ގޭގެ ސިޓިންރޫމްގައި ހުރި ޓީވީން އަޅުވާފައިހުރީ ރައްޔިތުންގެ މަޖިލީހުގެ ޖަލްސާއެވެ. ވަގުތުން ދައްކަމުން ދިޔަ ޖަލްސާއެކެވެ. ކުރިޔަށްދަނީ މީހުން ދިރިއުޅޭ ރަށްރަށުގައި ބަނގުރާ ވިއްކުމާ ބެހޭ ގޮތުން ބަހުސް ކުރުމެވެ. އެއްބަޔަކު އެއީ މައްސަލައެއް ނޫންކަމުގައި ދެއްކެން ހުރި ހެއްކެއް ދައްކައިގެން އަޑުންއަޑުނަގައި ޖޯޝާއި ފޯރީގައި ވާހަކަ ދައްކަމުން ދިޔައިރު އޭގެ ރައްދުގައި ވަކާލާތު ކުރާ މެމްބަރުންވެސް އެހާ ފޯރީގައި ރައްދު ދެމުން ދިޔައެވެ. ބައެއް މެމްބަރުންނަށް ކިޔޭ ނުކިޔޭ އެއްޗެއްވެސް ނޭނގޭ ފަހަރު ދާހެން ހީވެއެވެ.

ޖަމްޝީދުއިނީ ކައިގެން އައިސް ރަނގަޅަށް ދުފާލާށެވެ. ފަހަރަކު ފޯއްފޮއްޗެއް އަނގަޔަށްލަމުން ދިޔައިރު ކައިރީގައި ޖަމްޝީދުގެ ފަންސަވީސް އަހަރަށްދާ މުހައިމިން އިނީ އެއްފަހަރު ޓީވީއަށް އަނެއްފަހަރު ޖަމްޝީދަށް ބަލައިލަ ބަލައިލައެވެ. އެހެން ނުވާންވީ ސަބަބެއްނެތެވެ. ވަގުތަކީ މުހައިމިން ގަވާއިދުން ބަލާ ރެސްލިން އެހެން ޗެނެލްއަކުން އަންނަ ވަގުތެވެ. ކުރިމަތީގައި ހުރި ކުޑަ މޭޒުމަތީގައި ޓީވީގެ ކަޅުކުލައިގެ ރިމޯޓް އަތްލާނޭ މީހަކު ނެތިފައި އޮތެއްކަމަކު އެ ރިމޯޓުގައި އަތްލާކަށް މުހައިމިނަކަށް ލާހިކުނޫންކަން އެނގޭތީއެވެ. ޗެނެލް ބަދަލުކޮށްލުމުގެ ހުއްދައަށް އެދެންވެސް ޖެހިލުންވާތީއެވެ. ބައްޕަގެ ގޮތް މުހައިމިނަށް އެނގޭތީއެވެ.

ޖަމްޝީދު މިއަދު އެގޭގައި އިނީ ދޮށީ އަނބި ޝިއުނާ ބުނެގެން އައިހެވެ. ޖަމްޝީދަކީ މާލޭގައި ނަން މަޝްހޫރު ވިޔަފާރިވެރިއެކެވެ. ނަމަވެސް އެ ވިޔަފާރިތަކާ މުއްސަނދިކަމަކީ ޖަމްޝީދުގެ މޮޅުކަމަކުން އަދި ކުޅަދާނަ ކަމަކުން ލިބިފައިހުރި ތަނަވަސްކަމެއް ނޫނެވެ. އެއީ ޝިއުނާގެ ފަރާތުން ލިބިފައިހުރި ތަނަވަސްކަމެކެވެ. ޝިއުނާ އަކީ މާލޭގެ މުއްސަނދި ވިޔަފާރިވެރިއަކު ހުރި ހަމައެކަނި ދަރިފުޅުކަމުން ދެތިން އިމާރާތެއް މިހާރުވެސް ޝިއުނާގެ އަމިއްލަ ނަމުގައި ކުއްޔަށް ދެވިފައި އެބަ ހުއްޓެވެ. ލޯބިން އެތައް ދުވަހަކު އުޅުމަށްފަހު ޝިއުނާއާ ޖަމްޝީދު ކައިވެނި ކުރުމުން ޝިއުނާގެ އެދުމުގެ މަތިން ވިޔަފާރިތައް ފަށައި ފަހުން އެ ވިޔަފާރިތައް ރާއްޖޭގެ ނަން މަޝްހޫރު މަރުކާތަކަކަށް ވެގެން ދިޔުމުން އެހެން މުއްސަނދިންނަށްވެސް ޖެހޭ ހާލު ޖަމްޝީދަށް ޖެހުނީއެވެ. ރީތި ޒުވާން އަންހެނެއްގެ އަވާގައި ޖެހި ދެ އަނތްބަށް ކައިވެނި ކުރިތާ އަދި މިވީ ދެ އަހަރެވެ. ވިޔަފާރި ކުރުމުގައި ބޭންކްތަކުން ލޯނު ނެގުމުގެ ބަދަލުގައި އެއިރަކު ބޭނުމެއް ޖެހުމުން ޝިއުނާ ހޯދަން ގެއަށް އަންނަނީއެވެ. އެހެން ނޫންނަމަ މުޅިންވެސް ޖަމްޝީދު އުޅެނީ ހަގު އަނބި ގޭގައެވެ. ހުންނަ ހަމައެކަނި ދަރިފުޅު މުހައިމިނަކަށްވެސް މާބޮޑު އަޅާލުމެއް ނޯވެއެވެ. އަނގައިން ބުނިއްޔާ ނޫނީ ވާހަކަވެސް ނުދައްކައެވެ. ޝިއުނާ ހާސްބައި ތަފާތެވެ. ކޮންމެ ފަދަ ގޮތަކަށް ޖަމްޝީދު ކަންތައް ކުރަމުން އައި ނަމަވެސް ޖަމްޝީދަށްޓަކައި ޝިއުނާ ކޮންމެފަދަ ކަމެއްވެސް ކޮށްފާނެއެވެ. ޖަމްޝީދަކީ ޝިއުނާގެ އަލަތު ލޯތްބެއެވެ. ޝިއުނާގެ ހުންނަ ދީންވެރިކަމުގެ ސަބަބުން ދެވަނަ ކައިވެންޏަކަށް ޖަމްޝީދު އެދުމުން އެއްވެސް އުޒުރެއް ނުދައްކާ އެކަމަށް އެއްބަސްވީއެވެ.

