މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މިދިޔަ ނޮވެންބަރު މަހުގެ ތެރޭގައި މުޅި ޖުމްލަ 4،799 ކޮންޓެއިނަރުގެ ޕެރިޝަބަލް މުދާ  ކްލިއާކޮށްފައިވާ ކަމަށް އެ ކުންފުނީގެ ތަފާސް ހިސާބުތަކުން ދައްކައިފިއެވެ.

އެމްޕީއެލްގެ ތަފާސް ހިސާބުތަކުން ދައްކާ ގޮތުން މިދިޔަ މަހުގެ ތެރޭގައި ދުވާލެއްގެ މައްޗަށް ކްލިއާ ކުރެވުނު ކޮންޓެއިނަރުގެ އަދަދު ވަނީ އޭގެ ކުރީ މަހާ އަޅާބަލާއިރު 9 އިންސައްތަ ދަށަށް ގޮސްފައެވެ. މިދިޔަ އޮކްޓޫބަރު މަހު އެވްރެޖްކޮށް ދުވާލެއްގެ މައްޗަށް 176 ކޮންޓެއިނަރުގެ މުދާ ކްލިއާކޮށްފައިވާއިރު، މިދިޔަ މަހު ދުވާލެއްގެ މައްޗަށް ކްލިއާކޮށްފައިވަނީ 160 ކޮންޓެއިނަރެވެ.

އެ ކުންފުނިން ބުނީ، މިދިޔަ މަހު ކްލިއާކުރި ކޮންޓެއިނަރުގެ ތެރޭގައި؛ 20 ފޫޓުގެ 2،896 ކޮންޓެއިނަރާއި، 40 ފޫޓުގެ 1،903 ކޮންޓެއިނަރު ހިމެނޭ ކަމަށެވެ. އަދި، އެ ކުންފުނިން މިދިޔަ މަހު ކްލިއާކުރި ޖުމްލަ ޓީއީޔޫގެ ޖުމްލަ އަކީ 6،702 އެވެ.

އެ ކުންފުނީގެ ތަފާސް ހިސާބުތަކުން ދައްކާ ގޮތުގައި، އޮކްޓޫބަރު މަހަށް ބަލާއިރު، މިދިޔަ ނޮވެންބަރު މަހު އެތެރެކޮށްފައިވާ ގިނަ ވައްތަރުގެ ޕެރިޝަބަލް މުދަލުގެ އަދަދު ވަނީ ދަށަށް ގޮސްފައެވެ. އެގޮތުން، އޮކްޓޫބަރު މަހާ އަޅާ ބަލާއިރު، ގިނައިން އެތެރެކޮށްފައިވަނީ ދޮންކޭލާއި ކަރާ އެކަންޏެވެ. ދޮންކެޔޮ އެތެރެކޮށްފައިވާ މިންވަރު އޭގެ ކުރީ މަހަށް ވުރެ އެންމެ ދެ އިންސައްތަ އިތުރުވެފައިވާއިރު، ކަރާ ގެނައި މިންވަރު އިތުރުވެފައިވަނީ އިންސައްތައަކަށް ވުރެ މަދުންނެވެ.

މިދިޔަ މަހު އެންމެ ގިނައިން އެތެރެކޮށްފައިވާ ޕެރިޝަބަލް މުދަލުގެ އަދަދު:

ކަރާ 29،069

ދޮންކެޔޮ 9،520

ބަރަބޯ 3،882

އަލަނާސި 8،189

ބިސް 51،961

ކެބެޖް 12،741

ފިޔާ 39،988

އަލުވި 20،575

ޓޮމާޓޯ 14،643

މިދިޔަ ނޮވެންބަރު މަހުގެ ތެރޭގައި މާލޭ ވިޔަފާރި ބަނދަރަށް ޕެރިޝަބަލް މުދާ ހިފައިގެން ކޮންޓެއިނަރު އުފުލާ 15 ބޯޓާއި، 25 ކޮންވެންޝަނަލް ބޯޓު އައިސްފައިވާ ކަމަށް ވެސް އެމްޕީއެލްގެ ތަފާސް ހިސާބުތަކުން ދައްކައެވެ.