މާލެ ސިޓީގެ އަމީނީ މަގު ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ އަމަލީ މަސައްކަތުގެ ތެރެއިން ނުނިމިއޮތް ބާކީ ދެ ސެގްމަންޓްގައި ތާރު އެޅުމުގެ މަސައްކަތް އާރްޑީސީ އިން ނިންމާލައިފިއެވެ.
13 ސެގްމަންޓަށް ބަހާލައިގެން ފެށި އަމީނީ މަގު ތަރައްޤީކުރުމުގެ މަޝްރޫޢުގެ މަސައްކަތުގެ ތެރެއިން ފަހު ދެ ސެގްމަންޓްގެ މަސައްކަތް ފެށީ މިދިޔަ ޑިސެމްބަރު މަހުގެ 09 ވަނަ ދުވަހުއެވެ. އެއަށްފަހު، އާރްޑީސީ އިން މި މަސައްކަތް ނިންމާލައިފައިވަނީ 28 ދުވަހުންނެވެ.
އާރްޑީސީ އިން ބުނީ، ފަހު ދެ ސެގްމަންޓުގައި ތާރު އަޅާ ނިމުނު ކަމުގައވީނަމަވެސް މަގުމަތީގައި ކުރަހަންޖެހޭ ނިޝާންތައް ކުރެހުމަށްފަހު މަގު އާންމުކޮށް ހުޅުވާލެވޭނީ މި ހަފްތާގެ ފަހުކޮޅު ނުވަތަ ފެށޭ ހަފްތާގެ ކުރީކޮޅު ކަމަށެވެ.
ޒަމާނީ ފެންވަރަށް ތަރައްޤީ ކުރަމުން އަންނަ އަމީނީމަގުގެ މަސައްކަތް އެއްކޮށް ނިންމާލެވުމުން، ޒަމާނުއްސުރެ ދިމާވާ ފެންބޮޑުވުމުގެ މައްސަލައަށް ޖުމްލަ ޙައްލެއް ލިބިގެންދާނެއެވެ. އެގޮތުން، މިހާރު ބެހެއްޓިފައި ހުރި ސްޓޯރމް ވޯޓަރ ޕަމްޕްތައް އަޕްގްރޭޑް ކުރެވިގެންދިއުމަކީ އެ މައްސަލައަށް ހައްލު ލިބިގެންދާނެ ކަމެކެވެ.
ކުރީގެ ސަރުކާރުން 2022 ވަނަ އަހަރުގެ އޮގަސްޓް މަހުގައި އަމީނީ މަގު ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ މަސައްކަތްތައް އަމަލީގޮތުން ފެށިއިރު، މި މަސައްކަތް ކުރުމަށް އާރްޑީސީއާ ހަވާލުކުރީ 84.4 މިލިއަން ރުފިޔާ އަށެވެ.