ދިރާގު މޯލްޑިވްސް "ރޯޑް ރޭސް 2023" އަށް ރަޖިސްޓްރީވުމުގެ މުއްދަތު މި މަހުގެ 5 ވަނަ ދުވަހުގެ ނިޔަލަށް އިތުރުކޮށްފިއެވެ.
ދިރާގުން ބުނީ ރޯޑް ރޭހުގެ ރަޖިސްޓްރޭޝަން މުއްދަތު އިތުރުކުރީ، ގިނަ ބައެއްގެ އެދުމުގެ މަތީން ރާއްޖޭގައި ބާއްވާ އެންމެ ބޮޑު ދުވުމުގައި ވީހާވެސް ގިނަ ބަޔަކަށް ބައިވެރިވުމުގެ ފުރުސަތު ދިނުމުގެ ގޮތުން ކަމަށެވެ.
ދިރާގު ރޯޑްރޭހަށް ރަޖިސްޓްރީވުން މިހާރު ވަނީ މި ސެޕްޓެންބަރު މަހުގެ ފަސްވަނަ ދުވަހުގެ ރޭ 11:59 އަށް އިތުރުކޮށްފައެވެ. މި އަހަރުގެ ދުވުން އޮންނާނީ 27 އޮކްޓޯބަރު 2023 ވާ ހުކުރު ދުވަހު ހުޅުމާލެ ސެންޓްރަލް ޕާކުގައެވެ. މިއީ ދިރާގު ރޯޑް ރޭސް ބާއްވާ 14 ވަނަ ފަހަރެވެ.
ދިރާގު މޯލްޑިވްސް ރޯޑް ރޭހަކީ އަހަރަކު އެއްފަހަރު މުޅި ރާއްޖެއާއި ރާއްޖެއިން ބޭރުގެ މީހުންނާއި ޖަމާޢަތްތައް އެއްތަނަކަށް އެއްކޮށްގެން ރާއްޖޭގައި ބާއްވާ ފުރަތަމަ އަދި ހަމައެކަނި ބައިނަލްއަގުވާމީ ދުވުމެވެ. މީގެއިތުރުން، މިއީ ވޯލްޑް އެތުލެޓިކްސް ސާޓިފައިޑް ރޭސް ރޫޓަކާއެކު އެސޯސިއޭޝަން އޮފް އިންޓަނޭޝަނަލް މެރެތަންސް އެންޑް ޑިސްޓެންސް ރޭސް (އެއިމްސް) ވޯލްޑް ރަނިން ކަލަންޑަރުގައި ލިސްޓްކޮށްފައިވާ ދުވުމެކެވެ.
މިއަހަރުގެ އިވެންޓްގައި ފުރަތަމަ ފަހަރަށް ދިރާގު ރޯޑް ރޭހުގައި ހާފް މެރަތަން އަށް ދުވުމުގެ ފުރުޞަތު ބައިވެރިންނަށް ލިބިގެންދާނެއެވެ. އަދި މީގެއިތުރުން، ދުވުމުގެ މުޅިން އައު ރޫޓަކާއި، ކުރިއަށްވުރެ ފައިސާގެ އިނާމު އިތުރުކޮށް ތަފާތު ކުލަގަދަ ހަރަކާތްތަކެއް މި ފަހަރުގެ އިވެންޓްގައި ކުރިއަށްދާނެ އެވެ.
ދިރާގުން ބުނީ، ކުރީ އަހަރުތަކެކޭ އެއްފަދައިން މި އަހަރުގެ ދުވުން ވެސް ޚާއްސަކޮށްފައިވަނީ އެ ކުންފުނީގެ ކޯޕަރޭޓް ސޯޝަލް ރެސްޕޮންސިބިލިޓީ (ސީއެސްއާރް) ޕްރޮގްރާމްގެ މުހިންމު އެއް ދާއިރާ ކަމަށްވާ ކުޑަކުދިންގެ ރައްކާތެރިކަމަށް ކަމަށެވެ.
އަދި މި އިވެންޓްގައި ކުޑަކުދިންގެ ރައްކާތެރިކަމުގެ ދާއިރާގައި ހަރަކާތްތެރިވާ އެންޖީއޯތަކަށް އާންމުން ހޭލުންތެރިކުރުވުމަށާއި، ފަންޑް ރެއިޒް ކުރުމަށް މަގުފަހިވެގެން ދާނެއެވެ.
ދިރާގު މޯލްޑިވް ރޯޑް ރޭހަށް ރަޖިސްޓްރީ ކުރުމަށާއި މި އިވެންޓާއި ބެހޭ އިތުރު މައުލޫމާތު ހޯދުމަށް dmrr.mv އަށް ޒިޔާރަތް ކުރައްވާށެވެ.