މުސްލިމް އަޚުންނާއި އުޚްތުން ދުނިޔޭގެ އެކި ކަންކޮޅުތަކުގައި ތަޙައްމަލް ކުރަމުންގެންދާ ދަތި އުނދަގޫތަކަކީ އަޅުގަނޑުމެން އެންމެން ވެސް އެކަމާ ނުހަނު ހިތާމަ ކުރާ ކަންކަމެވެ. ރަސޫލުﷲ صَلَّى اللّٰهُ عَلَيْهِ وَسَلَّم ޙަދީޘް ކުރައްވައިފައިވާ ފަދައިން މުސްލިމުންނަކީ އެއް ހަށިގަނޑެކެވެ. އެ ހަށިގަނޑުގެ ގުނަވަނަކަށް ތަދުވާ ނަމަ މުޅި ހަށިގަނޑަށް އޭގެ އުނދަގޫ ފޯރައެވެ.
ޣައްޒާގެ މުސްލިމުން ތަޙައްމަލްކުރަމުން ގެންދާ ވޭން އަޅުގަނޑުމެންގެ ހިތްތައް ކުދިކުދި ކޮށްފިއެވެ. އެމީހުން ކުރަންޖެހިފައިވާ ހަނގުރާމައިގައި ބައިވެރިވުމަކީ އަޅުގަނޑުމެން ނުހަނު އެދޭ ކަމެކެވެ. ކިތަންމެ ދުރުގައި ތިބި ކަމުގައި ވިޔަސް މި ޒަމާނުގައި އެ ފުރުޞަތު ކޮންމެވެސް ވަރަކަށް އަޅުގަނޑުމެންނަށް ލިބިފައި އެބައޮތެވެ. އާދެ! އެއީ މީސްމީޑިއާގައި ކުރާ ހަނގުރާމައިގައި ބައިވެރިވުމެވެ. މަޢުލޫމާތު ހާމަކުރުމެވެ. މުސްލިމުންގެ ނެރެޓިވް ދުނިޔޭގައި ފެތުރުމެވެ. ހުޅަނގުގެ ދޮގުތައް ބޭޒާރުކުރުމެވެ. މި ހަނގުރާމައިގައި އަޅުގަނޑުމެންގެ ޒުވާން ޖީލު ދައްކަމުންދާ ހިތްވަރާއި ޖޯޝަކީ ފާހަގަކޮށްލަން ޖެހޭ ކަމެކެވެ. ޚާއްޞަ ގޮތެއްގައި މީސްމީޑިއާގެ އެކިއެކި ވަޞީލަތްތަކުން، 'އިންފޮމޭޝަން ވޯ' ގައި ކޮންމެ ދުވަހަކު ވެސް އަޅުގަނޑުމެންގެ އަޚުންނަށް ނަޞްރު ލިބެމުން އެބަދެއެވެ. ޣައްޒާއާއި އެހެނިހެން ޤައުމުތަކުގައި އަޅުގަނޑުމެންގެ އަޚުންނާއި އުޚްތުން ކުރަމުންދާ ޖިހާދުގައި މަތިވެރި ފަތަޙަތައް އެބަ ހޯދައެވެ.
