ކުރެންދޫގައި ހުންނަ ޅ. އަތޮޅު މަދަރުސާގެ ގްރޭޑް 7 އިން 10 އަށް ތައުލީމު ހާސިލުކުރަމުންދާ ދަރިވަރުން އިންޓަނެޓު މެދުވެރިކޮށް ހިންގާ ކުށްތަކުން ރައްކާތެރިކުރުވުމަށް މައުލޫމާތު ދިނުމުގެ ސެޝަނެއް އެ ރަށު ޕޮލިސް ސްޓޭޝަނުން ކުރިއަށް ގެންގޮސްފިއެވެ.
ސެޕްޓެމްބަރ 24 ވަނަ ދުވަހު އެ މަދަރުސާގައި ކުރިއަށް ގެންދިޔަ ސެޝަނުގައި ފުރާވަރު އުމުރުގެ ކުދިންނަށް އަމާޒުކޮށް އިންޓަނެޓު މެދުވެރިކޮށް ހިންގާ ކުށްތަކަކީ ކޮބައިކަން ބުނެދީފައިވެއެވެ. އަދި އެފަދަ ކުށްތަކަށް ހުށަހެޅެނީ ކިހިނެއްކަމާއި އެފަދަ ކުށްތަކުން ދުރުހެލިވެ ރައްކާތެރިވެ ތިބުމަށް މަސައްކަތްކުރާނެ ގޮތުގެ މައުލޫމާތު ހިއްސާކޮށްފައިވެއެވެ.
އަދި އިންޓަނެޓު މެދުވެރިކޮށް ހިންގާ ކުށްތަކުގެ ޝިކާރައަކަށް ވެއްޖަނަމަ ދިމާވެދާނެ ކަންކަމުގެ މައުލޫމާތުވެސް ހިއްސާކޮށްފައިވެއެވެ. އެގޮތުން، އެފަދަ ކަމެއް ދިމާވުމުން ބެލެނިވެރިންނަށް އެކަން ސިއްރުނުކުރުމަށް ނަސޭހަތްތެރިވެފައިވެއެވެ. އަދި އެފަދަ ކަންކަން ސިއްރުކޮށްގެން އުޅޭނަމަ ޑިޕްރެޝަނާއި އެންޒައިޓީ އަދި އަމިއްލަ ނަފުސަށްކުރާ އިތުބާރު ގެއްލިގެންދިއުން ފަދަ ކަންކަމުން ދަރިވަރުން ރައްކާތެރިކުރުމަށް ތަފާތުއެކި މައުލޫމާތު ހިއްސާކޮށްފައިވެއެވެ.
އޭގެ އިތުރުން ރައްކާތެރިގޮތުގައި އިންޓަނެޓު ބޭނުންކުރާނެ ގޮތާއި އިންޓަނެޓުގައި އާންމުކޮށްގެން ނުވާނެ ޒާތީ މައުލޫމާތުތައް ބުނެދިނުމާއެކު ދަރިވަރުންގެ މެދުގައި ގްރޫޕް މަސައްކަތްތައްކެއް ކުރިއަށް ގެންގޮސްފައިވެއެވެ.