މޭގަނޑު ހިވަނީ ފިތިގެން ގޮސް ފަޅައިގެން ހިނގައިދާނެ ހެންނެވެ. ﷲ އާ މެދު ގޯސްކޮށެއް ހިޔެއް ނުކުރާނަމެވެ. އަހުރެންގެ މަންމައަށް ވުރެ ވެސް އެ ކަލާނގެ އަހުރެން ދެކެ ލޯބިވެއެވެ. މިއީ ދުނިޔެއާއި އާޚިިރަތަށް ފައިދާކުރާނޭ ހިތި ބޭހެކެވެ. މިއީ މެސެޖެކެވެ. ނިޢުމަތް ދެއްވަނީ ﷲ އެވެ. ކިބުރުވެ ބޮޑާ ނުވާށެވެ. ތިބާއަކީ ދެއްވީމާ ކައިގެން އުޅޭ ނިކަމެތި އިންސާނެކެވެ. ﷲ ހެއްދެވި، އެ ކަލާނގެ އަޅެކެވެ. 

ޙަޔާތަކީ އިމްތިޙާނެކެވެ. އެއީ ފޮނިކަމާއި އަރާމު އެކަނި އޮތް ތަނެއް ކަމުގައި ﷲ ވަޙީ ނުކުރައްވަތެވެ. ޙަޔާތަކީ ދަތި އުނދަގޫ އެއްޗެކެވެ. ނަބީބޭކަލުންނާއި ރަސޫލު ބޭކަލުންނަށް ވެސް ހަމަ އެފަދައެވެ. އެހެނަސް ހަޔާތުގެ އުނދަގުލާއި ތުރާލުގެ ނަތީޖާ، މުޢުމިނުންނަށް ތަފާތެވެ. އެ މީހުންނަށް ދިމާވާ ހިތާމަތަކަކީ މާނައެއް ނެތް، ފައިދާއެއްނެތް، ބޭކާރު އެއްޗެއް ނޫނެވެ. އެއީ ފިލާވަޅެކެވެ. ޢިބުރަތެކެވެ. ހަނދާން ކޮށްދިނުމެކެވެ. އަދި އެއީ ދާއިމީ ޙަޔާތަށް ރައްކައުކުރެވޭ ޚަޒާނާ އެކެވެ.

ﷲ މިންވަރު ކުރައްވާ ކޮންމެ ކަމެއްގައި ވެސް ފައިދާތަކެއް ވެއެވެ. އެކަން އަހަރެމެންގެ ކޮށި ބުއްދިއަށް ނުވިސްނިދާނެއެވެ. އެތައް އަހަރުތަކެއް ފަހުން އެއީ ރަނގަޅަކަށް ވީ ކަމެއް ކަން ބުނެވޭ ފަހަރު ވެސް އަންނަނީ މަދެއްކޮށް ނޫނެވެ. ކުޑަ ކުއްޖެއް މިސާލަކަށް ބަލައިލަމާ ހިނގާށެވެ! އެ ކުއްޖާ ބޭނުންވީ ތޫނު ވަޅިއަކާ ކުޅޭށެވެ. އޭނާގެ މަންމަ އެ ވަޅި އަތުލިއެވެ. އެ ކުއްޖާ ގިސްލަގިސްލާފައި ރުޔެވެ. "އެއީ ހާދަހާ ނުބައި މަންމައެކޭ" އަޅުގަނޑުމެން ބުނާނެތޯއެވެ؟ ނުބުނާނެއެވެ. އަޅުގަނޑުމެން ބުނާނީ "މަންމަ އަށް ވިސްނޭތީ، ގެއްލުމާއި ހަލާކުން ދަރިފުޅު ސަލާމަތްކޮށްދިނީއެވެ." އެ ކުއްޖާ ފަހުން ބުނާނެއެވެ. "މަންމަ އަހުރެން ދެކެ ހާދަހައި ލޯބިވެއެވެ."

