ފ. ނިލަންދޫ އެއަރޕޯޓް ތަރައްޤީ ކުރުމުގެ މަޝްރޫޢުގެ މަސައްކަތް ފެށުމުގެ ކުރިން ހަދަންޖެހޭ އެންވަޔަރަންމަންޓަލް އިމްޕެކްޓް އެސަސްމެންޓް އަދި ސަރވޭ މަސައްކަތްތައް ސަރުކާރުން މިއަދު އެމްޓީސީސީއާ ހަވާލުކޮށްފިއެވެ.
މި މަޝްރޫޢު ހަވާލުކުރުމަށް މިއަދު ބޭއްވި ރަސްމިއްޔާތުގައި، އެމްޓީސީސީގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރ އަލްފާޟިލް ޢަބްދުﷲ ޒިޔާދެވެ. އަދި މިނިސްޓްރީ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރގެ ފަރާތުން ސޮއިކުރެއްވީ، ސްޓޭޓް މިނިސްޓަރ، އަލްފާޟިލް އިބްރާހިމް ތޮޢާމް މުޙައްމަދު އެވެ.
2300 މީހުންގެ އާބާދީގެ ފ. ނިލަންދޫ އަކީ ޤުދުރަތީ ބޮޑު ފަޅަކާއި ވިލެއްގެ އިތުރުން ހިތްގައިމު ތުނޑިއެއްވެސް އޮންނަ ރަށެކެވެ. ހަމައެހެންމެ، ނިލަންދޫ އަކީ މި އަތޮޅު ވެރިކަން ކުރާ ރަށަށްވުމާއެކު، ގިނަ ރައްޔިތުންތަކެއް ވަޒީފާ އަދާކުރަނީ ސަރުކާރުގެ އެކި އެކި މުއައްސަސާތަކުގައެވެ. އަދި ފ. އަތޮޅުގެ އެހެން ރަށްތަކުންނާއި އަދި ދ. އަތޮޅުގެ ގިނަ ރަށްތަކުންވެސް އެކި އެކި އިދާރީ އަދި ޞިއްޙީ ޙިދުމަތް ހޯދުމަށް އެ ރަށަށް ބަރޯސާވެއެވެ. ފ. ނިލަންދޫގައި އެއަރޕޯޓެއް ޤާއިމުވެގެން ދިއުމަކީ އިޤްތިސާދީ ގޮތުން ފ. އަތޮޅަށާއި ކައިރި އެހެނިހެން އަތޮޅުތަކަށް އިންޤިލާބެއް ގެނުވާނޭ ކަމެކެވެ.
މީގެއިތުރުން، ކައިރި ރިސޯޓްތައް ނިލަންދޫ ކައިރީ އޮތުމަކީ، ފަތުރުވެރިކަމަށް ވެސް އެކަމުން ހެޔޮ ބަދަލުތަކެއް އަންނާނޭ ކަމެއްކަމުގައި އެމްޓީސީސީ އިން ގަބޫލުކުރެއެވެ.
މި މަޝްރޫޢުގެ ޢަމަލީ މަސައްކަތް ފެށުމުގެ ކުރީން ހަދާ ސަރވޭތަކުގެ ތެރޭގައި، ބައިމެޓްރިކް ސަރވޭއަކާއި، ޓޮޕޮގްރަފިކް ސަރވޭއަކާއި، އޭރިއަލް މެޕިންގެ އެއް ހިމެނެއެވެ. އަދި އެންވަޔަރަންމަންޓަލް އިމްޕެކްޓް އެސަސްމެންޓެއްވެސް ހެދުމަށް ވަނީ ހަމަޖެހިފައެވެ.
މި މަޝްރޫޢަކީ 378،000 ރުފިޔާ އަށް 120 ދުވަސް ތެރޭ ނިންމުމަށް އެ ކުންފުންޏާއި ހަވާލުކޮށްފައިވާ މަޝްރޫޢު އެކެވެ.