މުހައިމަނަށް ހުރިހާ މުއްސަނދިކަމެއް ލިބިފައިވީ ނަމަވެސް ނުލިބެނީ ބައްޕައެއްގެ ލޯތްބެވެ. އެންމެ ކުޑައިރުންފެށިގެން މިހާތަނަށް މުހައިމިނާ ޖަމްޝީދުއާ ދެމެދު ލެވިފައިވާ ފާރަކީ އުސް އަދި ފުޅާ ފާރެކެވެ. ޝިއުނާ އަޅުކަމުގައި ވަގުތު ހޭދަކޮށް އެކަމަށް މުހައިމިނަށް ކިތަންމެ ނަޞޭހަތް ދިން ނަމަވެސް އެކަމަކަށް މުހައިމިން ފަރުވާލެއް ނުބަހައްޓައެވެ. ނަމާދު ކުރަން ކިތަންމެ ވަރަކަށް ހަނދާން ކޮށްދިން ނަމަވެސް ޤިބުލައަށް ކުރިމަތިލީ ދުވަހެއް މުހައިމިނަކަށް ނޭނގެއެވެ. އޭގެ ބަދަލުގައި މުހައިމިނު ގެއްލި ހުސްވެފައިވަނީ މަސްތުވާތަކެތީގެ ވިޔަފާރިއަށެވެ. މަސްތުވާ އެއްވެސް އެއްޗެއް މިހާތަނަށް ބޭނުން ނުކުރިނަމަވެސް އެ ވިޔަފާރީގައި މުހައިމިނަކީ 'ޑޮން' އެކެވެ. ސިއްރިއްޔާތުގައި އެކަން އޭނާ ކުރާތާ ފަސްވަރަކަށް އަހަރުވެފައިވާއިރު އެކަމުގެ ހިލަމެއްވެސް ޖަމްޝީދަށާއި ޝިއުނާއަށް ނުވެއެވެ. ޝައްކު ކުރާނޭ ޖާގަވެސް މުހައިމިނު ނުދެއެވެ. ހޯދާ އަގުބޮޑު އެއްޗިއްސަކީ ބައްޕަ ދޭ ހަދިޔާކަމުގައި ޝިއުނާ ދެކެއެވެ. ފައިސާ ހޯދަން ނުބުނަނީވެސް އެހެންވެ ކަމަށް ޝިއުނާ ދެކެއެވެ. މުހައިމިނަށް ޝިއުނާ އަބަދުވެސް ނަޞޭހަތް ދެނީ ނުލާހިކު ލޯބިންނެވެ. ދުވަހަކުވެސް ބާރަށް އެއްޗެއް ނުބުނެއެވެ. މުހައިމިނުގެ އެއްވެސް ރައްޓެއްސެއް ގެއަކަށް ނުގެނެއެވެ. އެއީވެސް މަންމައަށް ޝައްކުވެދާނެތީއެވެ. ޝިއުނާއަކީ މުހުތާދެއް އޮވެގެން ނޫން ގޮތަކަށް ބޭރަށް ނުކުންނަ މީހެއް ނޫނެވެ.

