މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މިދިޔަ ޑިސެންބަރު މަހުގެ ތެރޭގައި ކްލިއާކުރި ފިޔާގެ އަދަދު އޭގެ ކުރީ މަހަށް ވުރެ 4 އިންސައްތަ އިތުރުވެފައިވާ ކަމަށް އެ ކުންފުނީގެ ތަފާސް ހިސާބުތަކުން ދައްކައިފިއެވެ.
އެމްޕީއެލްގެ ތަފާސް ހިސާބު ދައްކާ ގޮތުން ނޮވެންބަރު މަހަށް ބަލާއިރު، މިދިޔަ ޑިސެންބަރު މަހު ކްލިއާކޮށްފައިވާ ގިނަ ވައްތަރުގެ ޕެރިޝަބަލް މުދާގެ އަދަދު ވަނީ ދަށަށް ގޮސްފައެވެ.
މިދިޔަ މަހުގެ ތެރޭގައި މުޅި ޖުމްލަ 4،540 ކޮންޓެއިނަރުގެ ޕެރިޝަބަލް މުދާ ކްލިއާކޮށްފައިވާއިރު، ނޮވެންބަރު މަހު ކްލިއާކުރި ޕެރިޝަބަލް މުދާ ކޮންޓެއިނަރުގެ އަދަދަކީ 4،799 އެވެ.
މިދިޔަ ޑިސެންބަރު މަހު އެވްރެޖްކޮށް ދުވާލެއްގެ މައްޗަށް 146 ކޮންޓެއިނަރުގެ މުދާ ކްލިއާކޮށްފައިވާއިރު، މިއީ އޭގެ ކުރީ މަހާ އަޅާ ބަލާއިރު ނުވަ އިންސައްތައިގެ ވެއްޓުމެކެވެ. މިދިޔަ ނޮވެންބަރު މަހު ދުވާލެއްގެ މައްޗަށް ކްލިއާކޮށްފައިވަނީ 160 ކޮންޓެއިނަރެވެ.
އެ ކުންފުނިން ބުނީ، މިދިޔަ މަހު ކްލިއާކުރި ކޮންޓެއިނަރުގެ ތެރޭގައި؛ 20 ފޫޓުގެ 2،637 ކޮންޓެއިނަރާއި، 40 ފޫޓުގެ 1،903 ކޮންޓެއިނަރު ހިމެނޭ ކަމަށެވެ. އަދި އެ ކުންފުނިން މިދިޔަ މަހު ކްލިއާކުރި ޖުމްލަ ޓީއީޔޫގެ ޖުމްލަ އަކީ 6،443 އެވެ.
މިދިޔަ މަހު އެންމެ ގިނައިން އެތެރެކޮށްފައިވާ ޕެރިޝަބަލް މުދަލުގެ އަދަދު:
ކަރާ 24،935
ދޮންކެޔޮ 7،234
ބަރަބޯ 3،733
އަލަނާސި 5،841
ބިސް 50،033
ކެބެޖް 9،010
ފިޔާ 41،641
އަލުވި 16،258
ޓޮމާޓޯ 11،551
މިދިޔަ ޑިސެންބަރު މަހުގެ ތެރޭގައި މާލޭ ވިޔަފާރި ބަނދަރަށް ޕެރިޝަބަލް މުދާ ހިފައިގެން ކޮންޓެއިނަރު އުފުލާ 13 ބޯޓާއި، 20 ކޮންވެންޝަނަލް ބޯޓު އައިސްފައިވާ ކަމަށް ވެސް އެމްޕީއެލްގެ ތަފާސް ހިސާބުތަކުން ދައްކައެވެ.