ދަރިން ކިޔަމަންކުރުމާ ތަރުބިއްޔަތު ކުރުމުގައި ބައެއް މީހުން ގެންގުޅެނީ ތަފާތު އުކުޅުތަކެކެވެ. އެއްބަޔަކު ތަންކޮޅެއް ހަރުކަށި އުސޫލުތަކެއް މިކަމުގައި ގެންގުޅުނެއްކަމަކު އަނެއްބައިމީހުން މިކަމުގައި ގެންގުޅެނީ ތަންކޮޅެއް ވާންދޫ އުސޫލުތަކެކެވެ.

ބައެއްމީހުން ގަބޫލުކުރާ ގޮތުގައި އިހު ދިވެހިން އެ ގެންގުޅުނު ވާންދޫ، އެހެނަސް ހަރުކަށި އުސޫލުތަކަކަކީ ހަރުދަނާ ދަރިންތަކެއް ތަރުބިއްޔަތު ކުރުމަށް އެއްމެ އެކަށީގެންވާ އުސޫލުތަކެވެ. ނަމަވެސް މިއަދު ގިނަ ބަޔަކަށް ހީވެފައި އޮންނަނީ ދަރިން ނިމިވަންކަމާއެކު ގެއިން ބޭރުގައި އުޅުމަކީ އެކުދިންގެ ތަރުބިއްޔަތަށް އެޅޭ ބޮޑު ކަޅު ހިޔަންޏެއް ކަމަށެވެ! އާދޭހެވެ! ކާރޫބާރޫ ބޮޑު، ހަލަބޮލި ބޮޑެތު މުޖުތަމައުތަކުގައި މިކަން މި މަގުން ހިނގާފާނެއެވެ. ނަމަވެސް ކުދިކުދި އާބާދީތަކުގައި މިއީ މިކަން ހިނގާނޭ ގޮތެއް ނޫނެވެ!

މިއަދު ދިވެހިރާއްޖޭގެ ރަށްތަކުގައި، އެރަށްތަކުގައި އުޅޭ ޅަ ދަރިން ކިޔަމަންކޮށް، ތަރުބިއްޔަތު ކުރުމަށް އެދަރިން ގޭގައި ގައިދު ކުރުވައެވެ. ހުޅަނގުގެ ވިސްނުމާ ފަލްސަފާތަކާއި އެއްގޮތަށެވެ! ގޭގައި އެދަރިން ތިބެ، ފޯނާއި ޓެބްލެޓާއި އަދި އެނޫންވެސް އެފަދަ އެއްޗެހި ކުޅެ ހަދައެވެ. އެކަމުގައި އެއްވެސް މައްސަލައެއް އޮންނަހެނެއް ހިޔެއް ނުވެއެވެ! ނަމަވެސް މިއީ އަދި މާ ނުރައްކާތެރި ކަމެކެވެ!

ދަރިން ގޭގައި ތިބުން އެއީ އެ ދަރިން ބަސްއަހާ ކިޔަމަންތެރި ދަރިންތަކެއް ކަމުގައި ވުމެއް ނޫނެވެ! ގޭގައި ތިބެ، ފޯނާއި ޓެބްލެޓްތަކުން ކުރާ ކަންކަމަކީ ކޮބައިތޯ ބެލެނިވެރިން ބަލަން ޖެހޭނެއެވެ. ބޭރުތެރޭގައި އުޅޭ އުޅުމަށްވުރެ، މާ ބިރުވެރި، ނުރައްކާތެރި ކަންކަން، ގޭގައި ތިބެ، ފޯނާއި ޓެބްލެޓްތަކުން ކުރެވޭނެއެވެ! އެހެންކަމުން އެކުދިން ގޭގައި މަޑުން ތިއްބެއްކަމަކު، އެކުދިން އުޅޭ ނޫޅޭގޮތް، މިޒަމާނުގައި ބަލަން ވާނެއެވެ!

ދަރިން ގެއިން ބޭރުގައި އުޅޭނަމަ، މައިންބަފައިން ކަންބޮޑުވަނީ އެ ދަރިން ގޯސް މަގަކުން ހިނގައިދާނެތީއެވެ! އާދޭހެވެ! އެއީވެސް ވެދާނޭ ކަމެކެވެ! ނަމަވެސް އެއީ ބެލެނިވެރިޔާގެ ސަމާލުކަން ކުޑަވުމުގެ ނަތީޖާއެކެވެ. ކުދިން ބޭރުގައި އުޅޭނަމަވެސް އުޅޭ ނޫޅޭ ގޮތް ބަލާނަމަ، އެ ކުދިން ނުބައި މަގަކުން ނުހިނގާނެއެވެ. ކުދި ކުދި އާބާދީތަކުގައި މިއީ ކަން ހިނގާނެ މަގެވެ! އެ ދަރިން ބޭރުގައި އެ އުޅޭ އުޅުމުގައި އެތައް ކަމެއް ދަސްކުރާނެއެވެ. އެތައް މައްސަލަތަކެއް ޖެހޭނެއެވެ. އޭގެ ހައްލު އަމިއްލައަށް ހޯދާނެއެވެ. "ގޫގުލް ސާޗެއް" ނުކުރާނެއެވެ! އަމިއްލައަށް ހައްލު ހޯދާނެއެވެ! މިއީ މާދަމާ އެކުދިން މުޖުތަމައަށް ނުކުންނައިރު ނުހަނު ބޭނުންތެރި ކަމެކެވެ.

ގޭތެރޭގައި ފޯނާއި ޓެބްލެޓާއި ކުޅެން އިންނަ ކުއްޖައާށް މިފަދަ ފިލާވަޅުތައް ދަހެއް ނުވާނެއެވެ! މިކަމުގެ ނަތީޖާއަކަށް ވަނީ ޒުވާނުންނާއި ކުޑަކުދިންގެ މެދުގައި އެންޒައިޓީއާއި ޑިޕްރެޝަން އިތުރުވުމެވެ. މިހެން ވަނީ ދިރިއުޅުމުގައި ދިމައިވާ މައްސަލަތައް ހައްލު ކުރަން ނޭނގި، "ގޫގުލް ސާޗް" ކުރަން ޖެހި، ޖަވާބެއް ނުލިބި އުޅެން ޖެހުމުންނެވެ. މިއީ ދެރަވަރު ކަމެކެވެ. މިއީ މާދަމާގެ ޖީލިގެ ނަފްސާނީ ދުޅަހެޔޮކަމަށް އޮތް ބޮޑު ނުރައްކަލެކެވެ.

ގޭގައި ފޯނާ ކުޅެން ދަރިން ބޭތިއްބިޔަސް ފަރުވާލެއް ނެތެވެ! ބޭރުގައި އުޅެން ދޫކޮށްލިޔަސް ފަރުވާލެއް ނެތެވެ! ކުރަންވީހާވެސް ކަމަކީ އެކުދިން އުޅޭނޫޅޭ ގޮތް ބަލަންވީއެވެ. ގޭގައި އޮތަސް ކަނޑުގައި އޮތަސް ގޮނޑުދޮށުގައި އޮތަސް ފަރުވާލެއް ނެތެވެ! އުޅޭނޫޅޭ ގޮތް ބަލާށެވެ!