އިމްތިޙާނުތައް ކުރިމަތިވާ ހިނދު އަހުރެމެންނަށް މުޅީން ވެސް ވިސްނެނީ ނުލިބުނު ނަޞީބާ މެދުގައެވެ. ލިބިފައިވާ ނިޢުމަތްތަކާ މެދު ވިސްނައެއް ނުލެވެއެވެ. ލިބިފައިވާ ހެޔޮ ނަޞީބާ މެދު ނިކަން ވިސްނައިބަލާށެވެ! ފަހަރަކު ނިޢުމަތެއް ހިތަށް ގެނެސް އެ ނިޢުމަތްތަކަށް ޓަކައި ﷲ އަށް ޝުކުރު އަދާކޮށްބަލާށެވެ! އެއީ އިންސާނަކަށް އަމިއްލަ އަށް ކުޅަދާނަވާ ވަރުގެ ކަންކަމެއް ނޫނެވެ. މާތް ﷲ ގެ އޯގާވަންތަކަމާއެވެ! ދުނިޔޭގެ ޙަޔާތް ބާއްޖަވެރިކުރުމަށް ހޭބޯނާރައި އުޅޭ އުޅުމުގައި ބައެއް ނިޢުމަތްތަކުން މަޙްރޫމުވާކަން ވެސް އެއީ ހާދަހާ ބޮޑު ނިޢުމަތެކެވެ. އެހެން ނޫން ނަމަ އާޚިރަތްދުވަސް މަތިން ގިނަފަހަރު ހަނދާނެއް ވެސް ނުވީހެވެ. އެހައިރުން ޣާފިލްކަންމަތީ ހުއްޓާ މަރު އައިސް ބައްދަލު ކޮށްފާނެތެވެ. ފާފަތަކާއި އަނިޔާވެރިކަމުން ފުރިފައިވާ ފޮތަކައިގެން މާތް ﷲ އާ ބައްދަލުކުރާން ޖެހިދާނެއެވެ. އެކަން ވާނީ ހިތާމައަކަށެވެ.

އައު ފައިވާނެއް ނުވަތަ ބޫޓެއް ނުލިބިގެން މީހަކު ހިތާމަކުރަނީއެވެ. ފަޤީރުކަމުގެ ސަބަބުން ބޫޓެއް ގަނެވޭ ފެންވަރު ނެތީއެވެ. ހިތާހިތުން އޭނާ ބުނަމުންދެއެވެ. އަހަންނަކީ އެންމެ ބޮޑު ބަދުނަސީބު ވެރިޔާއެވެ. މިހެން އުޅެނިކޮށް އޭނާ އަށް ފެނުނީ ދެފައި ނެތް މީހެކެވެ. އެވަގުތު އޭނާގެ ނަސީބުވެރިކަން އޭނާ އަށް އިޙްސާސްކުރެވުނެވެ. ބަލަންވީ އަހަރުމެނަށް ވުރެ ނިކަމެތިންގެ ހާލަށެވެ!

ދުނިޔޭގެ ޙަޔާތަކީ މަޤްޞަދެއް ނޫނެވެ. އެއީ އާޚިރަތް ބާއްޖަވެރި ކުރުމަށް އޮތް ވަޞީލަތެކެވެ. ނިޢުމަތެއް ލިބިއްޖެއްޔާ އެ ނިޢުމަތް ދެއްވި ﷲ އަށް ޝުކުރުވެރިވާށެވެ! މާތް ﷲ ރުއްސަވާ ގޮތުގައި އެ ނިޢުމަތެއް ބޭނުންކުރާށެވެ! ހަމައެހެންމެ ޙަޔާތުގައި ދިމާވާ ހިތްދަތިކަމާ ހިތާމަތަކަށް ކެތްތެރިވާށެވެ! އެއީ ފިލާވަޅުތަކެއް ކަމުގައި ދެކޭށެވެ! އޭގައި ކޮންމެ ވެސް ހެވެއް އޮންނާނެއެވެ! ލިބުނު ހިތާމައިން ޘަވާބާއި ދަރުމައަށް އެދޭށެވެ! މާތް ﷲ ތިބާއަށް ބަދަލު ދެއްވާނެތެވެ.

 

(މާތް ﷲ ތިބާ އަށް ބަދަލު ދެއްވާނެތެވެ. - އައްޝެއިޚް ޖަޢުފަރު މުޙައްމަދު ޢުޘްމާނު؛ ދީނުގެ މަގު، އަހަރު 3، އަދަދު 48، ޞ.2، މަޖައްލާގެ ޢަދަދު 151 - 24 ނޮވެންބަރު 2023)