މީސްމީޑިޔާ އަކީ ވަރަށް ތަފާތު ވައްތަރުގެ މީހުން އުޅޭ ތަނެކެވެ. ވަރަށް ތަފާތު މިޒާޖުގެ މީހުން އުޅޭ ތަނެކެވެ. އެފަދަ އެތައް ބަޔަކާ ބައްދަލުވެސް ވާ ތަނެކެވެ. އެގޮތުން މީސްމީޑިޔާގައި އުޅޭ މޮޔައިންނަކީވެސް ޒާތެއްގެ ބައެކެވެ. 

ބައެއް މީހުންގެ ނަޒަރުގައި މީސްމީޑިޔާގައި އުޅޭ މޮޔައިންނަކީ ފާޑު ފާޑަށް ވީޑިއޯ ހަދާ ޓިކްޓޮކް ހަދާ އަޕްލޯޑު ކުރާ މީހުންނެވެ. އެކި އެކި ވައްތަރުތައް ޖައްސާ ފޮޓޯނަގާ އަޕްލޯޑުކުރާ މީހުންނެވެ. ހަމަ ނުޖެހޭ ވާހަކަ ދައްކާ އެފަދަ ކޮމެންޓުކޮށް ހަދާ މީހުންނެވެ. ފަގަރުގައި އެއީވެސް މޮޔައިން ކަމުގައި ވެދާނެއެވެ. ނަމަވެސް ހަގީގަތުގައި މީސްމީޑިޔާގައި އުޅޭ ގިނަ މޮޔައިންނަކީ މިފަދަ ބައެއް ނޫނެވެ.

މީސްމީޑިޔާގައި އުޅޭ އަސްލު މޮޔައިންނަކީ، މީސްމީޑިޔާއިން ފެންނަ އެއްޗެއް ގަބޫލުކޮށް އެއަށް ހެއްލޭ މީހުންނެވެ. އަދި ހަބަރާ ލިޔުންތަކުގެ ސުރުހީ އެކަނި ކިޔައިގެން، ގިނަ އެއްޗެހިތަކެއް އެނގިއްޖެކަމަށް ދެކިގެން އުޅޭ މީހުންނެވެ. އަދި ހަބަރުތަކުގެ ސުހުރީ ކިޔުމަށްފަހު، އެ ހަބަރަކާއި ގުޅިގެން ކޮމެންޓުކޮށް ހަދާ މީހުންނެވެ. މި މީސްމީހުންގެ މޮޔަކަން އެހެން މީހުންނަށްވުރެ މާ ބޮޑެވެ.

މީސްމީޑިޔާއަކީ ކޮންމެ މީހަކަށްވެސް، އެމީހަކު ބޭނުން އެއްޗެއް ލެވެން އޮންނަ ތަނެކެވެ. އެކަން އެއްބަޔަކު ކުރެއެވެ. ހަގީގަތެއް ތެދެއް ދޮގެއް ނުބަލައެވެ. ދެން އެއްކަލަ މޮޔައިން ގެ ވާޖިބަކީ އެ އެއްޗެހި ގަބޫލުކޮށްގެން އުޅުމެވެ. ނިކަމެތި ފަލަސްޠީނުގެ ހާލަތު ބަޔާންކޮށްދޭ ކަމަށްބުނެ އެތައް ވީޑިއޯ އަކާ ފޮޓޯއެއް ދައުރުކުރުވިއިރު އެއްކަލަ މޮޔައިން ތިބީ އެއަށް ބަލާ އެ ގަބޫލު ކޮށްގެންނެވެ. ނަމަވެސް އާހިރުގައި އެކަންކަން ވެގެން ދިޔައީ ރޯ ބުހުތާނު ދޮގުތަކެއް ކަމުގައެވެ.

އަނެއް ބަޔަކު ހަބަރެއްގެ ސުރުހީ ކިޔާލުމަށްފަހު، މުޅި ހަބަރުގައި ބުނާ އެއްޗެއް އެނގުނީކަމަށް ހީކޮށް އެހެން މީހުން ގާތުގައި މާ މޮޅުވެފައި ވާހަކަ ދައްކާއިރު، އަނެކާ އަކީ އެ ހަބަރު ރަނގަޅަށް ކިޔާފައި ހުރި މީހެއްކަން އެއްކަލަ "މޮޔަ" އަކަށް ނޭނގެއެވެ. މި ހިސާބުން އަޑު އަހަން ހުންނަ މީހާގެ ގާތަށް އަންނަނީ އަމަށަކު ހިންޏެއް ނޫނެވެ. ވާނީވެސް އެހެންތާއެވެ. ސުރުހީ ކިޔާލައިގެން ފުއްދާލިއިރު، ހަބަރުގައި މިއޮތީ އަދި މާ ތަފްސީލީ ހަބަރެވެ. މި ހަބަރަށް އަނެކާ މާ ފަރިތަ އެވެ. 

ދެންތިބި ބަޔަކު ހަބަރުގެ ނުވަތަ ލިޔުމުގެ ސުރުހީ ކިޔާލުމަށްފަހު "މޮޔަ" ވެގެން އެއަށް ކޮމެންޓު ކުރަން ފަށައެވެ. އެ ލިޔުމުގެ ބޭނުމަކާ އޭގެ މަގުސަދަކާ އޭގައި އޮތީ ކޮން އެއްޗެއްތޯ ބަލާވެސް ނުލައެވެ. މިފަދަ މީހުން ކޮށްފައި ހުންނަ ކޮމެންޓުތައް ފެނުމުން، މަންޒަރު ދެކޭ މީހާއަށް އެއީ މޮޔައެއްކަން ސާފުކޮށް އެނގެއެވެ. އަދި އެ ކޮމެންޓުތައް ކިޔާމީހާ އެމީހަކަށް މަލާމާތްކޮށް ހަދައެވެ.

ފާޑު ފާޑުގެ ވީޑިއޯ ހެދުމާ ވައްތަރު ޖައްސާފާ ފޮޓޯ ނެގުމާ އެ އެއްޗެހި އަޕްލޯޑުކުރުމާ މިއީވެސް މީސްމީޑިޔާގައި އުޅޭ މޮޔައިން ކުރާ ކަންކަމޭ ބުނެއެވެ. ނަމަވެސް އެއްމެ ބޮޑެތި މޮޔައިން ކުރާ ކަންކަން އެއަށްވުރެ މާ މޮޔައެވެ. ތަހުޒީބުވާން ނުދަންނަނީއެވެ. ތަރުބިއްޔަތު މަދުވަނީއެވެ. މިނިވަންކަން މާ ބޮޑީއެވެ. ބޮޑާކަމާ ކިބުރުވެރިކަން އަމުދުން މާ ވަރުގަދައީއެވެ. ޖާހިލުކަމުގައި މަދު އިލްމުކޮޅެއްގެ މައްޗަށް ޠަބީއަތް ކިޔަމަންކުރާ މިންވަރު މާ ގަދައީއެވެ.