ސޯޝަލް މީޑިޔާގައި މީހުނަށް ފުރައްސާރަކުރުމަށް ހިންގާ ބައެއް ޕޭޖް ނުވަތަ ގްރޫޕްތަކުން ފެތުރޭ ވަރަށް ހިތާމަވެރި އެއް ކަމެއްވެއެވެ. އެއީ މީސްމީހުންގެ ދެމެދު ހިނގާފައި ހުންނަ ޒާތީ މުޢާމަލާތްތަކެވެ. މެސެޖްގެ ސްކްރީންޝޮޓްތަކުގެ އިތުރުން ބައެއް ފަހަރު ކޯލް ރެކޯޑިންގ ވެސް ހުރެއެވެ. މިފަދަ މެސެޖްތަކުގައި އެންމެ އާންމުކޮށް ފެންނަނީ އަންހެން ކަނބަލުން ނުދަންނަ މީސްމީހުނަށް މެސެޖްކޮށް އެމީހުންގެ ފޯނަށް ލާރި އަޅާދިނުމަށް އެދިފައިވާ މެސެޖްތަކެވެ. ބަދަލުގައި އެކަނބަލުންގެ ޢިއްފަތްތެރިކަން ހިބަކޮށްދިނުމަށް އަމިއްލައަށް ހުށައަޅާފައިހުރެއެވެ. ދީނީ އަދި ދުނިޔަވީ ގޮތުން ބެލިނަމަވެސް ހިތާމައިގެ ކޮޅެއްނެތެވެ. މިއީ މުޖުތަމަޢު ބަދަލުވަމުންދާ މިޞްރާބުގެ ނުރައްކާތެރި ކަމުގެ ރަނގަބީލެކެވެ.

ނަމަވެސް މިކަން މިހެން ހިނގަންޖެހޭ ސަބަބެއް ވިސްނުމަކަށް ނާދެއެވެ. އޮފީސްތަކުގެ ރިސެޕްޝަންތަކުން ފެށިގެން ފިއުލް ޝެޑްތަކުގައިވެސް ކަނބަލުން ވަޒީފާއަދާ ކުރަނީއެވެ. ކުންފުނިތަކުގެ އެންމެ މަތީފެންވަރުގައިވެސް އަންހެންކަނބަލުން ތިބެއެވެ. އަންހެނުނަށްވީތީ އެކަނބަލުން ނުކޮށްދޫކޮށްލާ އެއްވެސް މަސައްކަތެއް ނެތެވެ. އިންޖިނިއަރިންގެ ވަޒީފާތަކުންފެށިގެން ލޯންޗް ކެޕްޓަން ކަމުގައިވެސް އަންހެން ކަނބަލުންނެވެ. އެހެންވިއްޔާ ގައިމު އެވަޒީފާތަކަށް މުސާރަވެސް ދޭނެތާއެވެ.

ގޭގޭގައި ކުދިން ބައިތިއްބާ ބައެއް އާއިލާތަކުން މައުލޫމާތު އަހާލުމުން އެނގުނީ އެގޭގޭގައި ފިރިހެން ކުދިން ބައިތިއްބާ އަގަށްވުރެ އަންހެން ކުދިން ބައިތިއްބާ އަގު ކުޑަކަމެވެ. ސަބަބަކީ ގޭތެރޭގެ މަސައްކަތްތަކުގައި ކޮންމެވެސް ވަރަކަށް އަތްގާތް ކޮށްލައިދޭނެކަމުގެ އުއްމީދު އޮތުމެވެ. އެކަން އެހެން އެހެން ނުވި ނަމަވެސް ގައިމުވެސް އަންހެން ކުދިންގެ އަންނައުނު ދޮވެ އިސްތިރިކޮށްދިނުމަކީ ގޭގޭގައި ކޮށްދޭކަމެއް ނޫނެވެ. ފިރިހެން ކުދިން ބައިތިއްބާ އަގު ބޮޑުވަނީ އެކަންކަން ކޮށްދޭން ޖެހޭތީއެވެ. އަންހެން ކުދިންނަށް އެކޮމޮޑޭޝަނުންވެސް ޑިސްކައުންޓް ލިބުނީއެވެ.

ދެ ޖިންސުގެ މީހުންގެ އަންނައުނު ވިއްކާ ފިހާރައަކަށް ވަދެލާށެވެ. އަންހެން ކުއްޖެއްގެ ޖިންސެއް ނުވަތަ ޓޮޕެއް ވިއްކާއަގުގެ ދެގުނަ އާ ގާތަށް ނޫނީ ފިރިހެން ކުއްޖެއްގެ ޖިންސެއް ނޫނީ ގަމީހެއްގެ އަގު ނުހުންނާނެއެވެ. ފައިވާނަކަށް ނުވަތަ ބޫޓަކަށް ބެލިނަމަވެސް ހަމަ އެފަދަ އެވެ. މިގޮތަށް ބަލާނަމަ އަންހެން ކުދިންގެ އަންނައުނަށް ޚަރަދުވާވަރު މަދު ކަމަށް ބެލިދާނެއެވެ.

ދެން އޮތީ ދަތުރުފަތުރެވެ. މާލެއާއި އަތޮޅުތަކަށް ބެލިނަމަވެސް އެއްގަމު އުޅަނދުގައި އުޅޭ ކަނބަލުންގެ އަދަދު ފިރިހެނުންނަށްވުރެ މަދެވެ. އެހެންކަމުން އަންހެންކުދިން ކޮންމެހެން ދާންޖެހޭ ތަންތަނަށް ގެންގޮސްދިނުމަށް އާއިލާގެ މެމްބަރަކު ނުވަތަ ރައްޓެއްސަކު އާދެއެވެ. އެ އުޅަނދުގެ ޕެޓްރޯލާއި މަރާމާތުގެ ޚަރަދު ބަލަހައްޓާނީ ގިނަ ފަހަރަށް އުޅަނދުގެ ވެރި ފަރާތުންނެވެ. ދަތުރުފަތުރުން ވެސް މިއޮތީ ޚަރަދު ކުޑަވެފައެވެ.

