ދުނިޔެވީ ޙަޔާތަކީ އުނދަގޫ ދަތުރެކެވެ.

ދުނިޔެވީ ޙަޔާތަކީ އުނދަގޫ ދަތުރުކެވެ. ދަތުރުގެ ކޮއްތު މަދުކޮށްފި ނަމަ ރައްކަލެއް ނެތެވެ. އިސްވެދިޔަ މީހުން މި ދަތުރު ނިންމާފައި ހިނގައްޖެއެވެ. މިހާރުގެ ދަތުރުވެރީންނަކީ އަހުރެމެންނެވެ. ދަތުރުގެ ކޮއްތު ގިނަ ކުރާށެވެ. އެންމެ ހެޔޮ ކޮއްތަކީ ތަޤުވާއެވެ. 

ދުނިޔެވީ ޙަޔާތަކީ އުނދަގޫ ދަތުރެއްކަން ބަޔާންކުރައްވައި މާތް ﷲ ވަޙީކުރައްވައިފައި ވެއެވެ.  ﴿ لَقَدْ خَلَقْنَا ٱلْإِنسَـٰنَ فِى كَبَدٍ ﴾ (އަލް ބަލަދު: 4)  މާނައީ: "ހަމަކަށަވަރުން، ތިމަންރަސްކަލާނގެ އިންސާނާ ހައްދަވައި، ވަރުބަލިވުމާއި ގަދަ މަސައްކަތުގެ ތެރެޔަށް ލެއްވީމެވެ." ދުނިޔެވީ ޙަޔާތުގެ އެއް ޤާނޫނަކީ ކަންކަން ކުރަން ފަށާއިރު ބޮޑެތި ގޮންޖެހުންތަކާ ކުރިމަތިވުމެވެ. މިފަދަ އަނެއް ޤާނޫނަކީ ފެށުމުގެ މަރުޙަލާގެ ދަތިއުނދަގޫ ދުވަސްތަކަށް ފަހު، ފަސޭހަ އުފާވެރި ދުވަސްތައް މާތް ﷲ ދެއްވަވާ ކަމެވެ. ކަންކަމުގެ ހުރިހާ މަރުޙަލާއެއްގައި ވަކީން ޚާއްޞަކޮށް ފެށުމުގެ މަރުޙަލާގައި ކެތްތެރިކަމާއި ނަމާދުން ވާގި އެދެންވާނެއެވެ.

އުނދަގޫ ދުވަސްތައް ތާއަބަދަށް ދެމިގެނެއް ނުދާނެއެވެ. ކޮންމެ ކަމަކަށް ވެސް ނިމުން އަންނަ ފަދައިން އުނދަގޫކަމަށް ވެސް ނިމުން އަންނާނެއެވެ. އެހެންކަމުން ދިރިއުޅުމާ މެދު ފަހި ވިސްނުމަކުން ވިސްނަން ފަށާށެވެ! މުޞީބާތުގެ ވޭން ދުވަހަކަށްވުރެ ދުވަހެއް ދާނީ ކުޑަވަމުންނެވެ. ދަތިކަމާއި އަބާއްޖަވެރިކަމުގެ ގޮށްތައް މޮހެންފަށާނެވެ. ފާގަތިކަމުގެ ފަހި ވައިރޯޅިތައް އަންނާނީ ބާރުވަމުންނެވެ. އުފާވެރިކަމުގެ މުޅިން އައު ފަތިހަކަށް އަލިވިލެން ގާތްވެއްޖެއެވެ. ހިތްވަރާ އެކު ކުރިއަށް ދާށެވެ! ތިބާގެ އަމާޒަށް ވާޞިލުވެވޭނެ ކަން ކަށަވަރެވެ.

ދުނިޔެވީ ދިރިއުޅުމުގައި ފަސޭހަ ދުވަސްތަކާއި އުނދަގޫ ދުވަސްތައް އަންނާނޭ ކަން އާލު ޢިމްރާން ސޫރަތުގެ 140 އާޔަތުން އެނގެއެވެ. ﴿ وَتِلْكَ ٱلْأَيَّامُ نُدَاوِلُهَا بَيْنَ ٱلنَّاسِ ﴾ (އާލު ޢިމްރާން: 140)  މާނައި: "އެއީ، ދުވަސްތަކެކެވެ. ތިމަންރަސްކަލާނގެ އެ ދުވަސްތައް މީސްތަކުންގެ މެދުގައި އެކިގޮތްގޮތަށް ބަދަލުކުރައްވަމެވެ.