މި ކަމުގައި ވިސްނާލަން ޖެހޭ ބައެއް ނުކުތާތައް އެބަހުއްޓެވެ. ދުޝްމަނުންގެ އަތްތަކުން ޤަތުލުކުރަމުންދާ މުސްލިމް ދަރީން، އެ މީހުންގެ މައިންބަފައިންނާ އެކު ތިބޭނީ ސުވަރުގޭގައިކަމެވެ. ޝަޙީދުންގެ ދާއިމީ ގޮވައްޗަކީ ސުވަރުގެކަމެވެ. އެތައް ބަޔަކަށް ޝަފާޢަތްތެރިވުމުގެ ފުރުޞަތު (އިންޝާ ﷲ) އެ ޝަހީދުންނަށް ލިބޭނޭ ކަމެވެ. މިފަދަ މަތިވެރިކަމެއް އަޅުގަނޑުމެންގެ އަޚުންނާއި އުޚްތުން ހޯދަމުން ދާއިރު އަޅުގަނޑުމެން ވެސް މަސައްކަތް ކުރަންވީ އުޚްރަވީ ޙަޔާތަށް ޕޮއިންޓު ހޯދާ ގިނަ ކުރުމަށެވެ. އެކަން ވާނީ ކުރާ ޢަމަލުތަކަކީ އެ ކަންކަން ޤަބޫލުވެވޭ ޝަރުތުތައް ފުރިހަމަވާ ޢަމަލުތަކަށް ހަދައިގެންނެވެ. އެގޮތުން
1. މާތް ﷲއަށް ޝަރީކަ ނުކުރުމެވެ. ތަޢުޙީދުގެ އަޙުލުވެރިން ކަމުގައި ވުމެވެ.
2. ކުރާ ޢަމަލުތަކުގައި އެކަލާނގެއަށް އިޚްލާޞްތެރި ވުމެވެ.
3. ރަސޫލުﷲ صَلَّى اللّٰهُ عَلَيْهِ وَسَلَّم އަންގަވައިފައިވާ ގޮތަށް ހެޔޮ ޢަމަލުތައް ކުރުމެވެ.
މުސްލިމުންނަށް ނަޞްރު ދިނުމަށް ކުރާ މަސައްކަތުގައި އިސްލާމީ ގިއުގަނޑުތަކާ ޚިލާފު އެތައް ކަމެއް ކުރެވެއެވެ. މިއަދު ފެންނަ ބައެއް މަންޒަރުތަކަކީ އިޞްލާޙު ކުރަން ޖެހޭ ކަންކަމެވެ. އިސްލާމީ މިންގަނޑުތަކާ އެއްގޮތަށް ހެދުން ނާޅާ މީހުން ފެންނަ ފޮޓޯއާއި ވީޑިއޯ ފޮނުވުމެވެ. މިއުޒިކު އެކުލެވޭ ޕޯސްޓުތައް ދައުރުކުރުމެވެ. އެއްވުންތަކުގައި ދެ ޖިންސު މައްސުނިވުމާއި މި ނޫން ވެސް ދީނާއި ފުށުއަރާ އެތައް ކަމެކެވެ. މި ކަންކަން އިޞްލާޙު ނުކުރަންޏާ އަޅުގަނޑުމެންނަށް ލިބޭނީ ކުރިއެރުމެއްގެ ބަދަލުގައި ވެއްޓުމެކެވެ. ސަވާބެއްގެ ބަދަލުގައި އަޒާބެއް ލިބުން އެކަކު ވެސް ނޭދޭނެ އެވެ.
މުސްލިމުން ވާންޖެހޭނީ ނަމޫނާ ބަޔަކަށެވެ. ހުރިހާ ޙާލެއްގައި ވެސް ރަސޫލުﷲ صَلَّى اللّٰهُ عَلَيْهِ وَسَلَّم ގެންނެވި ޝަރީޢަތް ތަންފީޛް ކުރާން ވާނެއެވެ. ނަޞްރު ހޯދުމުގައި ހެޔޮ ރަނގަޅު މަގުތައް ޙިޔާރުކުރާން ވާނެއެވެ. މުސްލިމް އަޚުންނާއި އުޚްތުން ޣައްޒާއާއި އެނޫން ބިންތަކުގައި ހޯދަމުންދާ ފަދަ މަތިވެރިކަމާއި ޝަރަފު އަޅުގަނޑުމެންނަށް ވެސް ލިބޭނީ އޭރުންނެވެ.
(މީސް މީޑިއާގައި މުސްލިމުންނަށް ނަޞްރު ދިނުމުގައި ވިސްނަން ޖެހޭ ކަންކަން - ޖުމައިލް މުޙައްމަދު؛ ދީނުގެ މަގު، އަހަރު 3، އަދަދު 53، ޞ.4، 28 ޑިސެންބަރު 2023)
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން