ބައެއް މީހުންނަށް އެމީހުންގެ އަނބިދަރިންނާއި މައިންބަފައިންނާއި ޢާއިލާގެ މީހުންގެ ކަންކަމަށް ދޭންޖެހޭ ސަމާލުކަން އޭގެ އެއްމެ ފުރިހަމަ ގޮތިގައި ނުދެވެއެވެ. އެއްބަޔަކު އެބައިމީހުންގެ ދުނިޔެވީ އަމިއްލަ ކަންކަމުގައި މަޝްއޫލުވެ އުޅޭއިރު، އަނެއްބަޔަކު ތަފާތު އަޅުކަންތަކުގައި މަސްއޫލުވެ، އުޅެނީ އާއިލާއަށް ދޭން ޖެހޭ ވަގުތު ނުދީއެވެ.

މަޝްހޫރު ދީނީ ޢިލްމުވެރިޔާ މުފްތީ މެންކް ވިދާޅުވަނީ މިއީ އަކީ މިކަން އޮންނަން ވާނެ ގޮތް ނޫންކަމަށެވެ. އަޅުކަމުގައި ގިނަ ވަޤުތު ހޭދަކުރަން ޖެހޭނީވެސް އަނބިދަރިންނާއި މައިންބަފައިންނާއި ޢާއިލާގެ މީހުންގެ ކަންކަން ބަލަހައްޓަމުންނެވެ. ދޭންޖެހޭ ލޯތްބާއި އަޅައިލުން ދެމުންނެވެ. ވަގުތު ދެމުންނެވެ. އަދިވެސް އިތުރަށް ކޮށްދޭން ޖެހޭ ކަންކަން ކޮށްދެމުންނެވެ.

މިކަމަށް އިޝާރާތް ކުރައްވާ މުފްތީ ވިދާޅުވަނީ އެކަމުގެ އެއް ދަލީލަކީ ފަރުޟު ނަމާދުގެ ޖަމާއަތަށް ނުގޮސް ގޭގައި މަޑުކުރުން ހުއްދަވާ ކަންކަމުގެ ތެރޭގައި ތިމާ ބަލަހައްޓަން ޖެހޭ މީހެއްގެ ޞިއްޙީ ޙާލަތު ގޯސްވުން ހިމެނޭކަމެވެ. މިކަންކަމުން އެނގިގެންދަނީ އަނބިދަރިންނާއި މައިންބަފައިންނާއި ޢާއިލާގެ މީހުންގެ ކަންކަން ބަލަހައްޓަން ދީނުގައި ދީފައިވާ އަހައްމިއްޔަތުގެ ބޮޑުކަމެވެ. 

ކަންމިހެން ހުރުމާއި އެކު އަޅުކަމުގައި ގިނަ ވަޤުތު މިސްކިތުގައި ހޭދަކުރަންވާނީވެސް އިސްވެ ބަޔާންކުރެވުނު ފަދައިން، ޢާއިލާގެ ކަންކަން ބަލަހައްޓަމުންނެވެ. އެމީހުންނަށް ދަތިނުވާނެ ގޮތަށް ގޭތެރޭގެ ކަންކަން އިންތިޒާމުކުރުމަށްފަހުގައެވެ. އެމީހުންނަށް ފުރިހަމައަށް ލޯތްބާއި އަޅާލުން ދިނުމަށް ފަހުގައެވެ. 

މުފްތީގެ މި ދަރުސްގައި އިތުރަށް އޭނާ ފާހަގަކުރެއްވީ އަނބިދަރިންނާއި މައިންބަފައިންނާއި ޢާއިލާގެ މީހުންގެ ކަންކަން ބެލެހެއްޓުމަކީވެސް އަޅުކަމެއް ކަމުގައި އިސްލާމްދީނުގައި އޮންނަ ކަމަށެވެ. އެމީހުންނަށް ކުރާ ހޭދައަކީ އެންމެ މަތިވެރި ޞަދަޤާތް ކަމުގައި ލައްވަވާފައިވުމަކީވެސް އެމީހުންގެ ކަންކަމަށް ދީނުގައި ދީފައިވާ މަތިވެރިކަން އެނގިގެންދާ ކަމެކެވެ. 

މިކަންކަން މިހެން ހުރުމާއި އެކު، އަޅުކަންތައްތައް ކުރުމުގައިވެސް އިސްކުރަންވީ ކޮން އަޅުކަމެއްކަން ދެނެތިބުން މުހިއްމެވެ. އެކަންކަމުގައި ޢިލްމުވެރިންނާ ސުވާލުކޮށް ހާލަތަށް ރިއާޔަތް ކުރާއިރު އެއްމެ މޮޅުއިތުރު ގޮތަކީ ކޮބައިކަން ހޯދާ އެނގިތިބުން މުހިއްމެވެ. މިހުރިހާ ކަމަކީ އިސްލާމްދީނުގައި އައިސްފައިވާ ލުއިފަސޭހަކަމާއި މާތް ﷲ ގެ އޯގާތެރިކަމުގެ ނަތީޖާއެވެ. އާދޭހެވެ! މާތް ﷲ އީ އަހަރެމެންގެ ހާލަތު މޮޅަށް ދެނެވޮޑިގެންވާ އަދި އަހަރެމެންނަށް އެއްމެ ފައިދާހުރި ގޮތް ބަޔާންކޮށްދެއްވި އިލާހެވެ!