އިންޓަނެޓް މެދުވެރިކޮށް ހިންގާ ކުށްތަކުން ރައްކާތެރިކުރުމަށް މައުލޫމާތުދިނުމުގެ ޕްރޮގްރާމެއް ރ. އަތޮޅުގެ 13 ރަށުގައި ކުރިއަށް ގެންގޮސްފިއެވެ.
ރ. އަތޮޅު ޕޮލިހާއި ސައިބަރ ޕޮލިސިންގ ސެންޓަރު ގުޅިގެން ނޮވެމްބަރު 30 އިން ޑިސެމްބަރު 10 އަށް ކުރިއަށް ގެންދިޔަ މި ޕްރޮގްރާމްގައި މައުލޫމާތުދީފައިވަނީ ސްކޫލުތަކުގެ ދަރިވަރުންނަށާއި ބެލެނިވެރިންނަށެވެ.
އެގޮތުން ދަރިވަރުންނަށް މައުލޫމާތުދިނުމަށް ކުރިއަށް ގެންދިޔަ ޕްރޮގްރާމްގައި، ރައްކާތެރިގޮތުގައި އިންޓަނެޓް ބޭނުންކުރާނެ ގޮތްތައް ބުނެދީފައިވެއެވެ. އަދި އިންޓަނެޓް މެދުވެރިކޮށް ފުރާވަރުގެ ކުދިންނަށް އަމާޒުކޮށް ހިންގާ ތަފާތު އެކިކަހަލަ ކުށްތަކާއި އެފަދަ ކަންކަމުން ރައްކާތެރިވާނެ ގޮތްތައް ބުނެދީފައިވެއެވެ.
އަދި އިންޓަނެޓުން ބައްދަލުވާ ގޮތް ނޭނގޭ މީހުންނާ ވާހަކަ ނުދެއްކުމަށާއި ޒާތީ އެއްވެސް މައުލޫތެއް އެފަދަ މީހުންނާ ހިއްސާނުކުރުމަށް ނަސޭހަތްތެރިވެފައިވެއެވެ. އަދި އިންޓަނެޓް މެދުވެރިކޮށް އެއްވެސް ކަމެއް ދިމާވެއްޖެނަމަ އެކަމެއް ސިއްރުނުކޮށް ބެލެނިވެރިންނާ ހިއްސާކުރުމަށް ވެސް ނަސޭހަތްތެރިވެފައިވެއެވެ.
ސްކޫލުތަކުގެ ބެލެނިވެރިންނަށް މައުލޫމާތުދިނުމަށް ކުރިއަށް ގެންދިޔަ ޕްރޮގްރާމްގައި، ރައްކާތެރިކަމާއެކު އިންޓަނެޓް ބޭނުންކުރާނެ ގޮތްތައް ބުނެދީފައިވެއެވެ. އަދި ދަރިން ބޭނުންކުރާ އެކިހަކަލަ އެޕްލިކޭޝަންތައް މޮނީޓަރކުރާނެ ގޮތްތައް ބުނެދީފައިވެއެވެ.
އަދި ޕިސިންގ ލިންކުތައް މެދުވެރިކޮށް ހިންގަމުންދާ ސްކޭމްތަކާއި، ފޭސްބުކް އެކްޓިވޭޓް އަދި ޑިއެކްޓިވޭޓް ކުރުމުގެ ނަމުގައި ފޮނުވާ ކޯޑުތަކާއި ޓްރޭޑް ކޮށްދޭނެކަމަށް ބުނެ އޮޅުވާލައިގެން ފައިސާ ހޯދާގޮތްތަކާ އަދި އީ-ސިމް އާ ގުޅުންހުރި މަކަރާއި ހީލަތުގެ މައްސަލަތަކުން ރައްކާތެރިކުރުވުމަށް މައުލޫމާތުދީފައިވެއެވެ. އަދި އިންޓަނެޓް މެދުވެރިކޮށް ހިންގާ ކުށްތައް މަދުކުރުމަށް ކުރެވިދާނެ ކަންކަމުގެ މައުލޫމާތު ވެސް ހިއްސާކޮށްފައިވެއެވެ.
މި ޕްރޮގްރާމްގައި، ރ. އަތޮޅުގެ 13 ރަށުން 400 އަށް ވުރެ ގިނަ ދަރިވަރުންނާއި 800 އަށް ވުރެ ގިނަ ބެލެނިވެރިންނަށް މައުލޫމާތުދީފައިވެއެވެ.