ޝިއުނާ ނުކުމެ ޗެކެއް ދިއްކޮށްލުމުން ޖަމްޝީދު އޭގައި ހިފިއެވެ. އަދި ދަނީއޭ ބުނެ މުހައިމިނު އިންކަންވެސް ނޭނގޭ ހާލު ނުކުމެގެން ދިޔައީއެވެ. ޖަމްޝީދު ނުކުމެގެން ދިޔުމާއެކު ރިމޯޓް ނަގައި ޗެނަލް ބަދަލު ކޮށްލިއެވެ. ރެސްލިން މެޗަށެވެ. އަދިވެސް ނަމާދު ނުކުރަންހޭ ޝިއުނާ ބުނުމުން އެކަމަކަށް އެއްވެސް ސަމާލުކަމެއް މުހައިމިނު ނުދީ އެއިން ގޮތަށް އިނީއެވެ. ޝިއުނާ މިލާ މޯޅިވެފައިވާ މީހެއް ފަދައިން އިތުރު ބަހެއް ނުބުނެ ދިޔައީ ކޮޓަރިއަށެވެ. ކޮންމެ ދުވަހެއްގެ އާދައިގެ މަތިންނެވެ.

ޝިއުނާ ދިޔުމާއެކު ފޯނު ނަގައި މެސެޖްތައް ބަލަން ފެށިއެވެ. އަދި ނަމްބަރެއް ޖަހައި ގުޅާލިއެވެ. ނަމަވެސް ފޯނެއް ނުނެގިއެވެ. އެގޮތަށް އެތައް ފަހަރަކު ގުޅަމުން ދިޔައެވެ. ދޭތެރެއަކުން މެސެޖެއް ކޮށްލައެވެ. އޭސީ ތޭވީހުގައި ހުރިއިރުވެސް މުހައިމިނުގެ މޫނުމަތިން ދާހިތްލުމުގެ އަސަރު ފެންނާން ހުއްޓެވެ. ހާސްކަމާއި ކަންބޮޑުވުން ފެންނަނީ އިންތިހާއަށެވެ. މުހައިމިންމެންގެ ބަހުންނަމަ "ޕީސް" ކޮޅަކަށް "ދޯކާ"އެއް ދިނީއެވެ. އެވެސް މުހައިމިނު އެންމެ އަރިހުގައި ގެންގުޅޭ އެކަކެވެ. ގުޅީމާ ފޯނެއްވެސް ނުނަގައެވެ. މެސެޖަކަށް ރިޕްލައިއެއްވެސް ނުކުރެއެވެ. މުހައިމިނު ވިސްނަމުން ދިޔައީ އެކަމަށް ހެދޭނެ ގޮތަކަށެވެ. "ޕީސްކޮޅު" ވިއްކާލާފައި އެމީހަކު ފިލީއެވެ. ލިބެންވާ ފައިސާގެ އަދަދު ލައްކައިން ގުނޭތީ އެކަމާ މުހައިމިނު ސިކުނޑި ސުމަކަށް ދަނީއެވެ. ޓީވީން ދައްކަމުންދިޔަ ރެސްލިން މެޗު އަޅުވާފައި ހުރިކަން އެކަންޏެވެ.

"އޭ ބުރޯ.. އެއްކަލަ ގޮލާ އެބަހުރި ފުރަން އެއާޕޯޓަށް ގޮސް. މިކަމާ އަވަހަށް އުޅެގެން ކަމެއްވާނީ. އޭނަ ހިއެއްނުވޭ ދެން ރާއްޖެ އަންނާނެހެން" މުހައިމިނަށް ގުޅީ މުހައިމިނުގެ އެއް އަތް ކަމަށްވާ ފައިސަލްއެވެ. މުހައިމިނާ ފައިސަލް ވެގެން ނަޖާހު ހޯދުމަށް ލައްކަ މަސައްކަތްވަނީ ކޮށްފައެވެ. ރުފިޔާގެ އަދަދު ބޮޑުކަމުންނެވެ. ކަމުގެ ބާވަތުން ފާޅުކަން ބޮޑު ގޮތެއްގައި އެކަން ކުރެވެން ނޯންނާތީއެވެ. އިތުރަށް އެއްވެސް އެއްޗެއް ނުބުނެ މުހައިމިނު ނިކުމެ ސައިކަލަށް އަރާ ދުއްވާލިއެވެ. ހެލްމެޓް ހެޔޮވަރު ކޮށްލަމުންނެވެ. އައިސްފައި ހުރި ރުޅީގެ ސަބަބުން ހަޔާތުގައި ފުރަތަމަ ފަހަރަށް މަސްތުވާތަކެތި ބޭނުން ކޮށްގެންހުރެއެވެ.

