ހުޅުމާލޭ، ހުރަވީ ސްކޫލު ދަރިވަރުންނަށް ކުރިއަށް ގެންދިޔަ ޓްރެފިކް މޮނީޓާސް ޕްރޮގްރާ ނިންމުމުގެ ރަސްމިއްޔާތު ބާއްވައިފިއެވެ.
ހުރަވީ ސްކޫލު ހޯލުގައި ރޭ ބޭއްވި މި ރަސްމިއްޔާތު ޝަރަފުވެރިކޮށްދެއްވީ އެސިސްޓެންޓް ކޮމިޝަނަރ އޮފް ޕޮލިސް އަޙްމަދު ޢަބްދުއްރަމާންއެވެ.
މި ރަސްމިއްޔާތުގައި، މިނިސްޓްރީ އޮފް އެޑިއުކޭޝަންގެ ޑެޕިއުޓީ ޑިރެކްޓަރ ޖެނެރަލް ހުސައިން ރަޝީދު މޫސާ، މާރޭ އޭރިއާ 2 ގެ ހެޑް، ޗީފް ސުޕްރިންޓެންޑެންޓް އޮފް ޕޮލިސް ޢަބްދުﷲ ޝަރީފް، ރޯޑް ސޭފްޓީ އެވެއާނެސް އެންޑް ޕްރިވެންޝަންގެ ހެޑް ސުޕްރިންޓެންޑެންޓް އޮފް ޕޮލިސް އަޙްމަދު ފަސީހު، ފުލުހުންގެ އެގްޒެކެޓިވް އޮފިސަރުންނާއި ކޮމިޝަންޑު އޮފިސަރުންގެ އިތުރުން ހުރަވީ ސުކޫލުގެ ޕްރިންސިޕަލް ޢަބްދުﷲ ރަޝީދު އާއި އެ ސްކޫލުގެ އިސްވެރިން ބައިވެރިވެލެއްވިއެވެ.
މި ރަސްމިއްޔާތު ޝަރަފުވެރިކޮށްދެއްވައި އެސިސްޓެންޓް ކޮމިޝަނަރ އޮފް ޕޮލިސް އަޙްމަދު ޢަބްދުއްރަމާން ދެއްކެވި ވާހަކަފުޅުގައި، ދަރިވަރުން މިއަދު ތިޔަ ހިފީ ގައުމުގެ އަމަން ބަލަހައްޓާ ފުލުހުންގެ އަތުގައި ކަމަށް ވިދާޅުވެ، އުނގަންނައި ދީފައިވާ އެއްޗެހީގެ ބޭނުން ރަނގަޅު ގޮތުގައި ހިފުމަށް އިލްތިމާސްކުރެއްވިއެވެ. އަދި ފުލުހުންނާ ގުޅިގެން ސްކޫލު ސަރަހައްދުގެ ޓްރެފިކް ބެލެހެއްޓުމަށް އިސްނެގި ކަމަށްޓަކައި ޝުކުރު އަދާކުރެއްވިއެވެ.
އަދި މިއަދު ދަރިވަރުންނަކީ ބެލެނިވެރިންނާއި މުދައްރިސުންނަށް މަގުމަތީގައި އަމަލުތައް ބަހައްޓަންވީގޮތް ބުނެދޭ ދަރިވަރުން ކަމާއި މަގުމަތީގައި މީހަކު ޓްރެފިކް ވައިލޭޓްވާނަމަ އެއީ ގޯސްކަމެއްކަން މީހުންނަށް ހަނދާންކޮށްދޭންވާނެ ކަމަށާއި ތިޔަކުދިން އާއިލާއާއެކު މަގުމަތީގައި އުޅޭއިރު ވެސް މީހަކު ޓްރެފިކް ވައިލޭޓް ކުރާނަމަ ބޮޑުމީހަކު މެދުވެރިކޮށް އެމީހުންނަށް ރަނގަޅުގޮތް ބުނެދޭންވާނެކަމަށާ އަދި ކުދިން މިއަދު ތިޔަ ނުކުންނަނީ ވަރަށް ބޮޑު ޒިންމާއެއް ކޮނޑުގައި އަޅައިގެން، މިގައުމުގެ މަގުމަތީގެ ރައްކާތެރިކަން ކަށަވަރުކޮށްދޭންކަމަށް ވިދާޅުވިއެވެ.
އޭގެ އިތުރުން، ދަރިވަރުން އަބަދުވެސް ވާންވާނީ އެންމެ ނަމޫނާ ބަޔަކަށް ކަމަށާއި އަޒުމު ކަނޑައަޅަންވީ ތިޔައިން ކޮންމެ ކުއްޖަކީވެސް މަގުމަތީގެ އަދަބުތަކަށް ހުރުމަތްތެރިކޮށް ހިތާނެ ކުއްޖަކަށްވުމަށް ކަމާށާ އަދި ހިތްވަރާއެކު ބުނަންވީ ‘’މަ ޒިބްރާ ކްރޮސް ނޫން ތަނަކުން މަގު ހުރަސް ނުކުރާނަން'' ކަމަށް ވިދާޅުވިއެވެ. އަދި ދަރިވަރުންގެ ފަރާތުން އެހެން މީހުންނަށް މަގުމަތީގެ ސަލާމަތާއި ރައްކާތެރިކަމާ ގުޅޭ މައުލޫމާތު ފޯރުކޮށްދިނުމަށާއި ދަރިވަރުންގެ ކުރިއެރުމަށް ކުރާ ކޮންމެ ކަމަކަށް ދިވެހި ފުލުހުންގެ ޚިދުމަތުން މަރުހަބާ ކިޔާނެކަމަށް ވިދާޅުވިއެވެ.
ނޮވެމްބަރު 4 އިން 11 އަށް ހުރަވީ ސްކޫލު ދަރިވަރުންނަށް ކުރިއަށް ގެންދިޔަ ޓްރެފިކް މޮނީޓާސް ޕްރޮގްރާމް އެ ސްކޫލުގެ 33 ދަރިވަރުން ފުރިހަމަކޮށްފައިވެއެވެ.