ޑައިލެސިސް އަކީ ކިޑްނީ ނުވަތަ ގުރުދާ ފެއިލްވުމުން އެކަމަށް ކުރާ ފަރުވާއެކެވެ. ނަމުގައި ފަރުވާއެއް ކަމުގައި ވިޔަސް މިއީ އެކަން ކުރާ ފަރާތްތަކަށް ބޮޑު ތަކުލީފެކެވެ. އެހެންކަމުގެ މިކަމުގެ ދާއިމީ ހައްލަކަށް ކިޑްނީ ޓްރާންސްޕަލާންޓް ހަދަން ޖެހެއެވެ. ގުރުދާ ބަދަލުކުރަން ޖެހެއެވެ. މިއީވެސް ވަކި ކުޑަ ކަމެއް ނޫނެވެ. އަގުބޮޑު ތަކުލީފާއި ތުރާ ބޮޑު ކަމެކެވެ. ފަސޭހައިން ކުރެވޭ ކަމެއް ނޫނެވެ.
ކިޑްނީ ނުވަތަ ގުރުދާއަކީ ލޭގެ ތެރޭގައި ހުންނަ ވިހަ މާއްދާތައް ސާފުކޮށްދޭ ގުނަވަނެވެ. އެހެންކަމުން ގުރުދާގެ މަސައްކަތް ނުކުރެވޭނަމަ، ލޭގެ ތެރޭގައި ހުންނަ މި ވިހަ މާއްދާތައް އިތުރުވެ އިންސާނާގެ ހަށިގަނޑު ބަލިކޮށްލާނެއެވެ. ކިޑްނީ ފެއިލް ވެފައިވާ މީހުންނަކީ މިހާލަތު މެދުވެރިވެފައިވާ މީހުންނެވެ. އޭގެ ތެރޭގައި ހަފްތާއަކު ދެދުވަހު ނުވަތަ ތިން ދުވަހު ޑައިލެސިސް ހަދަން ޖެހޭ މީހުން ތިބެއެވެ.
ޑައިލެސިސް ހަދަން ޖެހުމަކީ އެކަމުގައި ވޭނީ އެތައް އިހުސާސްތަކެއް ހިނގާ ކަމެކެވެ. ހަގީގަތުގައި ގަވައިތުން ޑައިލެސިސް ހެދޭނީ އަސްލުގައިވެސް ވަރަށް ހިތްވަރަށް ހުރެގެންނެވެ. ޑައިލެސިސް ހަދަން ޖެހޭ ފަރާތްތަކުން އުފުލާ އެތައް ވޭނެއް ހުރެއެވެ. އޭގެ ތެރޭގައި ކެއިން ބުއިމުގައި އޮންނަ ހަރުކަށި މިންގަނޑަކަށް ތަބައަ ވާން ޖެހެއެވެ. އެކަމުގެ ސަބަބުންނާއި ކިޑްނީ ފެއިލްވެފައި ވާތީއާއި އެކު، ވަރުބަލިކަމަކީ ކޮންމެ ދުވަހަކު، ކޮންމެ ސާއަތެއްގައި އެބައިމީހުން އުފުލާ ބޮޑު ވޭނެކެވެ. ބައެއް ފަހަރު ލޭ މައްޗަށް ދިއުމާއި އަދި އަނެއްބައި ފަހަރު ލޭ ދަށްވުމާއި މޭނުބައި ކުރުމާއި ހޮޑު ލެވުމާއި ބޮލަށް އެނބުރުން އެރުމާއި ތުރުތުރު ލުމާއި ވާނުވާ ނޭނގޭ އެތައް އުނދަގޫތަކެއް ކޮށްމެ ދުވަހަކުމެ އެބައިމީހުން އުފުލައެވެ. ނޭވަޔަށް އުނދަގޫ ކުރުމާއި ބަނޑުހައިކަން އިހުސާސް ކުރަން ޖެހުމާއި ފެން ބޯންޖެހޭ މިންގަނޑުގެ ސަބަބުން ބަނޑު ހިކުންފަދަ ވޭނީ އެތައް ކަމެއް އެބައިމީހުން ތަޖުރިބާކުރަން ޖެހެއެވެ.
ދިފާއީ ނިޒާމުގެ ބަލިކަށިކަމާއި އެކު، އެހެންބަލިތަށް ޖެހުމުގެ ފުރުސަތު ބޮޑުތަނުން އިތުރުވެއެވެ. މިކަމުގެ ސަބަބުން އާއްމުން އެއްވެ އުޅޭ ތަންތަނަށް ނުކުމެ އުޅުމުގައި ވަރަށްބޮޑަށް ރައްކާތެރި ވާން ޖެހެއެވެ. އަދި ސާފްތާހިރުކަމަށާއި އެނޫންވެސް އެފަދަ ކަންކަމަށް އަބަދުމެ އިސްކަން ދޭން ޖެހެއެވެ.
މީގެ އިތުރުން ޑައިލެސިސް ހަދަން ޖެހުމާއި އެކު، މުޅި ދިރިއުޅުމަށް އަންނަ ބަދަލުތަކާއި އެކު، އެކަމުގެ މައްޗަށް ހިތާމަ ކުރެވި، ވިސްނި، ނަފްސާނީ ގޮތުމް އެބައިމީހުން ބަލިވެއެވެ. އާދޭހެވެ! ހަފްތާއަކު ދެ ދުވަހު ނުވަތަ ތިން ދުވަހު ޑައިލެސިސް ހަދަން ޖެހުމަކީ އާދައިގެ ކުޑަކެއް ނޫނެވެ. އުމުރުގެ ބާކީ އޮތް ދުވަސްތަކުގައި ނުވަތަ ކިޑްނީ ޓްރާންސްޕްލާންޓް ހެދެންދެއް، ދުނިޔޭގައި ހުރުމަށްޓަކައި މިއީ ކޮންމެހެން ކުރަންޖެހޭ ކަމެކެވެ.
މިސަބަބުތައް މިހެން ހުރުމާއި އެކު، ޑައިލެސިސް ހަދާ ފަރާތްތަކަކީ ގިނަ ބައެއްގެ އަޅާލުމާއި އެހީތެރިކަން ބޭނުންވާނެ ބައެކެވެ. ހާއްސަކޮށް އާއިލާގެ މީހުންގެ ފަރާތުންނާއި އެކުވެރި ރަހުމަތްތެރިންގެ ފަރާތުންނެވެ. ނަފްސާނީ ގޮތުން ސާބިތުވެ ހުރުމަށްޓަކައި ނަފްސާނީ ގޮތުން ކޮންމެ ދުވަހަކުމެ ހިތްވަރު ދޭންވާނެއެވެ. އެހެންމީހުންގެ އަމަލުތަކުގެ ސަބަބުން ބަލި މީހާއަށް އެއްވެސް އުނދަގުލެއް ނުފޯރުވާ ވޭތޯ ބަލަންވާނެއެވެ. ބޭސްތައް ބޭނުން ކުރުމުގައި ގަވައިދުން ބޭސްތައް ބޭނުން ކުރުމަށް އެހީތެރިވެދޭން ވާނެއެވެ. ކެއިން ބުއިމުގައި މިންވަރު ހެޔޮކޮށް، މިންގަނޑުގައި ހިފަހައްޓައިގެން ކެއުން ބުއިމުގެ ކަންކަން ބައްޓަން ކުރަން ހޮތްވަރު ދޭންވާނެއެވެ. ހިތްހަމަ ޖައްސައިދީ އުފާކޮށްދެވޭތޯ ބަލަންވާނެއެވެ.
ޑައިލެސިސް ހެދުމަކީ ފަސޭހަކަމެއް ނޫނެވެ. މުޅި މީހާގެ ހަށިގަނޑުގައި ހުންނަ ހުރިހާ ލެޔެއް، މެސަނެއްގެ ތެރެއަށް ނަގާ ސާފުކޮށް ދައުރުކޮށް އަނެއްކާ ހަށިގަނޑުގެ ތެރެއަށް ގެނެސް އަޅައެވެ. މިކަމަށްޓަކައި ފިސްޓުލާއެއް ލައްވާފައިވާ މީހެއްނަމަ ޑައިލެސިސް ހަދާ ކޮންމެ ދުވަހަކު ފަލަ ކައްޓެއް ޖަހާނެއެވެ. އެއީވެސް ފެށުމުގައި ވޭނެކެވެ. ނަމަވެސް އެ ތަދަށް ހޭނުމުން އެކަމަކުން މާ ބޮޑު ތަދެއް އިހުސާސްނުކުރެވޭ ކަމަށް ބައެއް މީހުން ބުނެއެވެ. ކޮންމެއަކަސް ޑައިލެސިސް ހަދާ މީހުންނަކީ މުޖުތަމައުގެ އެހީތެރިކަމާއި އޯގާތެރިކަން ބޭނުންވާނެ ބައެކެވެ. އެބައިމީހުން އެ ފަރުވާއެއް އެ ހޯދަނީ، އާދައިގެ އަރިދަފުސް ރޯގާއަކަށް ނޫނެވެ. މިއީ ދިރުހުރުމާއި ނުހުރުމުގެ ފަރުވާއެކެވެ. ޑައިލެސިސް ހަދާ ހުރިހާފަރާތްތަކަށް ލުއިގޮތްތަކެއް މިންވަރު ކުރައްވާ އަވަސް ޝިފާއެއް މިންވަރު ކުރައްވާށިއެވެ! އާމީން.