އެއަރޕޯޓުގެ ކައިރިއަށް ދެވުނުއިރު ބޭރުގައި ފައިސަލްވެސް ހުއްޓެވެ. އިތުރު މީހަކާއެކުއެވެ. ދެމީހުންވެސް ތިބީ ހެލްމެޓް އަތުން ހިފައިގެންނެވެ. މުހައިމިން ފެނުމާއެކު އަތުން އިޝާރާތް ކޮށްލިއެވެ. މަރިޔާދް ޑޮމެސްޓިކްގެ މޭޒެއް ކައިރީގައި ފުރަގަސްދީގެން އިން ފިރިހެނެކެވެ. ފަހަތުން ފެނުމާއެކު ލައިގެން ހުރި ޓީސާޓުގެ ކުލައިން އެއީ މީގެ ކުޑަ އިރުކޮޅެއް ކުރިން ފައިސަލް ކުރި މެސެޖްގައިވާ ސިފަތައް ހުރި ނަޖާހްކަން މުހައިމިނަށް އެނގުނެވެ. ބަލާކަށް ނުހުރެ އެ ދިމާއަށް ހިނގަން ފެށިއެވެ. ފައިސަލްމެންވެސް މުހައިމިނާއެކު އެދިމާއަށް ދުއްވައިގަތެވެ. ވަށައިގެންވާ އެއްވެސް ކަމަކަށް ޚިޔާލެއް ފިކުރެއްނެތި އެ ދިޔަ ބާރުމިނުގައި ފަހަތުން ނަޖާހުގެ ކަރަށް ވަޅިން ހަމަލާދޭން ފެށިއެވެ. ކައިރީ ތިބި އެންމެން ބިރުން ކޮޅުކޮޅަށް ދުވަން ފަށައިފިއެވެ. އަޑުގަދަ ކުރަމުންނެވެ. މުހައިމިނާއެކު ފައިސަލްމެން ނަޖާހަށް ހަމަލާދެމުން ދިޔައެވެ. ބިންމައްޗަށް ބަންޑުން ވައްޓާލައި ގައިގެ އެތައް މިތަނަށް ވަޅިން ހަމަލާ ދިނުމަށްފަހު އަވަސް އަވަހަށް ސައިކަލަށް އަރާ ނައްޓާލިއެވެ. ފުލުހުން އެތަނަށް އައުމުގެ ކުރިންނެވެ.

މެންދުރުފަހު ގެއިން ނުކުމުގެން ދިޔަ ގޮތަށް މުހައިމިނުގެ ޚަބަރެއް ނުވާތީ ކަންބޮޑުވެފައި އެތައް އިރަކު ސިޓިންގރޫމުގައި ޝިއުނާ އިނުމަށްފަހު ކޮޓަރިއަށް ނިދަންވަނީ ތާއްޔާ ޖެހެން ފެށުމުންނެވެ. އޭރު ގަޑިން މެންދަންވަނީއެވެ. ގެންގުޅުނު ޙަތިމުވެސް، އައިސްފައި ހުރި ނިދީގެ ސަބަބުން ހަނދާންނެތި ސޯފާމަތީގައި ބޭއްވުމަށްފަހުއެވެ.

"މުހައިމިނު.... މުހައިމިނު..... ދޮރު ހުޅުވަބަލަ.... މުހައިމިނު....." މުހައިމިނަށް ހެނދުނު ހޭލެވުނީ ކޮޓަރި ދޮރުގައި މީހަކު ބާރުބާރަށް ތަޅާފައި ގޮވާ އަޑަށެވެ. ލޯ އުނގުޅަމުން ވަރަށް ހާލުން ތެދުވެގެން ގޮސް ދޮރުހުޅުވާލިއެވެ. ކުރިމަތީ ހުރީ މުހައިމިނުގެ ބައްޕައެވެ. މިއިން ދުވަހަކު އެގޮތަށް ހެނދުނު ބައްޕަ ގޮވި ހަނދާނެއް މުހައިމިނު ނުވެއެވެ. ޖަމްޝީދުގެ މޫނު ފެނުމާއެކު ކަމެއް ގޯސްވެގެން އުޅޭކަން އެނގުނެވެ. މޫނުވަނީ ރަތްވެފައެވެ. ދެލޯ ހުރީ ދުޅަވެފައެވެ. ލޮލުން ކަރުނަ ފައިބަނީ ހުއްޓުމެއްނެތިއެވެ. "ދަރިފުޅާ.... ދަރިފުޅާ... މަންމަ... މަންމަ ދުނިޔެއަކު ނެތް"

