އަލާމާރީގައި ރައްކާކޮށްފައި ހުންނަ އަންނައުނާއި ބެޑްޝީޓްފަދަ ތަކެތި ގިނަ ދުވަސްކޮށްފައި ނަގާއިރު އޭގައި ނުބައި ވަހެއް ހުންނަކަން ބައެއް ފަހަރު ފާހަގަ ވެއެވެ. އަދި ދެން ދޮވެގެން ނޫނީ ބޭނުން ނުކުރެވޭވަރުގެ ނުބައި އަދި ގަދަ ވަސް ހަރުލާފައި ހުންނަ ފަހަރުވެސް އާދެއެވެ. މިއަދު މި ބަލާލަނީ މިކަން ހައްލުކުރުމަށް ކުރެވިދާނެ ބައެއް ކަންކަމަށެވެ.
- ދާއެއްޗެހި އަޅާވަށިގަނޑު ސާފުކުރާށެވެ.
ދާ އެއްޗެހި އަޅައިގެން ގެންގުޅޭ ވަށިގަނޑު އެންމެ ފުރަތަމަ ރީތިކޮށް ދޮވެސާފު ކުރާށެވެ. ޕްލާސްޓިކް ވަށިގަނޑެއްނަމަ ސާފުކުރަން ބޭނުންކުރާ ކެމިކަލެއް ސްޕްރޭކޮށްލުމަށްފަހު ރީތިކޮށް ޓީޝޫއަކުން ފޮހެލާށެވެ. އެތެރޭގައި ފޮތިން ފަށަލައެއް އިންނަމަ އަދި އެ ނެގޭގޮތަށް އިންނަމަ ނަގައިގެން ދޮންނާށެވެ. ނުނެގޭނަމަ ޑިސްއިންފެކްޓަންޓެއް ސްޕްރޭކޮށްގެން ސާފުކުރާށެވެ.
- ބާކީވާ ހަރބް އަލަމާރިއަށް ލާށެވެ.
ބަދިގޭގައި ބޭނުންކޮށް ބާކީވާ ހަރބްތަކުގެ ތެރެއިން ތައިމް، ޕަރސްލޭ، އޮރިގާނޯ، ކުދީނާ ފަދަ ފަތްތައް އުކާލުމުގެ ބަދަލުގައި، އަލަމާރީގައި ބޭނުން ކުރެވޭނެއެވެ. ކުޑަ ފޮތި ކޮތަޅެއް ނުވަތަ ފޮތި ކޮޅެއްގައި ބަނދެލުމަށްފަހު އަލާމާރީގައި އެލުވާލާށެވެ. މި ހަރބަތަކުން ބޭރުވާ ވަހުން، އަންނައުނުގައި ހުންނަ ނުބައި ވަސް ކަނޑުވާލާނެއެވެ. މިއީ ގިނަ ދުވަހަށް އަސަރު ހުންނަ ޚަރަދު ކުޑަގޮތެކެވެ.
- ދަނޑިސައިބޯނި ބޭނުންކުރާށެވެ.
ސައިބޯނީގެ ތެރޭގައި ވަރަށް މީރުވަސްދުވާ ސައިބޯނި ހުރެއެވެ. މިފަދަ ސައިބޯންޏެއް ހޯދުމަށްފަހު ކުދިކޮށް ބުރިބުރި ކޮށްލާށެވެ. 1 އިންޗި × 1 އިންޗް ވެސް ކަމުދާނެއެވެ. ދެން ތުނި ފޮތިކޮޅެއްގެ ތެރޭގައި ބަނދެލުމަށްފަހު އަލަމާރީގައި އެލުވާލާށެވެ. ގިނަ ވަތްގަނޑު ހުރިނަމަ ވަތްގަނޑުގެ ތެރޭގައި ބާއްވާށެވެ.
- އެސެންޝަލް އޮއިލް ބޭނުން ކުރާށެވެ.
މީރުވަސް ދުވާ އެސެންޝަލް އޮއިލް އެއް ހޯދާށެވެ. ގްރޭޕްފުރުޓް، ލެމަން، ލެމަންގްރާސް، މެންޑަރިން، އޮރެންޖް އަދި ޓެންޖަރިން ތެލުން ވަރަށް މީރުވަސް ދުވާނެއެވެ. މަޑުމަޑުން ވަސް ބޭރުކުރެވޭ ގޮތަށް ހުންނަ ޑިފިއުޒަރ އެއް ހޯދާށެވެ. އޭރުން އަބަދުވެސް އަލާމާރީގައި ހުންނަ ހެދުން ތަކުގައި މީރުވަސް ހިފާފައި ހުންނާނެއެވެ.
- އިސްޓާކީނަކަށް ބޭކިންގ ސޮޑާ އަޅާފައި އެލުވާށެވެ.
ބޭނުން ނުކުރާ އިސްޓާކީނެއްގެ ތެރެއަށް ބޭކިން ސޮޑާ އަޅާފައި އަލަމާރީގައި އެލުވާށެވެ. މިގޮތަށް ބޭކިންގ ސޮޑާ ބޭނުން ކުރުމުން ނުބައި ވަސް ދުވާ ބޫޓުގެ ވަސްވެސް ކަނޑުވާލައެވެ. ބައެއް ފަހަރަށް އަލަމާރީގައި ބެހެއްޓިފައި ހުންނަ ނުބައިވަސް ދުވާ ބޫޓުގެ ސަބަބުން ވެސް މުޅި އަލަމާރިއަށް ނުބައިވަސް ފެތުރެން މެދުވެރިވެއެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން