ޗައިނާގެ ރައީސް ޝީ ޖިންޕިން އަށް ރާއްޖޭގެ ރައީސް ޑރ. މުހައްމަދު މުއިއްޒު ތައުޒިޔާގެ މެސެޖެއް ފޮނުއްވައިފިއެވެ.

މިއީ ޗައިނާގެ ގަންސޫ ޕްރޮވިންސަށް ކުރިމަތިވި ބިންހެލުމާގުޅިގެން އެތައްބަޔަކު މަރުވެ، އެތައްބަޔަކު ޒަޚަމްވެ އެތައްބަޔަކަށް އަސަރުކޮށް ކުރިމަތިވެފައިވާ ހާދިސާއާ ގުޅިގެން ފޮނުއްވި މެސެޖެކެވެ.

ރައީސްގެ މެސެޖުގައި މި ހާދިސާގެ ޚަބަރު އެއްސެވީ ފުންހިތާމައާއެކުކަން ފާހަގަކުރައްވައި ހިތާމައިގެ މި ދަނޑިވަޅުގައި، ދިވެހި ސަރުކާރާއި ރައްޔިތުންނާއި، ރައީސުލްޖުމްހޫރިއްޔާގެ އަމިއްލަ ނަންފުޅުގައި، ޗައިނާގެ ރައީސާއި، ސަރުކާރަށާއި، ރައްޔިތުންނަށާއި، ޚާއްޞަކޮށް މަރުވި މީހުންގެ ޢާއިލާތަކަށް އިޚްލާޞްތެރިކަމާއެކު ހަމްދަރުދީ ފޮނުއްވިއެވެ.

މީގެ އިތުރުން މި ޙާދިސާގެ ސަބަބުން ލިބުނު ގެއްލުންތަކުން އަރައިގަތުމަށް ކުރެވެމުންދާ މަސައްކަތުގައި ކާމިޔާބީއަށް ވެސް ވަނީ ރައީސް އެދިވަޑައިގެންފައެވެ.