އިޒްރޭލުގެ ހައްދުފަހަނައެޅި އަސްކަރިއްޔާ އިން ދެމުންގެންދާ ހަމަލާތަކުގައި ހާލުގައި ޖެހިފައިވާ ފަލަސްޠީނުގެ ރައްޔިތުންނަށް އެހީވުމުގެ ގޮތުން މޯލްޑިވްސް ރެޑް ކްރެސެންޓް (އެމްއާރްސީ) އިން ހުޅުވާފައިވާ، "ފަލަސްޠީން ރިލީފް ފަންޑް" އަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން 500،000 (ފަސް ލައްކަ ރުފިޔާ) ހަދިޔާކޮށްފިއެވެ.
މި ފައިސާ އެމްއާރްސީއާ ހަވާލުކޮށްފައިވަނީ މިއަދު އެމްޕީއެލްގެ ހެޑް އޮފީހުގައި ބޭއްވި ރަސްމިއްޔާތެއްގައެވެ.
އެމްޕީއެލްގެ ފަރާތުން މި ފައިސާގެ އެހީގެ ޗެކް، އެމްއާރްސީއާ ހަވާލުކޮށްދެއްވީ މެނޭޖިންގ ޑިރެކްޓަރ ޝާހިދު އަލީ އެވެ. އަދި އެމްއާރްސީގެ ފަރާތުން ޗެކާ ހަވާލުވެލެއްވީ، އެމްއާރްސީގެ ސެކްރެޓަރީ ޖެނެރަލް ފާތިމަތު ހިމްޔާ އެވެ.
މިއީ ފަލަސްޠީނު ރެޑް ކްރެސެންޓް (ޕީއާރުސީއެސް) އިން ކުރަމުންދާ މަސައްކަތްތަކަށް އެހީތެރިވުމުގެ ގޮތުން ފައިސާ ހަދިޔާ ކުރުމަށް އެމްއާރްސީ އިން ހުޅުވާލައިފައިވާ ފަންޑެކެވެ.
އެމްއާރްސީގެ ފަންޑް ހުޅުވާލާފައިވަނީ މި މަހުގެ 14 އިން ފެށިގެން އަންނަ ނޮވެންބަރު މަހުގެ 12 ވަނަ ދުވަހުގެ ނިޔަލަށެވެ.