އިންސާނުންނަށް ވައިގެ އުނދަގޫ ކުރުވާ އެއް ބައްޔަކީ ނުވަތަ ހާލަތަކީ ހައިއޭޓަލް ހާނިޔާއޭ ކިޔާ ބައްޔެކެވެ. ނުވަތަ ހާލަތަކެވެ. އިންސާނާގެ ހަށިގަނޑުގައިވާ ކާތަކެތި ދަތުރު ކުރާ ހޮޅިއާއި މައިދާ ގުޅޭ ހިސާބުގައި އުފެދޭ މި ހާނިޔާގެ ސަބަބުން ވައިގެ އުނދަގޫ އިތުރުވެދެއެވެ. މި ހާނިޔާ ކުޑަކޮށް ހުންނަ ނަމަ މިއީ ކަންބޮޑުވާން ޖެހޭ ވަރުގެ ކަމެއް ނޫނެވެ. ނަމަވެސް ހައިއޭޓަލް ހާނިޔާ މާ ބޮޑުވަރުވާނަމަ މިއީ އެކަމުގައި ސިއްހީ އެހީތެރިކަން ހޯދަން ޖެހޭނެފަދަ ހާލަތެކެވެ.
އިންސާނާގެ އެތެރެ ހަށީގެ ގުނަންތަށް ވަނީ އެކި ބައިތަކަށް ބެހިފައެވެ. މެއޭ މި ކިޔާ ހިސާބުގައި އެއްބައި ގުނަވަންތައް ހުންނަ އިރު، ބަނޑޭ މި ކިޔާ ހިސާބުގައިވެސް އެތައް ގުނަވަންތަކެއް ހުރެއެވެ. މެއާއި ބަނޑުގެ ގުނަވަންތަކާއި އެތަނުގެ ޖާގަ، ވަކިކޮށްދެނީ މެއާއި ބަނޑާއި ދެމެދުގައިވާ މަހުގެ ފަށަލަ އަކުންނެވެ. މި ފަށަލައަށް "ޑައިފްރާމް" އޭ ކިޔައެވެ.
ކާތަކެތި ދަތުރުކުރާ ހޮޅި ވަނީ މެއޭ މި ކިޔާ ހިސާބުގައެވެ. އެ ހޮޅި ގޮސް ގުޅިފައިވާ މައިދާ ވަނީ ބަނޑޭ މި ކިޔާ ހިސާބުގައެވެ. އެހެންކަމުން އެތެރެ ހަށީގައި މެއާއި ބަނޑާއި ވަކިކޮށްދޭ ޑައިފްރާމްގައި އިންނަ "ހައިއޭޓަސް" ނަމަކަށް ކިޔާ ބާކޮޅަކުން، ކާތަކެތި ދަތުރުކުރާ ހޮޅިއާއި މައިދާ އާއި ގުޅެއެވެ.
ހައިއޭޓަލް ހާނިޔާގައި މިވާ ގޮތަކީ ބަނޑޭ މި ކިޔާ ހިސާބުގައި އިންނަ މައިދާގެ މަތީބައި ނުވަތަ ކާތަކެތި ދަތުރުކުރާ ހޮޅި، މައިދާ އާއި ގުޅޭ ހިސާބު، ޑައިފްރަމްގައި އެ އިންނަ ހައިއޭޓަސް ބާގަނޑާ ދިމާލަށް ބާރުކޮށް، ޑައިފްރާމްގެ މަތިން، މެއޭ މިކިޔާ ހިސާބަށް މައިދާގެ އެ ބައި ނުކުމެލާފައި ހުރުމެވެ.
މި ހާނިޔާގެ އާއްމު އަލާމާތްތަކަކީ މޭ އެންދުމާއި ކުޅިހޮޑު އައުމާއި ހިންދިރުވަން އުނދަގޫވުމާއި މޭކޮޅަށް ތަދުވެފައި ހުރުމެވެ. މީގެ އިތުރުން ކުޑައެތިކޮޅެއް ކާލިނަމަވެސް ބަނޑު ފުރި، ފުފިގެން ދިއުމާއި ނޭވައި ކުރުވެ، ނޭވަޔަށް އުނދަގޫކޮށް ގިނިވަޔަށް ގެނައުން ހިމެނެއެވެ. މި ހާނިޔާގެ ނުރައްކާތެރި އަލާމާތްތަކުގެ ތެރޭގައި ހޮޑުގެ ގޮތުގައި ތާޒާ ލޭ، ލެވުމާއި ބޮޑުކަމުދާ ތަކެތީގައި ސީދާ ކަޅުކުލަ ހުރުން ހިމެނެއެވެ.
ހައިއޭޓަލް ހާނިޔާ އަކީ، އޭގެ އުނދަގޫތަކުން ސަލާމަތްވުމަށް ގިނަފަހަރަށް ބޭހެއްވެސް ބޭނުން ނުވާ ހާނިޔާއެކެވެ. އެހެނީ ވައިގެ އުނދަގޫ ކުރުވާ ބައެއްކަހަލަ ކާނާ ކެއުން މަދުކޮށްލުމުން މި ހާނިޔާގެ ގިނަ އުނދަގޫތަކެއް އާއްމުގޮތެއްގައި ލުއިވެއެވެ. އެގޮތުން ތެލާއި ހަވާދާއި އަދި ކުޅި އެކުލެވޭ ކާނާކެއުން މަދުކުރުން ހިމެނެއެވެ. މިހެން މިކަން އޮތްނަމަވެސް ހައިއޭޓަލް ހާނިޔާގެ އުނދަގޫތަކަށް ތަސައްލީ ހޯދުމަށް ބޭހަކީވެސް ބޭނުން ކުރާ، އަދި ކުރަން ޖެހިދާނެ އެއްޗެކެވެ. ޑަކްޓަރުގެ ލަފާގެ މަތިން މިފަދަ ބޭސްތައް ބޭނުން ކުރެވުދާނެއެވެ. ހައިއޭޓަލް ހާނިޔާގެ ފަރުވާއަކަށް ސާޖަރީއެއް ހަދަން ޖެހުމަކީ ވަރަށް ނާދިރު ކަމެކެވެ. އެހެނީ މިއީ އާއްމުގޮތެއްގައި އެހާ ބޮޑުވަރުވާ ހާނިޔާއެއް ނޫނެވެ. ނަމަވެސް އެފަދަ ހާލަތެއް މެދުވެރިވެ، ހާނިޔާގެ ހާލަތު އިތުރަށް ގޯސްވާނަމަ، ސާޖަރީއެއް ކޮށްގެންވެސް މިއީ ފަރުވާ ހޯދިދާނެ ކަމެކެވެ.