ޖަމްޝީދުގެ އެ ޖުމްލައިން މުހައިމިން އެކަށް ގަނޑު ކޮށްލިއެވެ. ހީވީ ފައިދަށުން ބިންގަނޑު ދަމައިގަތްހެނެވެ. މުހައިމިނު އެ ހުރިގޮތަށް ދުއްވައިގަތެވެ. ޖެހިގެން ހުރި ކޮޓަރިއަށެވެ. އެނދުމަތީގައި ހަރަކާތް ހުއްޓިފައިވާ ޝިއުނާ ފެނުމާއެކު މުހައިމިނު ހުރިތަނަށް ތިރިވެއްޖެއެވެ. ބާރަށް ރޯން ފެށިއެވެ. މަންމާއޭ ކިޔާ އަޑުން އަޑުނަގާ ރޮމުން ދިޔައެވެ. ޖަމްޝީދު އައިސް މުހައިމިނުގެ ކޮނޑުގައި ހިފާ ކޮޅަށް ނެގިއެވެ. އަދި ޝިއުނާ ކައިރިއަށް ގެންގޮސް އެނދުމަތީގައި ބޭންދިއެވެ. އޭރު ޑޮކްޓަރު ގެނައި ސާމާނު ހިފައިގެން ނުކުމެގެންދަނީއެވެ. ޝިއުނާގެ މަރަކީ ކުއްލި މަރެއްކަމަށް ޑޮކްޓަރު ބުންޏެވެ. އަދި އަވަހަށް ކަށުކަމާކެމީގެ ކަންކަން ކުރުމަށް ނަޞޭހަތް ދެމުންނެވެ.

މެންދުރުނަމާދަށްފަހު ޝިއުނާ ވަޅުލުމަށް އާސަހަރާއަށް ގެންދެވުނެވެ. މުހައިމިނާ ޖަމްޝީދުގެ އިތުރުން ދެ އާއިލާއާ ގިނަ އަދަދެއްގެ ރައްޓެހިން ޖަމާވެފައިވެއެވެ. ކަން ދިމާކުރި ގޮތުން އެ ވަގުތަކީ  އިއްޔެ އަނިޔާވެރި ގޮތަކަށް މަރާލެވުނު ޒުވާނާގެ ޖަނާޒާވެސް ކުރިޔަށް ދިޔަ ވަގުތެވެ. މުހައިމިނަށް އެކަން އެނގުނީ ދެމީހަކު ދެއްކި ވާހަކައަކުންނެވެ. އެއީ ކާކުކަންވެސް އެނގުނީ އެމީހުންގެ ވާހަކައިންނެވެ. މުހައިމިނަށް ހީވީ ހަތަރު އުދަރެސް ފެނުޖެހުނު ހެނެވެ. ކުރިމަތީގައި ބަނޑުއަޅާވިހޭ މައިމީހާ ކުއްލި މަރަކުން މި ދުނިޔެ ދޫކޮށް ޖަނާޒާ ކުރިޔަށްދާއިރު ކައިރީގައި ޖެހިގެން ކުރިޔަށް އެ ދަނީ މުހައިމިނުގެ އަތުން ނިޔާވި ޒުވާނާގެ ޖަނާޒާއެވެ. މުހައިމިނުގެ ހިތުގައި ބިރުވެރިކަން އެފެދުނީ މަރާލެވުނީ ކާކުކަން އެނގުމުންނެވެ. އެއީ މުހައިމިނު ބޭނުންވި ނަޖާހެއް ނޫނެވެ. ލައިގެންހުރި ޓީޝާޓުން ކުދިކުދިކޮން ކޮށާލެވުނީ މުޅިން އެހެން ޒުވާނެއްކަން އެނގުމުން މުޅި ދުނިޔެވެސް މަލާމާތްކުރާހެން މުހައިމިނަށް ހީވިއެވެ.

ޖަނާޒާ ނިމި ގެޔަށް އައިސްވެސް މުހައިމިނަށް ވިސްނެނީ ދެ މަރާމެދުއެވެ. ހެޔޮލަފާ މަންމަ ދުނިޔެ ދޫކުރުމުންނާއި އެއްވެސް ކުށެއްނެތް ޒުވާނަކު އޭނާގެ ސަބަބުން ދުނިޔެ ދޫކޮށްދިޔުމުން ކުރާ ހިތާމަތައް ވަށާލާފައިވިއެވެ. ގޭގައި އިތުރު މީހަކުނެތެވެ. ޖަމްޝީދުވެސް ހަޔާތުގެ ފުރަތަމަ ފަހަރަށް މުހައިމިނަށް ނަޞޭހަތް ދިނުމަށްފަހު ނުކުމެގެން ދިޔަތާ ކިތަންމެ އިރެކެވެ. ގަބުކައިފާ އިން މުހައިމިނު އެކި ކަންކަމާ ވިސްނަމުން ދިޔައެވެ.

