އިންސާނުން ބޯން ބޭނުން ކުރާ ފެނުގެ ތެރޭގައި ތަފާތު އެކި ވައްތަރުގެ ފެން ހުރެއެވެ. އެގޮތުން ތައްޔާރުކޮށްފައި، ފުޅިފުޅީގައި ބަންދުކޮށްފައި ހުންނަ ފެން ހުރެއެވެ. އެވްރެޖްކޮށް މިގޮތަށް ބަންދު ކުރާ ފެން، ބަންދުކުރަނީ ޕްލާސްޓިކް ފުޅީގައެވެ. އެކި އަދަދުން ލިޓަރާއި، އެމް.އެލް ހަމަކޮށް ބަންދުކޮށްފައި ހުރެއެވެ. ދިވެހިންގެ ތެރޭގައިވެސް ބަންދުކުރި ފެން ބޭނުން ކުރާ ނިސްބަތް ވަރަށްވެސް ގިނައެވެ.

ތިމާވެއްޓާއި ބެހޭ އެކިކަހަލަ ދިރާސާތައް ކުރާ ޕެސިފިކް އިންސްޓިޓިއުޓުން ހާމަކުރާ ގޮތުގައި މިގޮތަށް، ޕްލާސްޓިކް ފުޅީގައި ބަންދުކޮށްފައި ހުންނަ ފެނުގެ ކޮންމެ ލީޓަރަކަށް، 250 އެމް.އެލް ތެޔޮ ބޭނުން ކުރެވެއެވެ. އެހެންކަމުން އަހަރެމެން އާއްމުކޮށް މި ބޭނުންކުރާ 5 ލީޓަރުގެ ފެންފުޅިއަކީ، އެއް ލިޓަރު ތެޔޮ ހޭދަކޮށްގެން އަހަރެމެންނާ ހަމައަށް ލިބޭ ފެންފުޅިއެކެވެ. މިކަމުގައި ތެލުގެ ބޭނުން، އެކި މަރުހަލާތަކަށް ބަހާލައިގެން ހިއްސާކޮށްފައި ވެއެވެ.

ޕްލާސްޓިކް ފުޅި، އޭގެ ޒާތަށް އުފެއްދުމަށް ތެޔޮ ބޭނުން ވެއެވެ. އެ ފުޅި އުފައްދާ، ފެން އުފައްދާ ކާރުހާނާއާއި ހަމައަށް ދިޔުމަށްވެސް ތެޔޮފޮދެއް ހޭދަވެއެވެ. ކާރުހާނާގައި އެ ޕްލާސްޓިކު ފުޅިތަކަށް ފެން އަޅަން، ތަރުތީބުކޮށްފައިވާ ނިޒާމު ހިންގުމަށް ބޭނުންވާ ކަރަންޓާއި ހަކަތަ އުފެއްދުމަށްވެސް ތެޔޮފޮދެއް ހޭދަ ކުރެއެވެ.

ކާރުހާނާގައި ބަންދުކޮށްފައި ހުންނަ ފުޅިތައް، ކާރުހާނާއިން ނެރެ، ގުދަން ކުރުމަށް ގެންދާ ގެންދިއުމަކީވެސް އެކަމުގައި ތެޔޮފޮދެއް ބޭނުން ކުރަން ޖެހޭނެ ކަމެކެވެ. މި ފެންފުޅިތައް ގަނޑުކޮށް ގަންނަ ފިހާރަތަކާއި ހަމައަށް ގެންދިއުމަށްވެސް ތެޔޮފޮދެއް ހޭދަ ވެއެވެ. އެ ފިހާރަތަކުގައި އެ ފެން ރައްކާކޮށްފައި ބެހެއްޓުމަށް، ހާއްސަކޮށް ފިނިކޮށް ބެހެއްޓުމަށް ތަރުތީބުވާ ނިޒާމު ހިންގުމަށް ބޭނުންވާ ހަކަތަ އުފެއްދުމަށްވެސް ހިސާބަކަށް ތެޔޮފޮދެއް ބޭނުން ކުރާނެއެވެ. ގަނޑުކޮށް ގަނެފައި ހުންނަ ފިހާރަތަކުން، ވަކިވަކި މީހުން ގަނެ، އެމީހުންގެ ގޭގެއާއި ހިސާބަށް އެ ފެންފުޅިތައް ގެނައުމަށްވެސް ތެޔޮފޮދެއް ހޭދަވާނެއެވެ. 

