އެކިކަހަލަ ޗިޕްސް އަކީ ލުއިކާނާގެ ގޮތުގައި މުޅި ދުނިޔޭގައިވެސް މަގުބޫލު އެއްޗެކެވެ. ހާއްސަކޮށް އެކިކަހަލަ އަލުވި ނުވަތަ ޕޮޓޭޓޯ ޗިޕްސް އަކީ މިގޮތަށް ފާހަގަ ކޮށްލެވޭ އެކައްޗެވެ. ޕޮޓޭޓޯ ޗިޕްސް ގެ އެކި ވައްތަރުތައް ހުންނަ އިރު އެކި ބުރޭންޑްތައްވެސް ހުރެއެވެ. އެގޮތުން މަޝްހޫރު އެއް ބްރޭންޑަކީ "ލޭސް" ބްރޭންޑެވެ.

މި ބްރޭންޑުގެ ޕޮޓޭޓޯ ޗިޕްސް ޕަކެޓެއް ކަނޑާލާ މަންޒަރު "އެކްސް" ގައި ވަނީ މި ފަހަކުން އާއްމު ވެފައެވެ. އިންޑިޔާގެ ޒުވާނަކު ކުރި މި ޕޯސްޓަށް އާދަޔާ ހިލާފު މަގުބޫލުކަމެއް ލިބުނީ މި ވީޑިއޯގައި ފެންނަ ގޮތުން އެ ޕަކެޓުގެ ތެރޭގައި ވަނީ އެއްމެ ދެ ޗިޕްސް ފޮއްޗެވެ. މުޅި ޕެކެޓަށް ވަނީ ވައި ޖަހާފައެވެ. ޕޮޓޭޓޯ ޗިޕްސް ޕެކެޓުތަކަށް ވައި ޖަހާފައި، ޗިޕްސް މަދުން އަޅާފައި ހުންނަ ކަމުގެ ޝަކުވާ އަކީ ގިނަ ޝަކުވާއެކެވެ. އެގޮތުން 2020ވަނަ އަހަރުގައި އިންޑިޔާގެ ދަރިވަރުންތަކެއް ވަނީ އެކިކަހަލަ ޕޮޓޭޓޯ ޗިޕްސް ޕަކެޓުތަކުން ކަނދުފައްޗެއްޗެސް ހަދާފައެވެ. އަދި އެ ކަނދުފަތީގައި ފަލިޖަހާ މަންޒަރުވެސް އެ ދަރިވަރުން ވަނީ ދައްކުވައިދީފައެވެ. އެ ދަރިވަރުންގެ މަގުސަދަކަށްވީ، މިގޮތަށް ޕޮޓޭޓޯ ޗިޕްސް ޕެކެޓުތަކަށް ވައިޖަހާފައި ހުންނަކަން އާއްމުކުރުމެވެ.

މަޝްހޫރު "ލޭސް" ބްރޭންޑުގެ ޕޮޓޭޓޯ ޗިޕްސް ޕެކެޓަކުން އެއްމެ ދެ ފޮތި ޗިޕްސް ފެނުން ވެގެން ދިޔައީ އެ ކުންފުންޏަށް ގިނަބައެއްގެ ފާޑުކިޔުން އަމާޒުވީ ކަމަކަށެވެ. މީގެ އިތުރުން އިސްރާއީލަށް ވާގިވެރިވާ ކުންފުއްޏެއްގެ ގޮތުގައިވެސް "ލޭސް" ވަނީ ފާހަގަވެފައެވެ. އަދި މި ފަހުން މަޝްހޫރު ފުޓުބޯޅަ ކުޅުންތެރިޔާ، މެސީ ވެސް ވަނީ އެ ކުންފުންޏާއި އެކު ޕާޓްނާޝިޕް އެގްރީމެންޓެއްވެސް ހަދާފައެވެ.

ވިޔަފާރީގައި މަކަރު ހެދުމާއި އޮޅުވާލުން މިހާރަކަށް އައިސް ހުންނަނީ އިންތިހާއަށް ބޮޑުކޮށެވެ. ފާޅުގައްޔާއި ސިއްރުގައި މިފަދަ އޮޅުވާލުންތައް އޮޅުވާލާއިރު ވިޔަފާރިވެރިން މިކަންކަމާ އެއްވެސް ފަރުވާލެއް ބަހައްޓާތީ ނުފެނެއެވެ. ޕޮޓޭޓޯ ޗިޕްސް ޕަކެޓެއްގައި އެއްމެ ދެ ފޮތި ޗިޕްސް އޮތުމަކީ ކަނޑައެޅިގެން އޮޅުވާލުމެކެވެ.