އެމްޓީސީސީގެ "ކަށަވަރު ޕްރޮމޯ 2023" މިއަދު އިފްތިތާޙުކޮށްފިއެވެ.
މި ޕްރޮމޯޝަން އިފްތިތާޙުކުރުމުގެ ގޮތުން މިއަދު ކަށަވަރު ޝޯރޫމްގައި ބޭއްވި ރަސްމިއްޔާތުގައި އެމްޓީސީސީގެ ޗީފް އެގްޒެކެޓިވް އޮފިސަރ އަލްފާޟިލް އާދަމް އާޒިމް އާއި އެ ކުންފުނީގެ އިސްވެރިން ބައިވެރިވެވަޑައިގެންނެވިއެވެ.
އެމްޓީސީސީ އިން ބުނީ، މި ޕްރޮމޯޝަންގެ މަޤްސަދަކީ ކަސްޓަމަރުންނަށް ޑިސްކައުންޓާއެކު އެ ކުންފުނީގެ ޕްރޮޑަކްޓްތައް ވިއްކުން ކަމަށެވެ. އެގޮތުން، މި ޕްރޮމޯޝަންގެ ދަށުން ޑިސްކައުންޓް ދެވޭ ޕްރޮޑަކްޓްތަކަކީ ސުޒުކީ އަދި ޔަންމާ އިންޖީނާއި، ސްޓަރން އައިޓަމްސް، ސްކޮޓް ބޭޑަރ ރެސިން، ސްކޮޓް ބޭޑަރ ޖެލްކޯޓްސް އަދި ޕިގްމެންޓްސް، ޔަންމާ ޖެންސެޓްސް، ސްޕެއާރ ޕާޓްސް، އެކްސެސަރީޒް އާއި އިންޑަސްޓްރިއަލް ގޭހާއި، މެރޯލް އަދި ލުބްރިކަންޓްސް އެވެ.
މި ޕްރޮމޯގެ މުއްދަތުގައި ކުރައްވާ ކޮންމެ 5،000 ރ. ވިޔަފާރިއަކަށް ކޫޕަނެއް ލިބޭނެކަމަށާއި، އަދި ޕްރޮމޯ ނިންމާލަމުން ނެގޭ ގުރުއަތުން ހޮވޭ ފަރާތަކަށް ސުޒުކީ 175 ހޯސްޕަވަރުގެ އިންޖީނެއް ލިބޭނެ ކަމަށް އެމްޓީސީސީ އިން ވަނީ ބުނެފައެވެ.
އެމްޓީސީސީ އިން ބުނީ، "ކަށަވަރު ޕްރޮމޯ 2023" އަމާޒުކޮށްފައިވަނީ އޮޑިވެރިންނާއި، މަސްވެރިންނާއި، އިންޖިނޭރުންނާއި، ފަތުރުވެރިކަމާއި އަދި ޓްރާންސްޕޯޓް ދާއިރާގައި މަސައްކަތް ކުރައްވާ ފަރާތްތަކަށް ކަމަށެވެ.
އަދި، މި ޕްރޮމޯޝަންގެ މުއްދަތުގައި ރޭވިފައިވާ އިތުރު ހަރަކާތްތަކުގެ ތެރޭގައި، މާލޭ ބަނދަރު ސަރަޙައްދު، ހުޅުމާލޭ ބަނދަރު ސަރަޙައްދު، ތިލަފުށީ ޑޮކްޔާރޑް އަދި ސައިޓް، ރ. އަލިފުށި، ރ. ވާދޫ، ތ. ހިރިލަންދޫ، ތ. ތިމަރަފުށި، ތ. ދިޔަމިގިލި، ދ. ކުޑަހުވަދޫ، ކ. މާފުށި، ކ. ގުޅި އަދި ޏ. ފުވައްމުލަކުގައި އައުޓްޑޯ އިވެންޓް ބޭއްވުމާއި މި ތަންތަނަށް ޒިޔާރަތްކުރުން ހިމެނޭ ކަމަށް ވެސް އެމްޓީސީސީ އިން ބުންޏެވެ.
އެމްޓީސީސީގެ އަމާޒަކީ އަބަދުވެސް ކަސްޓަމަރުންނަށް ލުއި ފަސޭހަ ގޮތްތަކެއް ހޯދައިދިނުމެވެ. އެގޮތުން، ކޮންމެ އަހަރަކުވެސް އެކިއެކި ޕްރޮޑަކްޓްތަކުން ކަސްޓަމަރުންނަށް ލުއި ފަސޭހަ ޕްރޮމޯޝަންތައް ބޭއްވުމާއި، ރާއްޖޭގެ އެކި ކަންކޮޅުތަކުގައި ތިބި އެ ކުންފުނީގެ ކަސްޓަމަރުންނަށް މަޢުލޫމާތު ފޯރުކޮށްދިނުމުގެ އިތުރުން، އިންޖީނުތައް ރަނގަޅަށް ބެލެހެއްޓުމާއި، ޓެކްނިކަލް ކަންކަމަށް އަހުލުވެރި ކުރުމުގެ ހަރަކާތްތައް އަބަދުވެސް ރާވާ ހިންގަމުން ގެންދެއެވެ.
"ކަށަވަރު ޕްރޮމޯ 2023" ކުރިއަށްދާނީ މިއަދުން ފެށިގެން އަންނަ ޑިސެންބަރު މަހުގެ 31 ގެ ނިޔަލަށެވެ.