ކަރަންޓުގެ ޚިދުމަތަށް 75 އަހަރު ފުރުން ފާހަގަކުރުމުގެ ގޮތުން ރާއްޖޭގައި ހިންގޭ އެންމެ ބޮޑު ހަކަތައިގެ މަޝްރޫޢު އަންނަ އަހަރު ފަށާނެ ކަމަށް ސްޓެލްކޯގެ މެނޭޖިންގ ޑިރެކްޓަރ، ހުސެއިން ފަހުމީ ވިދާޅުވެއްޖެއެވެ.
ސްޓެލްކޯގެ އެމްޑީ ފަހުމީ މިހެން ވިދާޅުވީ، އެ ކުންފުނިން ދެމުން އަންނަ ކަރަންޓުގެ ޚިދުމަތަށް 74 އަހަރު ފުރުމުގެ މުނާސަބަތު ފާހަގަކުރުމުގެ ގޮތުން ދެއްވި ވީޑިއޯ މެސެޖެއްގައެވެ.
"ކަރަންޓުގެ ޚިދުމަތުގެ އަލިމަސްޔޫބިލްއާއި ގުޅުވައިގެން އިރާދަކުރެއްވިއްޔާ ރާއްޖޭގައި ހިންގޭ އެންމެ ބޮޑު އަދި ބިޔަ ހަކަތައިގެ މަޝްރޫޢު އަޅުގަނޑުމެން މިއަންނަ އަހަރު ފަށާނަން،"
"އެ ޕްރެޖެކްޓާއެކު މި ސިނާޢަތުގައި މަސައްކަތްކުރާނެ މީހުން ތަމްރީނު ކުރުމުގެ ބޮޑު ޕްރޮޖެކްޓެއްވެސް އަޅުގަނޑުމެން ހިންގާނަން." ފަހުމީ ވިދާޅުވިއެވެ.
ފަހުމީ ވިދާޅުވީ، އެ ކުންފުނިން އެންމެ ފުރަތަމަ ކަރަންޓު ޚިދުމަތްދޭން ފެށީ ވަރަށް ހާލުގައި ކަމަށާއި، އޭރު ހުރިހާ ކަމެއް ކުރިއަށްގެންދިޔައީ މެނުއަލްކޮށް ކަމަށެވެ. އެހެންނަމަވެސް، މިހާރު އެ ޚިދުމަތްތައް ދެމުން ގެންދަނީ ހައި-ސްޕީޑް އަދި މީޑިއަމް-ސްޕީޑް އިންޖީނުގެ އެހީގައި އޮޓޮމޭޓެޑް އެސްކާޑާ ސިސްޓަމް ބޭނުންކޮށްގެން ކަމަށެވެ. އަދި މި ޒަމާނުގައި ކަރަންޓު ޚިދުމަތްދެމުން ގެންދަނީ އަންޑަ ގްރައުންޑް ކޭބަލް ވަޅުލައިގެން ކަމަށް ވެސް ފަހުމީ ފާހަގަކުރެއްވިއެވެ.
ފަހުމީ އިތުރަށް ވިދާޅުވީ، މި ސިނާޢަތް ފެށިގެންއައިއިރު އެއްވެސް ވަރަކަށް އަންހެން ބޭފުޅުންގެ ބައިވެރިވުން ނެތް ނަމަވެސް، މިއަދު އެ މަންޒަރު މުޅިން ބަދަލުވެފައިވާ ކަމަށެވެ. އެގޮތުން، މިއަދު މި ސިނާޢަތުގައި އިންޖިނޭރުންނާއި، ޓެކްނީޝަނުންގެ ގޮތުގައި ވެސް އަންހެން ބޭފުޅުން މަސައްކަތްކުރައްވަމުން ގެންދަވާކަމަށާއި، އެހެނިހެން ފީލްޑްގައި ވެސް އަންހެނުންގެ ބައިވެރިވުން އިތުރުވެފައިވާ ކަމަށް ވެސް ފަހުމީ ވިދާޅުވިއެވެ.
މި ސިނާޢަތުގައި ކުރިއަށްދިއުމުގެ ފުރުޞަތު އޮތީ ހަމައެކަނި ފިރިހެނުންނަށް އެކަނި ނޫން ކަމަށާއި، އަންހެން ބޭފުޅުންނަށް ވެސް އެ ފުރުޞަތު އެބައޮތްކަން ފާހަގަކުރައްވައި، ފަހުމީ ވިދާޅުވީ މިވަގުތު ސްކޮލާޝިޕްގައި ވެސް މަތީ ތަޢުލީމު ފުރިހަމަކުރައްވަމުން ގެންދަވާ ފަރާތްތަކުގެ ތެރޭގައި އަންހެން ބޭފުޅުން ހިމެނޭ ކަމަށެވެ.
މީގެއިތުރުން، މިއަންނަ އަހަރު 100 މެގަވޮޓްސް ޕަވާޕްލާންޓެއް އެޅުމުގެ މަސައްކަތް ފަށައި އޭގެތެރެއިން ގިނަ އަދަދަކަށް ސްކޮލާޝިޕްގެ ފުރުޞަތު ހުޅުވިގެންދާނެ ކަމަށް ވެސް ފަހުމީ ވިދާޅުވިއެވެ.
ނިންމާލަމުން ފަހުމީ ދެއްކެވި ވާހަކައިގައި، އެ ކުންފުނިން ޚިދުމަތްދިނުމުގައި ވަކި މީހަކަށް ތަފާތު ކުރުމެއް ނޯންނާނެ ކަމަށާއި، އަމާޒަކީ މިއަދަށްވުރެ ފުރިހަމަ އަށް މާދަމާ ދެވޭ ޚިދުމަތް ފުރިިހަމަކޮށްދެއްވުން ކަމަށާއި، ލުއިފަސޭހަކަމާއެކު ޚިދުމަތްދެވޭނެ މަގުފަހިކޮށްދެއްވުމުގެ މަސައްކަތްކުރިއަށްދާ ކަމަށެވެ. އަދި ދުރުނޫން މުސްތަގްބަލެއްގައި ސްމާޓް މީޓަރު ޕްރޮޖެކްޓެއް ކުރިއަށްގެންދިއުމަށް ރޭވިފައިވާ ކަމަށާއި، އޭގެ ޛަރިއްޔާއިން ހުރިހާ ރައްޔިތުންގެ ކަރަންޓު ބިލަށް އަރާވަރު ފޯނުން ފެންނަ ގޮތް ހަދާނެ ކަމަށް ވެސް ފަހުމީ ވިދާޅުވިއެވެ. މިއާއެކު، ދުވަހުން ދުވަހަށް ބިލަށް އަރާވަރު ދެނެގަނެވި، ރައްޔިތުންނަށް ކަރަންޓު އިޤްތިޞާދުކުރުމުގައި ނުހަނު ބޮޑު އެހީތެރިކަމެއް ލިބިގެންދާނެ ކަމަށް ވެސް ފަހުމީ ވިދާޅުވިއެވެ.