ޤައުމެއްގެ ރީތިކަން ބިނާވަނީ އެ ޤައުމަކަށް އަންނަ ޢުމްރާނީ ތަރައްޤީގެ މައްޗަށް އެކަންޏެއް ނޫނެވެ. ބިނާކުރާ އުސް ޢިމާރަތްތަކާއި، ހެދިފައިވާ ރީތި މަގުތަކާއި، ލިބިފައިވާ ތަރައްޤީގެ މައްޗަކަށް ނޫނެވެ. މިފަދަ އެންމެހާ ތަރައްޤީތަކަކީ އެ ޤައުމެއްގެ ބޭރުގައި ލެވިފައިވާ ތޮށިގަނޑެކެވެ. އެ ތޮށިގަނޑު ރީތިވެފައި އެތެރެ ފަސާދަވެފައި އޮވެދާނެއެވެ.

ޤައުމެއްގެ ރީތިކަން ގެއްލި، އެ ޤައުމަކީ ނާމާން، ބިރުވެރި ޤައުމަކަށް ބަދަލުވެގެންދާ މައިގަނޑު އެއް ސަބަބަކީ މާތް ﷲ ނަހީކުރެއްވި ފާފަތައް އާންމުވެ، އެ ފާފަތަކަށް ސިއްރާއި ފާޅުގައި އަރައިގަންނަ ކުށްވެރިން ގިނަވުމެވެ. ކީރިތި ޤުރްއާނުގެ އެތައް އާޔަތެއްގައި ބިން ފަސާދަނުކުރުމަށް މާތް ﷲ ވަނީ އަންގަވައިފައެވެ. މިގޮތުން އެކަލާނގެ ވަޙީކުރައްވައިފައިވެއެވެ.

(އަލް އަޢްރާފް: 56) މާނައި: "ބިން އިޞްލާޙުކުރެއްވުމަށް ފަހު، ތިޔަބައިމީހުން އެ ބިމުގައި ފަސާދަ ނުކުރާށެވެ!" ބިން ފަސާދަކުރުމަކީ؛ އެކަލާނގެ ނުރުއްސަވާ ކަންކަން، އާދެ، ފާފަތައް އެ ބިންމަތީގައި ފެތުރުމެވެ. ފާފަތައް ފެތުރޭވަރަކަށް އެ ޤައުމެއް ފަސާދަވެ ހަލާކުވަމުންދާނެއެވެ. ބޭރުފުށުން ބަލާއިރު ތަރައްޤީއާއި ރީތިކަން ފެނުނު ނަމަވެސް، އެތެރެ ވާނީ ހަލާކުވެފައެވެ.

ޤައުމެއްގައި ކުފުރާއި ޝިރުކުގެ ނުބައިކަން ފެތުރުމަކީ އެންމެ ބޮޑު ފަސާދައެވެ. އެބައިމީހުން ޚަލްޤުކުރެއްވި ކަލާނގެ ދޫކޮށް، އެހެން ފަރާތްތަކަށް އަޅުކަންކުރުމެވެ. އެ ކަލާނގެ ފޮނުއްވި ރަސޫލުންގެ ގޮވައިލުންތަކަށް ނުކިޔަމަންތެރިވުމެވެ. ނުބައި ކުށްފާފަތައް ޢާއްމުކުރުމެވެ. އެފަދަ އެތައް ޤައުމެއް މީގެ ކުރިން މާތް ﷲ ވަނީ ހަލާކު ކުރައްވައިފައެވެ. ހޫދުގެފާނުގެ ޤައުމުގެ މީހުން ކަމުގައިވި ޢާދުބާގައިގެ މީހުންނަކީ ވަރުގަދަ ބައެކެވެ. ތަންތަން ބިނާކުރުމުގައި ކުޅަދާނަ ބައެކެވެ. ޞާލިޙުގެފާނުގެ ޤައުމުގެ މީހުން ކަމުގައިވި ޘަމޫދުބާގައިގެ މީހުންނަކީ ވެސް ހަމަ އެފަދަ ކުޅަދާނަ ބައެކެވެ. ސަބާގެ މީހުންނަކީ ތަނަވަސް ދެ ބަގީޗާއެއްގެ އަހުލުވެރި ބައެކެވެ. މިފަދަ ޤައުމުތައް މާތް ﷲފެ ކޯފާއިން ހަލާކު ކުރެއްވި ކުރެއްވުމަކީ ޢިބްރަތް ޙާޞިލުކުރަން ޖެހޭ ކަމެކެވެ. އެބައިމީހުން ވަނީ ބާރުވެރިކަމާއި، ކުޅަދާނަކަމާއި، ޢުމްރާނީ ތަރައްޤީތައް ހޯދާފައެވެ. އެހެނެއް ކަމަކު، އެބައިމީހުން ހަލާކު ކުރެއްވީ، އެބައިމީހުންނަކީ ކުށްވެރިންކަމުގައި ވީތީއެވެ. އެކަލާނގެ ނަހީކުރެއްވި ކަންކަމަށް އަރައިގަންނަ ބައެއް ކަމުގައި ވީތީއެވެ. ލޫޠުގެފާނުގެ ޤައުމުގެ މީހުންނާއި، ފިރުޢައުނުގެ އަޢުވާނުން ވެސް ހަމަ މިފަދައެވެ.

ބައެއްގެ ތެރޭގައި ބޮޑެތި ފާފަތައް އާންމުވެއްޖެ ނަމަ، އެބައިމީހުންގެ މައްޗަށް އާންމުވެގެންވާ ކޯފާއެއް ލައްވަފާނެކަމަށް ރަސޫލުﷲ صَلَّى اللّٰهُ عَلَيْهِ وَسَلَّم ވަނީ އިންޒާރުދެއްވައިފައެވެ.

މިއަދު ދުނިޔެއަށް ބަލައިލުމުން ފެންނާން އޮތީ ޤަތުލުއާންމުތަކާއި، ހަމަނުޖެހުންތަކާއި، ކޮރަޕްޝަނާއި، ފާހިޝްކަންކަމާއި، ތަފާތު ނުބައި ވަބާއީ ބަލިތަކާއި، ވެއްޓަށް ކުރަމުން އަންނަ ނޭދެވޭ އަސަރުތަކެވެ. މި ކަންކަން ގުޅިފައި ހުރީ މީހުން ކުރާ ކުށްތަކާއެވެ. އެއީ އެބައިމީހުންގެ އަތްތަކުން ހޯދައިގަންނަ ނުބައިކަންކަމުގެ ހިތި ނަތީޖާއެވެ. 

ޤައުމެއްގައި ޙަޤީޤީ ރީތިކަމާއި، އަމަނާއި، ޞުލްޙަމަސަލަސްކަން ޤާއިމުކުރެވޭނީ އެތަނެއްގެ ބަޔަކު މާތް ﷲއަށް ކިޔަމަންތެރިވެ، އެ ކަލާނގެއަށް އުރެދުން މަދުކުރި ވަރަކަށެވެ. ޤައުމީ ރީތިކަމަކީ ކުށްވެރިން މަދުވުމެވެ.

 

(ޤައުމީ ރީތިކަމަކީ ކުށްވެރިން މަދުވުމެވެ. - އައްޝެއިޚް މުޙައްމަދު ސިނާނު؛ ދީނުގެ މަގު، އަހަރު 3، އަދަދު 34، ޞ.2، 18 އޮގަސްޓް 2023)