ބޮޑުތަކުރުފާނު މަގަށް ބައެއް ވާގޮތަށް ބެހެއްޓިފައިހުރި ސްޓެލްކޯގެ ފިއުލް ޕަންޕް ސްޓޭޝަން ރައްޔިތުންގެ އެދުމާއި އެއްގޮތަށް އެތަނުން ނަގައި، ރީލޮކޭޓް ކުރުމުގެ މަސައްކަތް މިއަދު އެމްޓީސީސީއާ ހަވާލުކޮށްފިއެވެ.
މި މަޝްރޫޢު ހަވާލުކުރުމަށް މިއަދު ހެނދުނު ސްޓެލްކޯގައި ބޭއްވި ރަސްމިއްޔާތެއްގައި އެ ކުންފުނީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ، ޙުސައިން ފަހުމީ އެވެ. އަދި އެމްޓީސީސީގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރ، ޢަބްދުﷲ ޒިޔާދެވެ.
ސްޓެލްކޯ އިން ފާހަގަކުރައްވާ ގޮތުގައި ފިއުލް ޕަންޕް ސްޓޭޝަން ބަދަލުކުރުމަށް ނިންމާފައިވަނީ ވަރަށް ގިނަ ރައްޔިތުން އެކަން އެގޮތަށް ކޮށްދިނުމަށް އެދިފައިވުމާއެކު އެކަމަށް އިޖާބަދިނުމުގެ ގޮތުންނެވެ.
"މާތްﷲގެ އިރާދަފުޅާއެކު، ރައްޔިތުންގެ ވިންދާ އެއްގޮތަށް ބައްޓަންކޮށްފައިވާ ރައީސުލްޖުމްހޫރިއްޔާ މުޙައްމަދު މުޢިއްޒުގެ ސަރުކާރުގެ ހަރުދަނާ ސިޔާސަތުތަކުގެ ތެރެއިން ރައްޔިތުންނަށް އުނދަގުލަކަށް ނުވަތަ ތަކުލީފަކަށް ވާގޮތަށް ހުރި ސްޓެލްކޯއާއި ގުޅުންހުރި ހުރިހާ ކަމެއް މި މަސައްކަތާއެކު ހައްލު ކުރެވިގެންދާނެ،"
"ރައްޔިތުންގެ ކަންބޮޑުވުންތަކުގެ ގޮތުގައި ފާހަގަ ކުރެވޭ ބޮޑުތަކުރުފާނު މަގުގެ ބަޔަކަށް އަރާގޮތަށް ބަހައްޓާފައިވާ ފިއުލް ޕަމްޕް ސްޓޭޝަން ރީލޮކޭޓްކުރުމުގެ މަސައްކަތާއި، މިހާރު މަސައްކަތް ކުރަމުން މިދާ ދޮންއަދަރާދަ ހިނގުން ހުޅުވާލެވި، މި ސަރަހައްދުން ދަތުރުފަތުރުކުރާ ފަރާތްތަކަށް އެކަމުގެ ލުއި ފަސޭހަތައް ލިބިގެންދާނެ. ރައްޔިތުން ބޭނުންވާ ގޮތަށް މިފަދަ ކަންކަން ކޮށްދިނުމަކީ ސަރުކާރަށާއި، ސްޓެލްކޯއަށް ލިބޭ ބޮޑު އުފަލެއް އަދި ހިތްހަމަޖެހުމެއް." ސްޓެލްކޯގެ އެމްޑީ ފަހުމީ އެކްސްގައި ކުރެއްވި ޕޯސްޓެއްގައިވެއެވެ.
މި މަޝްރޫޢުގެ ދަށުން، މިހާރު ހުރި ހާބަރު ބޭސިން ތަޅާލުމާއި، 29 މީޓަރުގެ އެއްގަމުތޮށިލުމާއި، 103 އަކަ މީޓަރުގެ ސަރަޙައްދެއްގެ ބެކްފިލިންގ ކުރުމާއި، 50.44 އަކަ މީޓަރުގެ ޕޭވިންގ މަސައްކަތާއި، 2 މޫރިންގ ބޮލާރޑްސް ހަރުކުރުމާއި، އައު ޕަންޕް ސްޓޭޝަން އިމާރާތްކުރުމުގެ މަސައްކަތް ހިމެނެއެވެ.
ސްޓެލްކޯ އިން ބުނީ، އީޕީއޭގެ ހުއްދަ ލިބުމާއެކު މަސައްކަތް ފަށައި 60 ދުވަހުގެ ތެރޭގައި މި މަސައްކަތް ނިންމާލެވި، ރައްޔިތުންނަށް އެކަމުގެ ފަސޭހަތައް ލިބިގެންދާނެކަމަށެވެ.
މިއީ 7.14 މިލިއަން ރުފިޔާގެ މަޝްރޫޢުއެކެވެ.