ސައުތު ރީޖަންގެ ރަށްތަކުގައި ޒަމާނީ ފެންވަރަށް މަގުތައް ތަރައްޤީ ކުރުމުގެ މަޝްރޫޢުގެ ތެރެއިން ހުވަދު އަތޮޅުގެ ތިން ރަށެއްގައި މިވަގުތު ހިނގަމުންދާ މަސައްކަތްތަކުގެ ތަފްޞީލް އާރްޑީސީ އިން އާންމުކޮށްފިއެވެ.
އެގޮތުން، ސައުތު ރީޖަންގައި ހިމެނޭ ގއ. ވިލިނގިލީގެ އިތުރުން ގދ. ތިނަދޫ އާއި ގދ. ގައްދޫގައި މިހާރު ކުރިއަށްދާ މަސައްކަތްތަކުގެ ތަފްޞީލް އާރްޑީސީ އިން ވަނީ ދީފައެވެ.
ގއ. ވިލިނގިލީގައި މިވަގުތު ކުރަމުންދަނީ؛ އިބްރާހިމް ކަލޭފާނުމަގު އެއްވަރު ކުރުމުގެ މަސައްކަތާއި، ކޭބަލް ޖަންކްޝަންތައް ރަނގަޅު ކުރުމުގެ މަސައްކަތުގެ އިތުރުން ސްޓޯރމް ވޯޓަރ ކެޗްޕިޓްތައް އެޅުމުގެ މަސައްކަތާއި، ކޭބަލް ޖަންކްޝަންގެ މަސައްކަތެވެ.
ގއ. ވިލިނގިލީ ފޭސް 2 ގެ މި މަސައްކަތަކީ 98.33 މިލިއަން ރުފިޔާގެ މަޝްރޫޢެކެވެ. މި މަސައްކަތް ކުރުމަށް އާރްޑީސީއާ ހަވާލުކުރީ 2022 ވަނަ އަހަރުގެ އޭޕްރީލް މަހު އެވެ.
ގދ. ތިނަދޫގައި މިހާރު ކުރިއަށްދަނީ އަތްތާރަފަނިމަގުގައި ދުވާރު ރަނގަޅު ކުރުމުގެ މަސައްކަތާއި، ކޭބަލް ޖަންކްޝަންގެ މަސައްކަތުގެ އިތުރުން މަގުބައްތި ޖެހުމުގެ މަސައްކަތާއި، ސްޕީޑް ބްރޭކަރގެ މަސައްކަތްތަކެވެ. އަދި އެ ރަށު ރަށްދެބައި މަގުގައި ކޭބަލް ޖަންކްޝަންގެ ރިންގ ގާޑްގެ މަސައްކަތް ކުރުމަށް ހަމަޖެހިފައިވެއެވެ.
ގދ. ތިނަދޫ ފޭސް 2 ގެ މި މަސައްކަތްކުރުމަށް އާރްޑީސީއާ ހަވާލުކޮށްފައިވަނީ 2021 ވަނަ އަހަރުގެ އޭޕްރީލް މަހުގެ ތެރޭގައި 78.8 މިލިއަން ރުފިޔާ އަށެވެ.
ސައުތު ރީޖަންގެ ރަށްތަކުގެ މަގުތައް ޒަމާނީ ފެންވަރަށް ތަރައްޤީ ކުރުމުގެ މަޝްރޫޢުގެ ދަށުން މިހާރު މަސައްކަތް ކުރަމުންދާ އަނެއް ރަށަކީ ގދ. ގައްދޫ އެވެ. އެގޮތުން، ގައްދޫގެ ފޭސް 2 ގެ އޯކިޑްމަގުގައި ކީވޯލް ޖެހުމުގެ މަސައްކަތާއި، އޯކިޑްމަގުގައި ކީވޯލް ޖެހުމަށް މަގު ކޮނުމުގެ މަސައްކަތުގެ އިތުރުން ވަތަބަނޑޭރިމަގުގައި ކާރބް ސްޓޯން ޖެހުމުގެ މަސައްކަތް އަދި ވަތަބަނޑޭރިމަގުގައިޖަހައި މަގު ބައްތިތަކުގެ ކޭބަލް އެޅުމުގެ މަސައްކަތް ކުރުމަށް ހަމަޖެހިފައިވެއެވެ. މި މަސައްކަތް ކުރުމަށް އާރްޑީސީއާ ހަވާލުކޮށްފައިވަނީ 2020 ވަނަ އަހަރުގެ ފެބުރުއަރީ މަހުގައި 138 މިލިއަން ރުފިޔާ އަށެވެ.