މިކަމުގެ މައްޗަށް ޕެސިފިކް އިންސްޓިއުޓުން ވަނީ އިނގިރޭސި ވިލާތުގައި ދިރާސާއެއް ހަދާފައެވެ. އެ ދިރާސާގެ ނަތީޖާއާއި، ދިވެހިން މިކަމުގައި ގެންގުޅޭ އުސޫލުން ނުކުމެދާނެ ނަތީޖާ ތަފާތުވާނެއެވެ. އެހާރުން އެ ދިރާސާގެ ތަފްސީލު މި ލިޔުމުގައި ހިމަނާފައެއް ނުވާނެއެވެ. ނަމަވެސް އެ ދިރާސާގެ ނަތީޖާގެ އަސާސީ އެއް ނުކުތާ، އެއީ މި ރާއްޖޭގައިވެސް ކަން ހިނގާ ގޮތުން ނުކުމެދާނެ ނަތީޖާއެއް ކަމަށް ބެލެވެއެވެ. އެހެންކަމުން އެ ނަތިޖާ ހިއްސާ ކުރީމެއެވެ. އެއީ މިގޮތަށް ބަންދުކޮށްފައި ހުންނަ ފެނުގެ ކޮންމެ ލިޓަރަކަށް، 250 އެމް.އެލް ގެ ތެޔޮ ބޭނުން ކުރެވޭ ކަމެވެ. ދިވެހި ރާއްޖޭގެ ރަށްތަކުގެ ގޭތަކަށް މި ލިބޭ ފެނުގެ ނިސްބަތުން މިކަން މިމަގުން ހިނގާފާނެއެވެ. 

ދިރާސާވެރިން ފާހަގަ ކުރާ ގޮތުގައި މިއީ އަދި މުޅިއަކުން ތިމާވެއްޓާ ރައްޓެހި ގޮތެއް ނޫނެވެ. މިކަމުގެ ސަބަބުން އަދި މާ ބޮޑެތި ގޮންޖެހުންތަކެއް ނެތެއް ކަމަކު، މިއީ މުސްތަގުބަލުގައި ދުނިޔެ އެކަމަކައިގެން ތާށިވެދާނެ ފަދަ ކަމެއް ކަމަށް ފާހަގަ ކުރެއެވެ. އެހެންކަމުން އެބައިމީހުން މިކަމުގައި ގެންނަ ހައްލަކީ އެއްމެ ކުރީ ޒަމާނުއްސުރެ އިންސާނުން އުޅުނު ފަދައިން، ރައްކާތެރި ގޮތުގައި ވާރޭ ފެން ނަގާ، އެ ފެނުން ޖަރާސީމު ނައްތާލައިގެން އެ ފެން ބޭނުން ކުރުމެވެ. ދެމެހެއްޓެނިވި ހައްލަކަށް ވާން އޮތީ މި ހައްލެވެ. ޕެސިފިކް އިންޓިޓިއުޓުން ބުނާ ގޮތުގައި އިންސާނުން ބުއިމަށް ހަމަ އެއްމެ ރަނގަޅީ، އެ އިންސާނަކު ދިރިއުޅޭ މާހައުލަށް، ޤުދުރަތީ ގޮތުން އެ އަންނަ ވާރޭ ފެނެވެ. އެ ފެނުގައި އެ މާހައުލަށް އެކަށީގެންވާ ތާސީރުތަކެއް ވާނެ ކަމަށް އެ ދިރާސާވެރިން ފާހަގަ ކުރެއެވެ. ނަމަވެސް ވާރޭ ފެން ބޯން ވާނީ ރައްކާތެރިކޮށް ނަގާ، ރަނގަޅަށް އެއިން ޖަރާސީމު ފިލުވައިގެންނެވެ!