މަންމަ ނިޔާވިތާ ދެމަސް ވީއިރުވެސް މުހައިމިނު ހަމައަކަށް ނޭޅެއެވެ. މަންމަގެ އޯގާތެރި ފިރުމުންތަކާއި ނަޞޭހަތްތައް އަބަދުމެ ކަންފަތަށް އިވިއިވި ހުންނަ ކަހަލައެވެ. ކުރިން ކުރަމުން އައި މަސްތުވާތަކެތީގެ ވިޔަފާރީގެ ކޮޅުތައްވެސް ދޫކޮށްލިއެވެ. އަދި މަންމަ ދުނިޔޭގައި ހުރި އިރު ދިން ނަޞޭހަތްތަކުގައި ހިފަން ނިންމާ މުޅިން އެހެން މީހަކަށް ބަދަލުވިއެވެ. ފަސްވަގުތު ނާޅާ ނަމާދު ކުރަން ފެށިއެވެ. ރޯދައަށް ހުންނަން ފެށިއެވެ. އަދި ކުރިން އުޅުނު ވިޔާނުދާ ހުރިހާ އުޅުމަކާ ދުރަށްގޮސް ނުބައި ރައްޓެހިންނާވެސް ދުރުވެއްޖެއެވެ. މަންމަގެ ހައްގުގައެވެ. މިވަރަކުން ނިންމައެއް ނުލައެވެ. މާލެ ދޫކޮށް ރާއްޖެތެރޭ ރަށަކަށް ދިރިއުޅުން ބަދަލުކުރަން ނިންމިއެވެ. މަންމަ ފަރާތުން ލިބުނު މުއްސަނދިކަމާ ބައްޕަގެ ތަނަވަސް ދިރިއުޅުންވެސް ދޫކޮށެވެ. ދިރިހުރުމަކީ ވަގުތީ ތަނެއްކަން މަންމަގެ މަރުގެ ހާދިސާއިން މުހައިމިނަށް ވިސްނައިދިނެވެ.

ރާ އަތޮޅު ފައިނަށް ބަދަލުވީ މިސްކިތުން ދިމާވި ރައްޓެއްސެއްގެ އެދުމުގެ މަތިންނެވެ. މިސްކިތަށް ގޮސްގޮސް ދިމާވި އެ ރަހްމަތްތެރިޔާއަށް މުހައިމިނުގެ ހުރިހާ ވާހަކައެއް ކިޔައިދިނުމުން އެ ރަހްމަތްތެރިޔާ އެ ރަށުން ގެއެއް ހޯދައި އެކަން ހަމަޖައްސައިދިނެވެ. ކޮންމެފަދަ ހާލެއްގައިވެސް އުޅެން ޖެހުނަސް ހެޔޮކަމަށް ނިންމާފައެވެ.

ފައިނުގައި މުހައިމިނު ހުންނަ ގެއަކީ މުސްކުޅި ދެމަފިރިން އެކަނި އުޅޭ ގެއެކެވެ. މުސްކުޅި ބައު ގެއެކެވެ. ދެކޮޓަރިއާ އިހުގެ ބަދިގެ ފައްޗެކެވެ. މަތިހާމަ ގިފިއްޔެކެވެ. އެކަމަށް މުހައިމިނު ރުހުނީ އެންމެ ސަބަބަކަށްޓަކައެވެ. މުޅި އުމުރަށް ގެއްލުނު މަންމަ ދިރި ދުނިޔޭގައި ހުރިއިރު އަޅާނުލެވުނީތީ އެ މުސްކުޅި ދެމަފިރިންނަށް އަޅާލުމުގެ ބޭނުމުގައެވެ. ފަގީރު ދެމަފިރިންނަށް އެހީތެރިވުމުގެ ބޭނުމުގައެވެ. ދުނިޔޭގައި ހުއްޓަސް ނެތް ބައްޕަގެ ހަނދާން ކުރުމެއްނެތިއެވެ.

ހިތަށް އެރި ކޮންމެ އެއްޗެއް ކޮންމެ ގަޑިއަކު ލިބިލިބި ހުރުމަށްފަހު ބުރަ މަސައްކަތުން ކާންބޯން މަސައްކަތް ކުރަން ދަސްކުރުންވީ މުހައިމިނަށް އުނދަގޫ ކަމަކަށެވެ. ނަމަވެސް އެކަމަށް ހޭނޭތޯ ކެތްތެރިކަމާއެކު މަސައްކަތް ކުރަމުން ދިޔައެވެ. އުމުރުން ދުވަސްވެފައިވާ އުމަރުބެއާއި ހައްވަ ދައިތައަކީ އަމިއްލަ މަންމައާއި ބައްޕަ ފަދައިން ދެކެމުންނެވެ. މަސްވެރިކަމަށް ފުރާ ބަޔަކާ މުހައިމިނު ގުޅިގެން މަހަށް ދެއެވެ. އެކަމުން ގޭގެ ކެއިންބުއިމުގެ ކަންތައް ބަލަހައްޓައެވެ. ރަށުގައި މަސައްކަތް ކުރާ ގުރޫޕަކާ ގުޅިގެން ދުވަހު ކުއްޔަށް މަސައްކަތުވެސް ދެއެވެ. މުހައިމިނު އައި ފަހުން އުމަރުބެގެ ދެމަފިރިންނަށް ހީވީ އެހެން ދުނިޔެއެއް އަލުން ލިބުނު ހެނެވެ. ރަށުގައި މުހައިމިނުގެ ރަނގަޅު ވާހަކަވެސް އެކިމީހުން ދައްކަމުންދެއެވެ.

