ނ. ވެލިދޫ މަގު ހެދުމުގެ މަޝްރޫޢުގެ ދަށުން މަގުތައް ތާރު އަޅާ ޒަމާނީ ފެންވަރަށް ތަރައްޤީކުރުމުގެ މަސައްކަތް ކުރަމުން އަންނަ އާރްޑީސީ އިން ބުނީ، އެ ރަށުގައި މިހާރު ކުރަމުންދަނީ ސޯސަންމަގުގައި ޖަހާފައި ހުރި ކަލްވަރޓް ފްރޭމްތައް ސާފުކުރުމާއި ކޯނަރ ކާރބް ޖެހުމުގެ މަސައްކަތް ކަމަށެވެ.
އަދި ސައިޓުގައި ކާރބް ސްޓޯން އެޅުމުގެ މަސައްކަތްވެސް މިހާރު ކުރަމުންދާ ކަމަށް އާރްޑީސީ އިން ބުނެއެވެ.
މި މަޝްރޫޢުގެ ދަށުން އެ ރަށުގެ 5.2 ކިލޯމީޓަރުގެ މަގުގައި ތާރުއެޅުމަށް ހަމަޖެހިފައިވާއިރު، އޭގެ ތެރޭގައި ބަނދަރު މަގު ހިމެނޭހެން ރަށުގެ މައި 10 މަގެއްގައި ތާރުއަޅާ ޒަމާނީ ފެންވަރަށް ތަރައްޤީކުރެވިގެންދާނެއެވެ.
މިދިޔަ ސަރުކާރުން ޑިޒައިން އެންޑް ބިލްޑް އުޞޫލުން ވެލިދޫ މަގުތައް ޒަމާނީ ފެންވަރަށް ތަރައްޤީކުރުމުގެ މަޝްރޫޢު އާރްޑީސީއާ ހަވާލުކުރީ 2021 ވަނަ އަހަރުގެ ނޮވެންބަރު މަހު އެވެ.
ވެލިދޫ މަގު ހެދުމުގެ މަޝްރޫޢަށް ގާތްގަނޑަކަށް 88.5 މިލިއަނަށްވުރެ ގިނަ ރުފިޔާ ޚަރަދުވާނެކަމަށް ޕްލޭނިންގ މިނިސްޓްރީން ވަނީ ހާމަކޮށްފައެވެ.