އަހަރެމެންގެ ދިރިއުޅުމުގައި ތަފާތު އެކި ކަންކަމުގެ ތެރެއިން އުފާވެރިކަމާ ހިތްހަމަޖެހުން ހޯދަމުއެވެ. އެގޮތުން ބައެއްމީހުން ހިތްހަމަ ޖެހުމާއި އުފާވެރިކަން ހޯދަނީ ކާހިތްވާ ކޮންމެވެސް އެއްޗެއް ކައިގެންނެވެ. މިއީ އަހަރެމެންގެ ތެރެއިން ވަރަށް ގިނަ މީހުން ހިތްމަޖެހުން ހޯދާ އެއް ގޮތެވެ.

އާއްމުކޮށް މިފަދަ މީހުން، މިގޮތަށް ކާހިތްވާ އެއްޗެހި ކައި ހަދަނީ ރޭގަނޑަށެވެ. ދަންވަރަށެވެ. ސިއްހީ ގޮތުން މިއީ ރަނގަޅުކަމެއް ނޫންކަން އެނގޭ ހާލުގައިވެސް މިކަން ތަކުރާރުކޮށް ކުރަނީ އެކަމުގެ ސަބަބުން ލިބޭ ހިތްހަމަ ޖެހުމާއި އުފާވެރިކަން ބޮޑުކަމުންނެވެ.

ދިރާސާވެރިން ދެކިލައްވާގޮތުގައި އާދަވެ މިގޮތަށް ކައި އުޅޭނަމަ، މިއީ ދެވިހިފާ ކަމެކެވެ. މާނައަކީ އެކަމެއްގެ މައްޗަށް އިންސާނާގެ ހިތް ލެނބި، އެއީ ދިރިއުޅުމުގެ އެއް ބައި ކަމުގައިވެ، އެއީ ދިރިއުޅުމުގައި އަސާސީ ކަމެއް ކަމުގައި ވެދެއެވެ. އެއާއި އެކު ދެން ނުކުންނަ ނަތީޖާ ރަނގަޅެއް ނުވެއެވެ. މިގޮތަށް ދެވިހިފަނީ އެކަމުން އިންސާނާއަށް ލިބޭ ހިތްހަމަޖެހުމާ އުފަލުގެ ބޮޑުކަމުންނެވެ.

ިއިންސާނާއަށް ލިބޭ އުފާވެރިކަމާ ހިތްހަމަ ޖެހުމުގެ ސަބަބުން އުފެދޭ އުފާވެރިކަމުގެ ހޯމޯނުތައް އެއްކަމަކަށް މާ ބޮޑަށް ބަރޯސާވާނަމަ، އެ ހޯމޯންތައް އުފެދި ގިނަވުން ބުރަވާނީ އެކަންކަމެއްގެ މައްޗަށެވެ. އެކި މީހުން ހިތްހަމަ ޖެހި އުފާވާ ކަންކަން ތަފާތުވަނީ މި ސަބަބާއި ހުރެއެވެ. އެހެންކަމުން އެއްޗެއް ކާހިތްވާ ހަމަ ކޮންމެ ފަހަރަކު، އެ އެއްޗެއް ކާން ހޯދާ، ކާނަމަ، އެކަމުގެ މައްޗަށް އުފާވެރިކަމުގެ ހޯމޯނުތައް ބުރަވާ ބުރަވުމަކީ އެކަމަށް ދެވިހިފުމެވެ.

އެއްޗެއް ކާހިތްވާ ހަމަ ކޮންމެ ފަހަރަކު އެ އެއްޗެއް ހޯދާ، ކާނަމަ، އިންސާނާގެ ކެއިންބުއިމުގެ އާދަތައް ވަރަށްބޮޑަށް ބަދަލުވާނެއެވެ. ނަތީޖާއަކަށް ވާނީ އެކަމުގެ ސަބަބުން ސިއްހަތައް އެތައް ގެއްލުން ތަކެއް ވުމެވެ. އާދޭހެވެ! ފަހަރުގައި މިގޮތަށް ކާހިތްވާ އެއްޗަކީ ސިއްހަތަށް ފައިދާކުރާ އެއްޗެއް ކަމުގައިވެސް ވެދާނެއެވެ. ނަމަވެސް ދިރާސާތަކުން ދައްކާ ގޮތުގައި ކާހިތްވެގެން އެ އެއްޗެއް ކައި، އެއަށް ދެވި ހިފަނީ އާއްމުކޮށް ސިއްހަތަށް ގެއްލުންދޭފަދަ ކެއުންތަކަށެވެ. އެހެނީ އެ ކާއެއްޗެހިތަކުގައި ހުންނަ މީރު ރަހައިގެ ސަބަބުންނެވެ.

ކޮންމެއަކަސް އެއްޗެއް ކާހިތްވާ ހަމަ ކޮންމެ ފަހަރަކު އެ އެއްޗެއް ހޯދާ ކެއުމަކީ ބުއްދިވެރިކަމެއް ނޫނެވެ. އެގޮތަށް ކާހިތްވި ނަމަވެސް ކެތްތެެރިކަން އިސްކޮށް، އެ ކާހިތްވާ އެއްޗެއް ނުކައިވެސް މަޑުކުރުން ޖެހޭނެއެވެ. އެހެނީ ކާހިތްވާ ކޮންމެ އެއްޗެއް، ކާހިތްވާ ކޮންމެ ފަހަރަކު ކެއުން އެއީ ދިރިއުޅުމުގެ އާދައެއްގެ ގޮތުންނާއި ސިއްހީ ގޮތުންވެސް ރަނގަޅު ކަމެއް ނޫނެވެ.