ދަރިމައިވުމުގައި ތަފާތު އެކިކަހަލަ އުނދަގޫތަކާއި ކުރިމަތިލާ މީހުން އަހަރެމެންގެ ތެރޭގައި ވަރަށްވެސް ގިނައެވެ. ދުނިޔޭގެ ސިއްހަތު ޖަމުއިއްޔާއިން ހާމަކުރާ ގޮތުގައި ކޮންމެ 10 އަންހެނުން ކުރެ އެކަކީ ދަރިމައިވުމުގައި އުނދަގޫތަކެއް ހުންނަ މީހެކެވެ. ދަރިމައިވުމަށް ހުންނަ އުނދަގޫތަކަކީ އޭގެ ޠަބީއަތުގައި ފިލައިގެންވެސް ހިނގައިދާނޭ ކަންކަމެވެ. ނަމަވެސް އެ އުނދަގޫތައް ފިލާނުގޮސް، ދަރިން ނުލިބި ގިނަދުވަސްވެ، އެކަމުގެ އުންމީދު ޠަބައީ ގޮތުން ޑަކްޓަރުން ކަނޑާލާ ހިސާބުން، ޑަކްޓަރުން ބުނެދޭ އިހްތިޔާރީ ފުރުސަތަކީ އިން-ވިޓްރޯ-ފާޓިލައިޒޭޝަން ނުވަތަ އައި.ވީ.އެފް ގެ ފުރުސަތެވެ. މިއީ މިގޮތަށް، ޠަބައީ ގޮތުން ދަރިމައިނުވާ އަންހެނުން، ދަރިމައި ކުރުމަށް ހާއްސަ ސިއްހީ ފަރުވާއެކެވެ.
ދަރިމައިނުވުމުގެ ސަބަބުން އަންހެނުންނަށް ދިމައިވާ ނަފްސާނީ ނުތަނަވަސްކަމާއި މާޔޫސްކަމަށް އަދުގެ ފަންނިއްޔާތު ހޯދައިދިން އައި.ވީ.އެފް ގެ ހިދުމަތަކީވެސް ގިނަ ބަޔަކު ހޯދާ ލިބިގަންނަ ހިދުމަތެކެވެ. ކޮންމެ ގައުމެއްގައިވެސް މިކަން އޮތީ މިގޮތަށެވެ. މި ދިވެހިރާއްޖޭގައިވެސް އައި.ވީ.އެފް ގެ ހިދުމަތް ލިބިގަނެ ދަރިމައިވެފައިވާ އެތައް މަޔަކު އެބައުޅެއެވެ. މިއީ މީގެ ކުރިން ދިވެހި ފަސްގަނޑުން ލިބެން ހުންނަ ހިދުމަތެއް ނޫން ނަމަވެސް މިއަދު މިއީވެސް މި ރާއްޖޭގައި ލިބޭ ހިދުމަތެކެވެ. މީގެ އިތުރުން އައި.ވީ.އެފް އަކީ އެ ހިދުމަތަކަށް ބޮޑެތި ހަރަދުތަކެއް ކުރަން ޖެހޭ ހިދުމަތެއް ކަމުން މިއީ ބައެއް އާއިލާތަކަށް އުފުލަން ބޮޑު ތަކުލީފަކަށް ވެގެން ދެއެވެ.
އައި.ވީ.އެފް ހަދުމަތް ހޯދަން ޖެހޭ ބައެއް ސަބަބު ތަކުގެ ތެރޭގައި ބިސް ދަތުރުކުރާ ހޮޅިއަށް ޖެހޭ އެކިކަހަލަ މައްސަލަތަކުގެ ސަބަބުންނާއި އެންޑޯމެޓްރިއޯސިސް އަދި ޕީ.ސީ.އޯ.އެސް ނުވަތަ ބިސްރަވައިގައި ފެންކޮތަޅު އުފައްދާ ބަލި ހިމެނެއެވެ. މީގެ އިތުރުން ފިރިހެންމީހާގެ ދަރިފަނީގެ ބާރު ދަށްވުމުގެ ސަބަބުން ދަރިމައިނުވާ މީހުންނަށްވެސް އައި.ވީ.އެފް ގެ ހިދުމަތަކީ ހޯދިދާނެ ހިދުމަތެކެވެ. އައި.ވީ.އެފް ގެ ހިދުމަތް ހޯދުމުގައި ވިސްނަން ވީ އަނެއް ކަމަކީ، މިއީ އެންމެ ފަހު ގޮތް ކަމެވެ. ދަރިމައިވުމަށް ތަފާތު އެތަކެއް ފަރުވާތަކެއް ހޯދުމަށް ފަހުގައިވެސް އެ ނަސީބު ނުލިބޭނަމަ، އައި.ވީ.އެފް ގެ ހިދުމަތް ހޯދިދާނެއެވެ.
