ވާދަވެރި ޙަރަކާތްތައް ނިމިދާއިރު އެއްބަޔަކު އަނެއްބަޔަކާ މެދު ހިތްނުތަނަވަސްކަން އުފެދި ރުޅިވެރި ވާތަން ފެނެއެވެ. ދޭދޭ ފަރުދުންގެ މެދުގައި އޮންނަ ގާތް ގުޅުންތަކަށް ބުރޫއަރައި އޮމާންކަން ކެނޑިދެއެވެ. މިއީ އިސްލާމުންގެ ތެރޭ މި ކަން ހިނގާން ޖެހޭ މަގެއް ނޫނެވެ. އެ ގޮތުގައި އުޅޭ ކާފިރުންގެ ބަޔަކު އުޅެދާނެއެވެ. އެއީ ނަމޫނާއަކަށް ބަލާންވީ ބައެއް ނޫނެވެ. 

ދުނިޔެ އާރާސްތު ކުރުމާއި ދުނިޔެ ތަޢުމީރު ކުރުމުގައި ކާފިރުން ވާދަކޮށް އުޅެނީ އެ މީހުންނަށް ހިދާޔަތް ލިބިފައި ނުވާތީއެވެ. އަދި ކާފިރުންގެ ތެރޭގައި ހިމެނޭ މުލްޙިދުން ދުނިޔެއާ ހެދި އުޅެނީ ރައްބެއް، ރަސޫލެއް، ޤިޔާމަތެއް، ސުވަރުގެއެއް، ނަރަކައެއް އެބައިމީހުން ޤަބޫލުނުކުރާތީއެވެ. އެފަދަ މީހުންގެ ގޮތްތަކަށް ލެނބި އާޚިރަތް ނަގައިލާ ބަޔަކު ކަމުގައި މުސްލިމުން ވެގެން ނުވާނެއެވެ.

ކުޅިވަރުގައި އެންމެ މަތީ ވަނަ ހޯދަން ކުރާ ވާދަވެރި މަސައްކަތަކީ އެ ކުޅިވަރުގެ މުބާރާތާ އެކު ނިންމައިލާ ކަމެއް ކަމުގައި ހަދަންވާނެ އެވެ. އަލުން އެ ވާދަވެރިކަން ގެންނާނީ އަނެއް މުބާރާތުގައެވެ. ހަމަ އެފަދައިން މަސައްކަތު މައިދާނުގައި ވެސް މަޤާމުގެ ކުރިއެރުންތައް ހޯދުމުގައި ގެންގުޅެންވާނީ މި އުޞޫލެވެ. އިޚުލާޞްތެރިކަމާ އެކު އެ މީހެއްގެ ކުޅަދާނަކަން އެންމެ ކުރިއަށް ނެރެ، އެކުގައި މަސައްކަތް ކުރާ ފަރާތްތަކުގެ ކުރިމަގަށް ހުރަސް ނާޅައި، ތިމާގެ ކުރިއެރުން ހޯދާން ވީއެވެ. މަޤާމުގެ ކުރިއެރުން ލިބޭ ދުވަހަށް ފަހު، ޒާތީ ވާދަވެރިކަމެއްގެ ގޮތުގައި މި ކަން ވެސް ބާއްވައިގެން ނުވާނެއެވެ.

ހަމަ އެހެންމެ އެކިއެކި މަޤާމުތަކަށް ވާދަކޮށް އިންތިޚާބުވުމުގައި ވެސް މި އުޞޫލާއި ހަމަ ހިފެހެއްޓުން ހިމެނެނީ އިސްލާމީ އަޚުލާޤުގެ ތެރެއިންނެވެ. މުސްލިމުންނަށް ޚިދުމަތްކޮށްދިނުމަށް އިންތިޚާބުވާން އެދޭ އެކަކަށް ވުރެ ގިނަމީހުން ތިބިނަމަ އޭގެތެރެއިން އެކަކު ޚިޔާރުކުރެވެނީ ވާދަވެރި މުސާބަޤާތަކަށް ފަހުއެވެ. ނުވަތަ ގުރު ނަގައިގެންނެވެ. މި ދެ ގޮތުން ކުރެ ކޮންމެ ގޮތަކަށް ކަން ކުރިޔަސް ނަތީޖާއަށް ފަހު ޚިޔާރުވި މީހާއަށް އެހީތެރިވެ އެއްބާރުލުން ދޭން ވާނެއެވެ. ވާދަކުރި އެންމެން ވެސް މަސައްކަތްކުރީ މުސްލިމުންނަށް ޚިދުމަތްކޮށްދޭނޭ ފުރުޞަތެއް ހޯދުމަށެވެ. ޚިޔާރުވީ އެކަކެވެ. އޭގެ މައްޗަށް ނަފުރަތު އުފައްދައި ގުޅުންތައް ނުކަނޑާށެވެ. ތިމާގެކަން ހީނަރުނުކުރާށެވެ. ރަޙިމުގެ ގުޅުން ދަމަހައްޓާށެވެ. އެކުވެރިވެ އެއްބައިވާށެވެ. ވާދަވެރިކަމަށް ފަހު ރުޅިވެރިނުވާށެވެ!

ޙަޤީޤީ ވާދައަކީ އާޚިރަތަށްޓަކައި ކުރަންވީ ވާދައެވެ. އެ ވާދައިގެ ސަފުގައި އަނެކާ ފަހަށްޖައްސައި ތިމާ ކުރިއަރައި ދިޔުމުގައި އެންމެ ތަންކޮޅެއް ވެސް ދޫދީގެން ނުވާނެއެވެ. އެކަން ބަޔާންކުރައްވައި މާތް ﷲ ވަޙީކުރެއްވިއެވެ.  ﴿ وَسَارِعُوٓا۟ إِلَىٰ مَغْفِرَةٍۢ مِّن رَّبِّكُمْ وَجَنَّةٍ عَرْضُهَا ٱلسَّمَـٰوَٰتُ وَٱلْأَرْضُ أُعِدَّتْ لِلْمُتَّقِينَ ﴾ ( آل عمران : ١٣٣) މާނައީ: "އަދި، ތިޔަބައިމީހުންގެ ވެރިރަސްކަލާނގެ ޙަޟްރަތުން ފާފަފުއްސެވުން ލިބިގަތުމަށާއި، އުޑުތަކާއި ބިން ފަދަ ތަނަވަސްކަންހުރި ސުވަރުގެޔަށް ތިޔަބައިމީހުން އަވަސްވެގަންނާށެވެ! އެ ސުވަރުގެ ތައްޔާރުކުރައްވައިފައި ވަނީ، ތަޤުވާވެރިންނަށެވެ."

 

(ވާދަވެރިކަމަށް ފަހު ރުޅިވެރިނުވާށެވެ. - އައްޝައިޚް މުޙައްމަދު އަފްޟަލް؛ ދީނުގެ މަގު، އަހަރު 3، އަދަދު 41، ޞ.1 - 06 ނޮވެންބަރު 2023)