މަހުން ލަފައިން އައިސް ބަދިގޭގައި ހުރި ތެއްޔަކަށް ގެނައި ދެ ކަންނެލި ލުމަށްފަހު ގިފިއްޔާ ދިމާލަށް ހިނގައިގަތެވެ. ބޭރު ޖޯލީގައި އުމަރުބެ އިން އިރު ކައިރީގައި ގޭގެ އަސްކަނިން ވާ ހިޔަލުގައި ހުރި ފަށްޖެހި އެނދެއްގައި އޮތް ހައްވަ ދައިތަ ދައްކަމުން ދިޔަ ވާހަކައަށް މުހައިމިނުގެ ސަމާލުކަން ހުއްޓުނެވެ. ހައްވަ ދައިތައާއި އުމަރުބެ ވެސް ތިބީ ފެންކަޅިވެފައެވެ. ކޮންމެވެސް ޒުވާނަކު އިހާނެތިކޮށް މަރާލެވިގެން އުޅޭ ވާހަކަ ރޭޑިއޯއިން ކީވާހަކަ ދެކެވެނީއެވެ. އަދި ދަރިފުޅުވެސް މަރާލެވުނީ އެފަދަ ގޮތަކަށޭ ބުނި އަޑުން މުހައިމިނު ހުއްޓުން އެރިއެވެ.

"ބޭބޭ. ކޮން ދަރިއެއް ވާހަކަ ތި ދައްކަނީ.. ދަރިއަކު ހުރޭތަ؟" މުހައިމިނު އުމަރުބެ ކައިރީގައި އިށީނުމަށްފަހު ސުވާލު ކޮށްލިއެވެ.
"އާނ، މި ދިވެހިރާއްޖެއަކީ އަހަރުމެން މިވީހާ ދުވަހު އުޅުނު ރާއްޖެފަދަ ތަނެއް ނޫން. މިހާރު މިތަނެކޭ ވަލު ޖަންގައްޔެކޭ އެއްވަރެއްނު. މިއަދު އަނެއްކަ ޒުވާނަކު ކަތިލީ. އަދި އެ އުޅެނީ އަހަރުމެންގެ ހުރި ހަމައެކަނި ދަރިފުޅުގެ މަރަށް އިންސާފު ނުލިބި. ލިބޭނެކަމެއްވެސް ނޭނގެ. އެ ގާތިލު ހޯދާނީ ކިހިނެއް؟ މިވީހާތަނަށް ހޯދިފައެއްވެސް ނެތް" ގިސްލެވޭ ހާލުގައި އުމަރުބެ ވާހަކަ ދައްކަމުން ދިޔައެވެ. "އޭނާގެ ކުށަކީ ލެވުނު ޓީޝާޓޭ އިއްޔެވެސް ރޭޑިއޯއިން ކީއަޑު މި ދެކަންފަތުން އަޑު އެހިން. މިހާރު މަގަކަށް ނުކުމެވޭވަރެއް ނުވޭ. ލައިގެން ހުންނަ ޓީޝާޓުން ނޫނީ ބޮލުގަ ޖައްސާފަ ހުންނަ ކުލައަކުން ކަތިލަނީ.. އެއީ އިންސާނުންބާވައޭ ހިތަށް އަރާ"

މުހައިމިނަށް ހުރެވުނު ތަންވެސް ނޭނގުނެވެ. އެ ޤާތިލަކީ ހުދު އޭނާކަން ޔަގީންވާކަށް މާގިނަ އިރެއް ނުނެގިއެވެ. އެބުނާ ޒުވާނާ މަރާލި ދުވަސް އުމަރުބެ ބުނުމާއެކު އެކަން ޔަޤީން ވެއްޖެއެވެ.

