ކީރިތި ޤުރްއާން ކިޔެވުމުގެ 36 ވަނަ ޤައުމީ މުބާރާތުގައި ބައިވެރިވުމަށް 17 ޑިސެންބަރު 2023 އިން 18 ޖަނަވަރީ 2024 ގެ ނިޔަލަށް ވަނީ ހުޅުވާލައިފައެވެ.
މި މުބާރާތުގައި ރަޖިސްޓްރީ ވުމަށް ހަމަޖެހިފައިވަނީ، މުބާރާތަށް ހާއްސަ ކުރެވިފައިވާ ޕޯޓަލް މެދުވެރިކޮށެވެ. ރަޖިސްޓްރީވުމަށް ބޭނުންވަ ޕޯޓަލް ލިންކް މިހާރު ވަނީ ގެޒެޓް ކުރެވި، ކީރިތި ޤުރްއާނާ ބެހޭ ޤައުމީ މަރުކަޒުގެ ސޯޝަލް މީޑިއާ އެކައުންޓްތަކުގައި ހިއްސާ ކުރެވިފައެވެ.
މި މުބާރާތް ހުޅުވާލާފައިވަނީ ޙާފިޡުންނަށާއި، ސްކޫލްތަކުގެ ދަރިވަރުންނަށާއި، ޔުނިވަރސިޓީތަކާއި، ކޮލެޖްތަކާއި، އިންސްޓިޓުއުޓް ނުވަތަ މަރުކަޒުތަކާއި، ޤުރްއާން ކުލާސްތަކާއި، ޤުރްއާނުގެ ދާއިރާ ނުވަތަ ދީނީ ގޮތުން ހޭލުންތެރި ކުރުވުން އެ ފަރާތެއްގެ މަޤުޞަދުތަކުގެ ތެރޭގައި ހިމެނޭ ކުލަބު ޖަމްޢިއްޔާތަކަށެވެ.
މި މުބާރާތް ބޭއްވުމުގެ މަޤްޞަދަކީ ދިވެހިންގެ ހިތްތަކުގައި ކީރިތި ޤުރްއާން ކިޔެވުމަށް ލޯބިޖައްސައި ޤުރްއާނުގެ ފަންނު އާލާކޮށް، ކީރިތި ޤުރްއާން ހިތުދަސްކުރުމަށް ބާރު އަޅައި ބައިނަލް އަޤްވާމީ މުބާރާތްތައް ބައިވެރިން އުފެއްދުމާއި، ދިވެހި ރައްޔިތުންނަށް ޤުރްއާން މުބާރާތުގައި ބައިވެރިވުމުގެ ފުރުޞަތު ހޯދައިދިނުމެވެ.
މި މުބާރާތް ފެށުމަށް ހަމަޖެހިފައިވަނީ 23 ފެބުރުއަރީ 2024 ގައެވެ.