ކެފޭތަކަށް ނަޒަރު ހިންގާލަމާހެވެ. ކޮފީމޭޒުތަކަށް އަންނަ ބިލްތައް ދެއްކުމަށް އަންހެނުންގެ ވޮލެޓް ނަގާތަން ފެންނަ އަދަދު ފިރިހެނުންނަށްވުރެ މަދެވެ.

މަތީގައި ބަލާލެވުނު ކަންކަމުން އެނގެނީ އަންހެނުންގެ ޚަރަދު ފިރިހެނުންނަށްވުރެ ކުޑަކަމެވެ. ނަމަވެސް އެއްބަސްވާން ޖެހޭ އެއް ކަމެއް ވެއެވެ. ގިނަ އަންހެން ކުދިންނަކީ މޭކަޕާއި ނުލާ ނުއުޅެވޭކުދިންނެވެ. އެހެންކަމުން ފިރިހެނުން ނުކުރާ ޚަރަދު އަންހެނުންގެ މޭކަޕް ސާމާނު ގަތުމަށާއި ސެލޫންތަކަށް ދިއުމަށް ހޭދަކުރާނެއެވެ.

މިކަންކަން މިހެން ހުރިނަމަވެސް ފޯނަށް އަޅާދޭ 100 ރުފިޔާގެ ބަދަލުގައި ޖިސްމު ވިއްކާލަން ދިވެހި ބައެއް ކަނބަލުންނަށް މަޖުބޫރުވަނީ ކީއްވެގެންކަން މިއީ ހަމަ އަރަތެކެވެ. އެންމެ ފުރަތަމަ ކަމަކަށް ނުދަންނަ މީސްމީހުން ނުވަތަ ކިރިޔާ ދެކެފަރިތަ މީހުން ކާރިން ކަންކަމު އެދެން ޖެހުމަކީ ހަމަ ކޮންމެ މީހަކުމެ ޖެހިލުންވާނޭކަމެކެވެ. ދެވަނަ ކަމަކަށް ތިމާގެ ޢިއްފަތް ވިއްކާލަން އެހާ ފަސޭހައިން ރުހެވެނީ ކޮންފަދަ މަޖުބޫރުކަމެއް އޮވެގެންބާއެވެ. އޭގެ ބަދަލުގައި ގޭގައި ބޭނުންކޮށްފައި ހުންނަ ކޮންމެވެސް އެއްޗެއް ވިއްކާލުމުންވެސް ފައިސާހޯދެން އެބައޮތެވެ. އަދާކުރާނެ ތަފާތު ވަޒީފާތައް ބައިވަރެވެ. ގޭގައި ހުރެގެން ކުރޭވެ އެތައް މަސައްކަތެއް ފަހިވެފައި ހުރެއެވެ.

މިކަމާމެދު އިތުރަށް ބަލާލުމުން ޔަގީންވި އެއް ކަމެއް ވެއެވެ. ވަރަށް ގިނަފަހަރަށް އަންހެންކުދިންގެ ނަމުގައި މެސެޖްކޮށްގެން ފައިސާ ހޯދަނީ ފިރިހެނުންނެވެ. ފިރިހެނެއްގެ ނަމުގައި މެސެޖްކޮށްފިނަމަ އެކަމަށް އިޖާބަދޭނީ މަދު މީހެކެވެ. އެހެންކަމުން އަންހެންކުދިންގެ ނަމުގައި ފޭކް އެކައުންޓްތައް ހަދައިގެން ކުޑަދުވަސްކޮޅަކު ވާހަކަ ދެއްކުމަށްފަހު ފިރިހެނުންގެ އިތުބާރު ލިބުމުން ފައިސާއަށް އެދި އެފައިސާ ލިބުމުން ނަންބަރު ބްލޮކް ކުރުމަކީ ވެސް ހިނގާ ކަމެކެވެ. ހައްގުން ކަމަކާނުލާ އަންހެންކުދިން ބަދުނާމްކުރުމުގެ ގޮތުންނާއި، ޒާތީ ހަސަދައެއްގެ ސަބަބުން ވެސް އަންހެން ކުދިންގެ ނަމާއި އެކުދިންގެ ފޮޓޯ މިފަދަ ކަންކަމަށް ފިރިހެނުން ބޭނުންކުރެއެވެ. މެސެޖް ލިބޭ މީހާވެސް މިކަމަށް ހޭލުންތެރިވާން ޖެހެއެވެ. އަދި އަންހެން ކަނބަލުންގެ ފޮޓޯއާއި އެކު ހުންނަ މިފަދަ ސްކރީންޝޮޓްތައް މީސްމީޑިޔާއަށް ލާއިރު އެފަރާތްތަކުންވެސް ސަމާލުވާންޖެހެއެވެ. ނީލަން ކިޔާލެވެނީ އަބުރުވެރި ކަނބަލެއްގެ އިއްޒަތެވެ. މިހެން ފެންނަ ސްކްރީންޝޮޓް ތަކަކީ ހަގީގަތްކަމަށް ގަބޫލުކުރާނެ ބަޔަކުވެސް އުޅެއެވެ.