އައި.ވީ.އެފް ހަދާ ގޮތަކީ ކޮބައިތޯވެސް އެނގުމަކީ މުހިއްމު ކަމެކެވެ. މިއީ އަންހެނާގެ ހަށިގަނޑުގެ ތެރެއަށް ޖަހާ އިންޖެކްޝަންތަކަކާއި ހިސާބުން ފެށޭ ފަރުވާއެކެވެ. މި ބޭސް ތަކުގެ ސަބަބުން އަންހެނާގެ ބިސްރަވައިގާ ބިސްތައް، ތަސައްރަފު ފުދި، އެއްފަހަރާ ގިނަ ބިސްތަކެއް ބިސްރަވައިން ނުކުންނާނެއެވެ. މިގޮތަށް ބިސްތައް ނުކުތުމާއި އެކު އަދި އެ ބިސްތައް އޭގެ އެއްމެ ފުރިހަމަ ކަންމަތީ ފައްކާ ކުރުމަށް އިތުރު އިންޖެކްޝަނެއް ޖަހާނެއެވެ. މިއަށް "ޓްރިގާ ޝޮޓް" އޭ ކިޔައެވެ.
ޓްރިގާ ޝޮޓް އަށް ފަހު 34 ގަޑިއިރާއި 36 ގަޑިއިރާއި ދެމެދުގެ ވަގުތެއްގައި އެ ބިސްތައް، އަންހެން މީހާގެ ބިސްރަވައިން ނަގާނެއެވެ. މި ކަމަށް ކުޑަކުޑަ އޮޕަރޭޝަނެއް ފާޑު ކަމެއް ކުރާނެއެވެ. އާއްމުކޮށް އައްސިކޮށްގެން ނުވަތަ ހޭނައްތައިގެން ކުރާ މި އޮޕަރޭޝަނެއް ފަދަ ކަމަކީ އަންހެނާގެ ކުރިމަތިފަރާތުން މި ކަމަށް ހާއްސަކޮށްފައި ހުންނަ އާލާތްތަކެއް ބޭނުންކޮށްގެން، ސްކޭން މެޝިނުގެ އެހީގައި، ބިސްރަވައާއި ހަމައަށް އެ އާލާތްތައް ފޯރުކޮށް ބިސްތައް ނަގާ ނެގުމެކެވެ. މިގޮތަށް ބިސްތައް ނެގުމަށްފަހު އެ ބިސްތަކަށް ހާއްސަކުރެވިފައިވާ ތަންތަނުގައި އެ ބިސްތައް ބަހައްޓާނެއެވެ (ލެބޯޓްރީގައި). އެއަށްފަހު ފިރިހެނާގެ ދަރިފަނިވެސް ނެގުމަށްފަހު، ދަރިމައިކުރުވުމުގެ މަރުހަލާ، ލެބޯޓްރީގައި ކުރިއަށް ގެންދާނެއެވެ. މިގޮތަށް ނެގޭ ބިސްތަކުން ދަރިމައިވާ ބިސްތަކުން، އެއްމެ ދުޅަހެޔޮ ބިސް މައިމީހާގެ ރަހިމުގެ ތެރެއަށް އަނެއްކާ ލާނެއެވެ. މިގޮތަށް އަންހެނާގެ ބިސްރަވައިން ބިސް ނެގުމާއި، ދަރިމައިވެފައިވާ "ނުޠުފާ" މައިމީހާގެ ރަހިމުގެ ތެރެއަށް ލެއްވުމާއި ދޭތެރޭ ހޭދަވާނީ އެވްރެޖްކޮށް ތިން ދުވަހާއި ފަސް ދުވަހުގެ މުއްދަތެކެވެ.
މި މަރުހަލާ ފުރިހަމަވުމާއި އެކު، އެ އަންހެން މީހާއީ ބަލިވެއިން މާބަނޑު އަންހެނެއް ކަމުގައި ވެދެއެވެ. އަދި އެއީ ބަލާ ރައްކާވެގެން އުޅެން ޖެހިއްޖެ މީހެއްކަމުގައިވެސް ވެދެއެވެ. ދަރިމައިނުވުމަށް ނުވަތަ ދަރިމައިވުމަށް އުނދަގޫ އަންހެނުންނަށް، އައި.ވީ.އެފް އަކީ އުފާވެރިކަމުގެ ހަބަރެކެވެ. މިއީ އެތައް އަންހެނުންނަކާއި ފިރިހެނުންނެއް އުފަލުން ރޮއްވާލާ ހެއްވާލި ހިދުމަތެކެވެ. ހޯދަން އުނދަގޫ އަގު ބޮޑު މި ހިދުމަތް ދިވެހިރާއްޖެއިންވެސް ލިބެން ފެށުމަކީ ދިވެހިންނަށް ލިބޭނެ ލުޔެކެވެ. އަދި އާސަންދަ ފަދަ ނިޒާމެއްގެ ދަށުން މި ހިދުމަތް ލިބޭނަމަ އެއީ އަމުދުން އަދި މާ އުފާވެރި ހަބަރެކެވެ.