ފެނަކަ ކޯޕަރޭޝަން ލިމިޓެޑަށް ޓެކްނިކަލް ދާއިރާތަކުން ބޭނުންވާ ފަންނީ އެހީތެރިކަން ފޯރުކޮށްދިނުމަށް ސްޓެލްކޯއާއެކު ފަހުމުނާމާއެއްގައި ސޮއިކޮށްފިއެވެ.
މިއަދު މެންދުރު ސްޓެލްކޯގައި ބޭއްވި ރަސްމިއްޔާތެއްގައި އެ ކުންފުނީގެ ފަރާތުން ފަހުމުނާމާގައި ސޮއިކުރެއްވީ މެނޭޖިންގ ޑިރެކްޓަރ، ޙުސައިން ފަހުމީ އެވެ. އަދި ފެނަކައިގެ ފަރާތުން ސޮއިކުރެއްވީ މެނޭޖިންގ ޑިރެކްޓަރ، މުއާޒް މުޙައްމަދު ރަޝީދު އެވެ.
މި އެއްބަސްވުމުގެ ދަށުން، ފެނަކައިގެ މުވައްޒަފުންނަށް ބޭނުންވާ ފަންނީ ތަމްރީނާއި ފަންނީ ގޮތުން އެހެނިހެން އެހީތެރިކަން ސްޓެލްކޯ އިން ފޯރުކޮށްދިނުމަށް ހަމަޖެހިފައިވެއެވެ.
ފެނަކައިގެ އެމްޑީ މުއާޒު ވިދާޅުވީ، އެ ކުންފުނިން މިހާރު އެންމެ ބޮޑު ހޭދައެއް ކުރަނީ ޕަމްޕާއި ޖަނަރޭޓަރު ސެޓުތައް ސާވިސްކުރުމަށް ކަމަށެވެ.
ފެނަކައިގެ މާލީ ހާލަތަށް ބަލައި، މި ފަހުމުނާމާގެ ދަށުން ސްޓެލްކޯ އިން ވަނީ ހިލޭ ފޯރުކޮށްދެވިދާނެ އެހީތައް ހިލޭ ފޯރުކޮށްދިނުމަށް ނިންމާފައެވެ.