އަހަރެމެންގެ ތެރެއިން ބައެއް މީހުން ކަންކަން ކުރާއިރު، އެކަމެއް ކުރުމަށް ފޮތުގައި ލިޔެފައި އޮންނަ ގޮތް ބަލާ މީހުންވެސް އުޅެއެވެ. އަނެއް ބަޔަކު ބަލަނީ ފަސޭހައިން އެކަމެއް ކޮށްލެވޭ ގޮތަކަށެވެ. އަދި އަނެއް ބަޔަކު ބަލަނީ ތަނާ ހާލަތަށް ރިއާޔަތްކޮށް އެކަމެއްގައި ކަންކުރެވޭނެ ފަސޭހަ އަދި އެކަމެއްގެ މަގުސަދު ހާސިލްވާނޭ ގޮތަކަށް އެކަމެއް ކުރުމެވެ. މިއީ އިންސާނުންގެ ތެރޭގައި ކަންކަން ކުރުމުގައި އިންސާނުން އަމަލުކުރާ ތަފާތު ގޮތްތަކެކެވެ.

އެންމެނަށްވެސް އެނގޭ އެއްކަމަކީ މި ދިވެހި ރާއްޖޭގައިވެސް ގަވާއިދުތަކާ އުސޫލުތައް ހަދާ ފަރުމާކޮށްފައި ހުންނަނީ ތަނާ ހާލަތަށް ސަމާލުކަމެއް ނުދީކަމެވެ. އެހެނީ އެފަދަ ގަވާއިދުތަކާ އުސޫލުތައް އުފެދިގެން އަންނަނީ ވެރިކަން ކުރާ މާލެއިންނެވެ. އެ މާލޭގެ ހާލަތަށެވެ. އެ މާލޭގެ އޮފީސްތަކާ ތަންތަނުގެ ހާޖަތްތަކަށެވެ. އެފަދަ ގަވާއިދު ތަކާއި އުސޫލުތައް އެހިސާބުން ފާސްވެގެން އަންނަ ކަމީ އެ ގަވާއިދުތަކާއި އުސޫލުތަކުގައި ރަށްފުށުގެ ދިރިއުޅުމާ ކުދިކުދި މުޖުތަމައުތަކުގެ ޖަމާއީ ގުޅުންތަކާ އެ ގަވާއިދުތަކާ އުސޫލުތައް ފުށު އަރާ ކަމެވެ.

އާދޭހެވެ! ހެދިފައިވާ ގަވާއިދު ތަކާއި އުސޫލުތަކަށް ކޮންމެ މީހަކުވެސް ކިޔަމަންގަތުމީ އޮތް ކަމެކެވެ! މާތުރަ، ގަވާއިދެއް ވިޔަސް އުސޫލެއްވިޔަސް، ހަދަންވާނީ ތަނާ ހާލަތާ ގުޅޭ ގޮތަކަށެވެ. އިނގިރޭސި ވިލާތުގައި ހަދާ ގަވާއިދުތަކާއި އުސޫލުތައް މި ރާއްޖޭގައި ތަންފީޒެއް ނުވާނެއެވެ. އަދި މާލޭގައި ހަދާ މި ގަވާއިދުތަކާއި އުސޫލުތައް ރަށްފުށުގެ ދިރިއުޅުމާ ގުޅި ފަލަސްވާނޭ ގޮތަކީވެސް ވާނޭ ކަމެއް ނޫނެވެ.

ކުދިކުދި އާބާދީތަކުގެ ހާލަތަށް ނުފެތޭ މިފަދަ އުސޫލާ ގަވާއިދުތަކުގައި ވަރުގަދަ އަށް ހިފަހައްޓައިގެން ރަށްފުށުގައި ކަންކަން ކުރަން ވުމުން، އެ ރަށްރަށުގެ ރައްޔިތުން ފޫހިވާން ފަށައެވެ. އަދި އެ ކުދިކުދި އާބާދީ ތަކުގެ އިޖްތިމާއީ ކަންކަމާއި އިޖްތިމާއީ ހަރަކާތްތެރިކަން ކުޑަވާން ފަށައެވެ. އެފަދަ ކުދި ކުދި އާބާދީ ތަކުގެ ރައްޔިތުން ބޭނުންވަނީ ތަނާ ހާލަތާއި ގުޅޭ އުސޫލުތަކާއި ގަވާއިދު ތަކެއް ހެދުމެވެ. އެފަދަ ދުވަހެއް މި ރާއްޖެ ދެކޭނެ ބާއޭ ހިތާ ހިތާ ކިޔާލާ ރައްޔިތުން މަދެއް ނޫނެވެ. ބޮޑެތި އާބާދީ ތަކާއި ކުދިކުދި އާބާދީ ތަކަކީ އުޑާއި ބިންހާ ތަފާތު މުޖުތަމައުތަކެކެވެ. އެކަން ގައުމާއި ރަށްރަށުގެ ވެރިންނަށް އިހުސާސް ކުރެވޭނީ ކޮން ދުވަހަކުން ބާވައެވެ.