ބައެއް ފަހަރު ތިބާ ވަނީ ފާގަތިކަމާއި އުފާވެރިކަމުގައެވެ. އަނެއްބައި ފަހަރު ތިބާ ވަނީ ދަތިކަމާއި ހިތާމައިގައެވެ. މިއަދު މުޞީބާތަކަށް ފަހު މުޞީބާތެއް ޖެހެމުން ދާތީ ތިބާއަށް ފެނިދާނެއެވެ. މާދަމާ ކާމިޔާބަކަށް ފަހު ކާމިޔާބެއް ލިބެމުން އަންނާތީ ތިބާއަށް ފެނިދާނެއެވެ. ދިރިއުޅުމުގައި ކުރިމަތިވާ ކަންކަމާ މާބޮޑަށް މާޔޫސް ނުވާށެވެ! ތިބާގެ ޙަޔާތުން ބައެއް މީހުންނާއި ތަކެތި، ﷲ ސުބުޙާނަހޫ ވަޠަޢާލާ އުނިކުރައްވައިފާނެތެވެ. އެ ގޮތަށް އުނިކުރެވޭ ކޮންމެ އުނިކުރުމެއްގެ ބަދަލުގައި ތިބާގެ ޙަޔާތަށް އެންމެ ބޭނުންތެރި މީހުންނާއި އެއްޗެހި އެކަލާނގެ ދެއްވާނެތެވެ.

ޙަޔާތުގެ މަރުޙަލާތައް ބަޔާންކޮށްދެއްވައި މާތް ﷲ ވަޙީކުރައްވައިފައި ވެއެވެ. ﴿ هُوَ ٱلَّذِى خَلَقَكُم مِّن تُرَابٍۢ ثُمَّ مِن نُّطْفَةٍۢ ثُمَّ مِنْ عَلَقَةٍۢ ثُمَّ يُخْرِجُكُمْ طِفْلًۭا ثُمَّ لِتَبْلُغُوٓا۟ أَشُدَّكُمْ ثُمَّ لِتَكُونُوا۟ شُيُوخًۭا ۚ وَمِنكُم مَّن يُتَوَفَّىٰ مِن قَبْلُ ۖ وَلِتَبْلُغُوٓا۟ أَجَلًۭا مُّسَمًّۭى وَلَعَلَّكُمْ تَعْقِلُونَ ﴾ (ޣާފިރު: 67) މާނައީ: "އެކަލާނގެއީ، ތިޔަބައިމީހުން ވެލިން ހެއްދެވި ރަސްކަލާނގެއެވެ. ދެން މަނިތިއްކަކުންނެވެ. ދެން ގަނޑުލޭކޮޅަކުންނެވެ. ދެން އެކަލާނގެ، ތިޔަބައިމީހުން ޅަކުދިންގެ ގޮތުގައި (މައިމީހާގެ ބަނޑުން) ނެރުއްވަތެވެ. ދެން ތިޔަބައިމީހުން ބޮޑުވެ ފުރާފުރިހަމަވުމާ ހަމަޔަށް ފޯރުމަށްޓަކައެވެ. ދެން ތިޔަބައިމީހުން މުސްކުޅިންނަށް ވުމަށް ޓަކައެވެ. އަދި އޭގެކުރިން މަރުވާ މީހުން ތިޔަބައިމީހުންގެ ތެރެއިންވެއެވެ. އަދި ތިޔަބައިމީހުން ކަނޑައެޅިގެންވާ މުއްދަތަކަށް ފޯރުމަށް ޓަކައެވެ. އަދި ތިޔަބައިމީހުން ވިސްނުމަށް ޓަކައެވެ."

ކޮންމެ އެއްޗެއް ވެސް، އަދި ކޮންމެ ކަމެއް ވެސް އުދަވުމަށް ފަހު ދެން ދާނީ އޮއްސޭށެވެ. ފަތިހު ފަރިވާ މާތައް، ހަވީރުވެ ދުވަހުގެ ފަހުބަޔަަަަަށް ދާ ވަރަކަށް މިލާ މޯޅިވާނެއެވެ.

(ދުނިޔެވީ ޙަޔާތަކީ އުނދަގޫ ދަތުރެކެވެ. - އައްޝެއިޚް މުޙައްމަދު މަޢޫނު ޝަރީފް؛ ދީނުގެ މަގު، އަހަރު 3، އަދަދު 50، ޞ.3، މަޖައްލާގެ ޢަދަދު 153 - 08 ޑިސެންބަރު 2023)