އޮސްޓރޭލިއާގެ އަންހެނެއްގެ ސިކުނޑި ތެރެއިން ދިރޭ ފަންޏެއް ނަގައިފިއެވެ. އުމުރުން 64 އަހަރުގެ މި އަންހެން މީހާގެ ސިކުނޑިން ނަގާފައި ވަނީ 8 ސެންޓިމީޓަރުގެ ފަންޏެކެވެ. އޮސްޓްރޭލިއާގެ ކެންބެރާ ހޮސްޕިޓަލުގައި ކުރެވުނު މި ސާޖަރީގައި ވަނީ ޑަކްޓަރުންގެ ބޮޑު ޓީމެއް ބައިވެރިވެފައެވެ.
މިއީ ދުނިޔޭގެ ތާރީހުގައި މިހާތަނަށް އިންސާނެއްގެ ސިކުނޑި ތެރެއިން ދިރޭ ފަންޏެއް ނެގި ފުރަތަމަ ފަހަރެވެ. އުމުރުން 64 އަހަރުގެ މި އަންހެން މީހާއަށް، 2021 އަހަރުގެ ކުރީކޮޅުން ފަށައިގެން ތަފާތު އުނދަގޫތައް ކުރިމަތިވާން ފެށިކަމަށް ރިޕޯޓުތަކުގައި ވެއެވެ. އެގޮތުން ގަނޑުގައި ރިއްސުމާއި ހޮޑުލުން ފަދަ ކަންކަން އާއްމުކޮށް ދިމައިވާން ފެށިއެވެ. އޭގެ ފަހުން 2022 ވަނަ އަހަރު އޭނާގެ ވިސްނުން ކޮށިވެ، ހަނދާން ބަލިވުން ފަދަ ކަންކަން ދިމައިވާން ފެށިއެވެ. މިއަހަރުގެ މެދުތެރެއިން ފެށިގެން އެކަންކަމުގެ އުނދަގޫ ބޮޑުވުމާއި އެކު އޭނާ ދިޔައީ އެކި އެކި ފަރުވާ ހޯދަމުންނެވެ. ނަފްސާނީ އެތައް ފަރުވާއެއްވެސް ވަނީ ހޯދާފައެވެ. ނަމަވެސް އެއްވެސް ހައްލެއް އެއިން ކަމަކަށް ނުލިބުނުނެވެ.
އޮސްޓްރޭލިއާގެ މި ހޮސްޕިޓަލުގައި އޭނާ ފަރުވާހޯދަމުން ދިޔަ އިރު، ސިކުނޑީގެ ސީޓީ ސްކޭނެއް ހެދިއެވެ. އެ ސްކޭނުން ސިކުނޑީގެ ކުރިމަތި ބައިގާ އުނިކަންތަކެއް ހުރިކަން ފާހަގަ ކުރެވުމާއި އެކު، އޮޕަރޭޝަނެއް ކުރުމަށް ގަސްތުކޮށް އޮޕަރޭޝަން ކުރިއެވެ. މި އޮޕަރޭޝަން ކުރި ނިއުރޯސާޖަން ޑރ. ހަރިރް ޕްރިޔާ ވިދާޅުވި ގޮތުގައި އޮޕަރޭޝަން ފެށިގެން ދިޔައިރުވެސް އެފަދަ ކަމެއް ދިމައިވެދާނެ ކަމަކަށް ހީވެސް ނުކުރާ ކަމަށެވެ. އެހެން ކަމުން އެކަން ވެގެން ދިޔައީ ބޮޑު ހައިރާންކަމަކަށެވެ. އެއާއި އެކު އެ ހޮސްޕިޓަލުގެ އިންފެކްޝިއަސް ޑިޒީސް ޓީމުންވެސް ވަނީ އެ އޮޕަރޭޝަންގައި ބައިވެރި ވެފައެވެ.
ކާމިޔާބު އެ އޮޕަރޭޝަން ނިންމާލާ، އޭނާއަށް ފަރުވާ ދީފައިވާއިރު، މިހާރު އެ އަންހެނާގެ ހާލު ރަނގަޅުކަމަށް ރިޕޯޓުތައް ބުނެއެވެ. މި އޮޕަރޭޝަން ކުރެވުނު އޮސްޓްރޭލިއާގެ ހޮސްޕިޓަލަކީ މާ ބޮޑު ހޮސްޕިޓަލެއް ކަމަށް ނުވުމާއި އެކު، އެ ފަނި، ދިރޭ ހާލުގައި ތަހުލީލު ކުރުމަށް ސައިންސުވެރިންނާއި ވަނީ ހަވާލުކޮށްފައެވެ. އެގޮތުން އެނގުނު ގޮތުގައި އެއީ އޮފިޑަސްކަރިސް ރޮބޭޓިސް ނަމަކަށް ކިޔާ ވައްތަރެއްގެ ފަންޏެއް ކަމަށެވެ. އަދި އެއީ ހަރުފައިގެ ވައްތަރެއް ކަމަށްވާ ޕައިތޯން ނަމަކަށް ކިޔާ ހަރުފަތަކުގެ ހަށިގަނޑުގެ ތެރެއިން ފެންނަ ފަންޏެއް ކަމަށެވެ. ވުމާއި އެކު މި ފަނި އެ އަންހެން މީހާގެ ސިކުނޑީގެ ތެރެއަށް ވަންގޮތެއް ހޯދާ ބެލުމުގެ މަސައްކަތް މިހާރު ކުރެވެމުންދާ ކަމަށް ރިޕޯޓުތަކުން ބުނެއެވެ. އަދި މީގެ ނުރައްކާ އެހެން ބަޔަކަށް އޮތްތޯވެސް ދަނީ ބަލަމުންނެވެ.
ހަވާލާ: މެލީސާ، ދަ ގާޑިއަން 2023