ޒަމާނީ ފެންވަރަށް މަގުތައް ތަރައްޤީ ކުރުމުގެ މަޝްރޫޢުގެ ތެރެއިން، ސެންޓްރަލް ރީޖަންގެ ތިން ރަށެއްގައި މިވަގުތު މަސައްކަތްތައް ކުރިއަށްގެންދާ ކަމަށް އާރްޑީސީ އިން މިއަދު ހާމަކޮށްފިއެވެ.
އެގޮތުން، ސެންޓްރަލް ރީޖަންގައި ހިމެނޭ ޅ. ހިންނަވަރާއި، މ. މުލަކުގެ އިތުރުން އދ. މާމިގިލީގައި މަގު ހެދުމުގެ މަޝްރޫޢުތައް ކުރިއަށްދާ ކަމަށް އާރްޑީސީ އިން ބުނެއެވެ.
ހިންނަވަރުގައި ކުރިއަށްދާ މަސައްކަތްތަކުގެ ތެރޭގައި ނޫރާނީމަގުގައި ކާރބް ސްޓޯން ޖެހުމާއި، ޑެއިޒީމަގުގައި ކާރބް ސްޓޯން އެޅުމާއި، މަދަރުސީމަގުގައި ޕޭވިންގ ބްލޮކްސް ޖެހުން އަދި ޑްރައި މިކްސިން އެޅުމަށް ހަމަޖެހިފައިވެއެވެ.
އަދި، މުލަކުގެ ހުސްނީމަގުގައި ދުވާރުގެ މަސައްކަތާއި، ސްޓޯރމް ވޯޓަރ ޓޭންކް ބެހެއްޓުމާއި، ސްޓޯރމް ވޯޓަރ ހޮޅިއެޅުމާއި، މަގުބައްތި ޖެހުމުގެ މަސައްކަތް ހިމެނެއެވެ.
މީގެއިތުރުން، މާމިގިލީ އަމީނީމަގު ދުވާރުގެ ކޯނަރތަކުގެ ފިނިޝިން މަސައްކަތާއި، ގެވިހިމަގުގައި ކީވޯލް އެޅުމާއި ސައިޓުގައި މިނީ ކާރބް ސްޓޯން އެޅުމުގެ މަސައްކަތް ކުރުމަށް ހަމަޖެހިފައިވެއެވެ.