީހުންވެސް ބޭނުން ކޮށް އުޅޭ ތަންތަނެވެ. އެހެންކަމުން އެފަދަ ތަންތަނުގައި ހަޑިހުތުރު ބަސް ބޭނުން ކުރުމަކީ އާއްމު އިޖްތިމާއީ ތަނެއްގައި ހުރެމެ، ހަޑި ހުތުރުބަހުން މުއާމަލާތްކުރުން ފަދަ ކަމެކެވެ. ކައިރީގައި ހުންނަ މީހާއަށް އަޑު ނީވުނެއް ކަމަކު، މީސްމީޑިޔާ ބޭނުން ނުކުރާ މީހާއަށް ނުފެނުނެއް ކަމަކު، ހަނދާންކުރަންވީ ކަމަކީ އެތައް ބަޔަކަށް އެތަން ފެންނާނެ ކަމެވެ. އަދި އެއީ ފަހުންވެސް ތިމާއާއި ދެކޮޅަށް ބޭނުން ކުރެވިދާނެ އެއްޗެއް ކަމެވެ. އަދި ތިމާގެ ދަރިން ބޮޑުވަމުން އައިސް، އެތަންތަނަށް ވަންނަ އިރު، އެ ލިޔުންތަކަކީ އެކުދިންނަށް ފެންނާން ހުންނާނެ ލިޔުންތަކެވެ. ފަހަރުގައި ތިބާއަށް ޑިލިޓްކޮށްލެވިދާނެއެވެ. ނަމަވެސް މިޒަމާނަކީ އެހެން ޑިލިޓް ކުރިޔަސް، އެ ރައްކާ ކުރާން ބޭނުންވާ މީހަކަށް އެކަން ކުރެވެން އޮންނަ ޒަމާނެކެވެ.

އޭ ލޮބުވެތި، ޒުވާން މައިންނެވެ! މިއަދު ތިބާގެ ދަރިފުޅު، ފޭސްބުކް ފަދަ މީސްމީޑިޔާގެ މަންސައެއް ބޭނުން ނުކޮށްފާނެއެވެ. އެހެނެއްކަމަކު އެތަންތަނުގައި ތިބާގެ އަގު ވެއްޓޭފަދަ ގޮތަކަށް ބަހުރުވަ ނުގެންގުޅޭށެވެ. އެކަމުގެ ސަބަބުން ގެއްލެނީ ތިމާގެ އަގު އެކަންޏެއް ނޫނެވެ. ތިމާގެ ދަރިންނަށްވެސް އެކަމުގެ ނުސީދާ އަސަރު ފޯރާނެއެވެ. އަދި ހަނދާނުގައި ބަހައްޓާށެވެ. ތިމާގެ މީސްމީޑިޔާގެ ރަމްޒީ ފޮޓޯގަނޑުގައި ތިމާގެ ދަރިފުޅުގެ ފޮޓޯގަނޑެއް ޖަހައިގެން، އެއިން ތިމާ ލިޔެ ހަދާ އެއްޗަކުން، ތިމާގެ ދަރިފުޅުގެ އަބުރަށް ހުތުރު ނަމެއް ލިބިދާނެއެވެ.

މިއީ ވިސްނާލުން މުހިއްމު ކަމެކެވެ. ބައެއްފަހަރު ޖަޒުބާތުގައި ޖެހެވިދާނެއެވެ. އެއަކު އެއްވެސް މައްސަލައެއް ނެތެވެ. ނަމަވެސް ރުޅި ކޮންޓްރޯލް ކުރަންވާނެއެވެ. މީސްމީޑިޔާއަށް އެ ރުޅި ދޫކޮށް ނުލާށެވެ. އެތަންތަނުގައި ހަޑިހުތުރު ބަހުން ލިޔެ ނުހަދާށެވެ!