މައި ކޮލެޖް ސްޓޫޑެންޓް އެސޯސިއޭޝަން (މިކްސާ) ގެ ކުރީގެ އިސްވާރުންނާއެކު މައި ކޮލެޖްގެ މެނޭޖުމެންޓުން ޑިނާ ނައިޓެއް ބާއްވައިފިއެވެ.
މިއީ ކޮލެޖުގެ ބާނީ އަދި މިއާންޒް ގުރޫޕުގެ ޗެއާމަން އަޙުމަދު މުއްތަކީ އިސްނެންގުވުމަކަށް ބޭއްވި ޑިނާ ނައިޓެކެވެ.
މުއްތަކީގެ ފަރާތުން ދެއްވި ދައުވަތަކަށް މައި ކޮލެޖްގެ ދަރިވަރުންގެ ގުޅުން އުފެދިގެން މިހާތަނަށް އައިއިރު އެކި ދައުރުތަކުގައި އިސް މަގާމުތައް އަދާކުރެއްވި އިސްވާރުންވަނީ ރޭގަނޑުގެ ކެއުމާއެކު ކުރިއަށްގެންދިޔަ މި ބައްދަލުވުމުގައި ބައިވެރިވެފައެވެ.
މި ބައްދަލުވުމުގައި ރެކްޓާ ލަމްޔާ އަބްދުލް ހާދީއާއި އެ ކޮލެޖުގެ ބައެއް އިސްވެރިންނާއި މުވައްޒަފުން ވެސް ވަނީ ބައިވެރިވެފައެވެ.
މިއީ މިކްސާގެ އެކި ދައުރުތަކުގެ އިސްވާރުންތަކެއް މިފަދަ ގޮތަކަށް އެއްތަންވި ފުރަތަމަ ފަހަރެވެ.
މި ޑިނާ ނައިޓްގައި ދައުރުތަކުގައި އެ އެސޯސިއޭޝަނުން ކޮށްފައިވާ ތަޖުރިބާތައް ވަނީ ހިއްސާކޮށްފައެވެ.
މީގެ އިތުރުން ކުރިއަށް އޮތް ތަނުގައި މިކްސާގެ އެލުމުނި އަދި މިކްސާ ގުޅިގެން ކުރެވިދާނެ ކަންކަމާ ގުޅޭގޮތުން ވެސް ވަނީ ހިޔާލު ބަދަލުކޮށްފައެވެ.
ކުރުކޮށް "މިކްސާ" ކިޔާ ގޮތަށް، މައި ކޮލެޖް ސްޓޫޑެންޓް އެސޯސިއޭޝަން ރީބްރޭންޑްކޮށް، ރަސްމީ ލޯގޯ އަކާއެކު ލޯންޗްކޮށްފައިވަނީ 2018 ވަނަ އަހަރުގައެވެ.
މިކްސާ އަކީ ޕްރައިވެޓް ކޮލެޖްތަކުން އެންމެ ހަރަކާތްތެރި ކަމަށް ފާހަގަކޮށްލެވޭ ދަރިވަރުންގެ ގުޅުމެވެ. މިކްސާ އިން ދަރިވަރުންނާ ގުޅުންހުރި އެކިއެކި މުބާރާތްތަކާއި ހަރަކާތްތަކުގެ އިތުރުން ދަތުރުތައް ރާވައި ހިންގައެވެ.