"ބޭބޭ.. އަހަރެންނަށް މާފު ކުރޭ. ތިޔަ ބުނާ ޤާތިލަކީ އަހަރެން... ބޭބެމެންގެ ދަރިފުޅު މަރާލީ އަހަރެން... އެކަމަކު... އަހަރެން އެކަން ކުރީ ގަސްތުގައެއް ނޫން. އެއީ އޮޅިގެން. އަހަރެންނަކީ މީގެ ކުރިން މަސްތުވާތަކެތި ވިޔަފާރިކުރަމުން އައި މީހެއް. އަހަރެންގެ ވިޔަފާރީގަ މީހަކު މަކަރު ހަދާ ރުފިޔާ ގަނޑު ހިފައިގެން ފިލަން އުޅުނީމަ އައި ރުޅިން މަސްތުގެ ހާލުގަ ނުބައި މީހަކަށް ހަމަލާ ދެވުނީ. އަހަރެންނަށް މާފު ކުރޭ... އަހަރެން އެ ދުވަހު ކުރެވުނު ކުށަށް ތަޢުބާ ވެއްޖައިން. އަހަރެންގެ ހަޔާތުން އަހަރެން ލޯބިވާ މަންމަ ދިޔަ ދުވަހުން ފެށިގެން އަދާ ޖެހެންދެން އެކަހަލަ އެއްވެސް ކަމެއް ނުކުރަން. އިންޝާﷲ ދެން ދުވަހަކުވެސް ނުކުރާނަން. ތިއީ އަހަރެންގެ އުފަން މަންމަ އާއި ބައްޕައަށް ނުވިޔަސް މިއަދު އަހަރެންގެ ތިބި ހަމައެކަނި މީހުން. ހެޔޮ ނުވާނެ. އަހަރެން ކުރި ކުށަށް އަހަރެންނަށް މާފު ކުރޭ. ގެއްލިގެން ދިޔަ ދަރިފުޅުގެ ކައްފާރާއެއްގެ ގޮތުގައި މި ނިކަމެތި އަޅާ ދަރިއެއް ކަމުގައި ބަލައިދީ...." އިސްދަށަށް ޖަހައިގެން އިނދެ ގިސްލަމުން މުހައިމިނު ވާހަކަ ދައްކަމުން ދިޔައެވެ. ހުއްޓަމުންނެވެ.

އުމަރުބެގެ ދެލޯ ބޮޑުވިއެވެ. ފަށްޖެހި އެނދުގައި އޮތް ހައްވަ ދައިތަވެސް ތެދުވިއެވެ. އަދި ކޮރުޖަހަމުން އައިސް މުހައިމިނުގެ ކައިރީގައި ޖެހިގެން ހުރި ޖޯލީގައި އިށީނެވެ. މުހައިމިނުގެ ގެނެސް ހައްވަ ދައިތަ ގަޔާ ބޮނޑި ކޮށްލިއެވެ. އުމަރުބެ އިނީ ބުނާނެ އެއްޗެއްވެސް ނޭނގިފައެވެ. އިހާނެތިކޮށް މަރާލެވުނު ދަރިފުޅުގެ ގާތިލު އެއިނީ އެމީހުންގެ މުށުތެރޭގައެވެ. އަތްޖެހޭހާ ކައިރީގައެވެ. އެމީހުން ބޭނުންނަމަ ވަގުތުން ވެސް ޖަލުގެ ތޭރިތަކުގެ ތެރެއަށް އޭނާ ފޮނުވާލެވިދާނެއެވެ. ނަމަވެސް، ނޭނގި ހުއްޓާ ގެއްލުނު ދަރިފުޅުގެ ހަނދާންތަކާ ދުރަށް ނުދެވި ތިއްބާ 'ލިބުނު' ދަރިފުޅު އެގޮތަށް ގެއްލޭކަށް އުމަރުބެވެސް ބޭނުމެއް ނުވިއެވެ. ރޯން ފަށާފައި މުހައިމިނުގެ އަތުގައި ބާރަށް ހިފާ ދަމައިގަންނަމުން އުމަރުބެ ބުނެލިއެވެ. "މިއީ ތަގުދީރެވެ. އެ ދުވަހު ގެއްލުނީ އުފަން ދަރިއެވެ. މިއަދު އުފަން ދަރިއެއް ފަދަ ތިޔަ ދަރިފުޅު ގެއްލޭކަށް ނޭދެމެވެ. ކުށްކުރެވޭނީ އިންސާނުންނަށެވެ. އެ ކުށަށް ތަޢުބާވެ ރަނގަޅު ގޮތް ޚިޔާރު ކުރުމަކީ ބުއްދިވެރިންގެ ސިފައެކެވެ. ދަރިފުޅަށް މިއަދު ދޮގުވެސް ހެދުނީސް ނޫން ހެއްޔެވެ؟ ނަމަވެސް ތެދަށް ތިޔަ ކިޔައިދިނީ ރަނގަޅު ތަޢުބާއަކުން ތަޢުބާ ވެވިފައި ހުރީތީއެވެ. ދަރިފުޅާއެވެ. އަހަރުމެން މިތިބީ އަދުތޯ މާދަންވެފައެވެ. ތިޔަ ދަރިފުޅަށް އަދި މުސްތަޤުބަލު އޮތީއެވެ. އަހަރުމެންގެ ދަރިފުޅުގެ މަރުގެ ކައްފާރާއަކަށް ތިޔަ ދަރިފުޅު ފުދެއެވެ"
(ނިމުނީ)