އަޅުގަނޑުމެންގެ ކުޑަކުޑަ ދިވެހިރާއްޖެއަކީ 100 އިންސައްތަ މުސްލިމުންނަށް ނިސްބަތްވާ ގައުމެއްކަމަށް ބުނެ ލިޔުންތަކުން ފެންނަން ހުރިނަމަވެސް ފާޅުގައި އިސްލާމްދީން ދީން ދޫކޮށްފައިވާ ވަރަށް ގިނަ ދިވެހިން އުޅޭކަން މިއީ ހަގީގަތެކެވެ. ބައެއް މީހުން އިސްލާމްދީނާއި ދިވެހިރާއްޖެ ދޫކޮށް ދިއުމަށްފަހުވެސް ދިވެހިންނަށް ފެންނަ ގޮތަށް ސޯޝަލް މީޑިޔާގައި އިސްލާމްދީނަށް ފުރައްސާރަކުރަމުން ގެންދާކަމީވެސް ދެބަސް ވެވެން ނެތް ކަމެކެވެ. ދިވެހިންގެ ތެރެއިން އަވަށްޓެރި ގައުމުތަކުގައި ދިރިއުޅޭ ބައެއް ދިވެހިންގެ ތެރޭގައި އިސްލާމްދީނާއި މެދު ޝައުޤުވެރިކަން ވަރަށް ކުޑައެވެ. މިފަދަ މީހުންގެ ތެރޭގައި ރަލާ ޖުވާފަދަ ޙަރާމް ކަންކަން ވެސް ވަރަށް އާންމެވެ. މިފަދަ ބައެއް މީހުނާ ބައްދަލުވެ ވާހަކަ ދައްކާލުމުން ދޭހަވަނީ އެމީހުނަށް އިސްލާމް ދީނުގެ މަޢުލޫމާތު ލިބިފައިވާ މިންވަރު ކުޑަކަމެވެ. ނަމަވެސް އެމީހުންގެ ހިތުގައިވެސް އީމާންތެރިކަން ވާކަމާއި، ދަތިހާލެއް ޖެހުމުން ހިތަށް ވަންނީ ހަމަ ޚާލިޤްވަންތަ ﷲ ކަން އެނގުމުން ހައިރާންވެއެވެ. މި ފަދަ އެއް ހާދިސާއެކެވެ.

33 އަހަރުގެ ދިވެހި ފިރިހެނެކެވެ. ދިގުމުއްދަތަކަށް އާއިލާއާއި ވަކިން ރާއްޖެއިން ބޭރުގައި ދިރިއުޅެމުން ދިއުމުގެ ސަބަބުން ދިރިއުޅުމުގައި ހެވާއި ނުބައި ކިޔާދީ ހަނދާން ކޮށްދޭނެ މީހަކު ނެތެވެ. ނަމާދާއި ރޯދަ ފަދަ ކަންކަމުން ދުރުވެ ހަރާމް ކުރެވިގެންވާ ކަންކަމަށް އަރައިގަންނަމުން އެއީ ދިރިއުޅުމުގެ ބައެއް ކަމަށް ވެގެން ދިޔައެވެ. އެކަންކަމުގެ ތެރޭގައި އުޅެމުން ކައިވެންޏެއްވެސް ކުރިއެވެ. ނަމަވެސް އަނބިމީހާގެ ފަރާތުންވެސް ދީނަށް މަގުދެއްކުމަށް މާބޮޑުކަމެއް ނުކުރެވި އެ ދިރިއުޅުން ރޫޅުނު އިރު ތުއްތުކުއްޖަކު އޮތެވެ. ދަރިފުޅާއި އަނބިމީހާދެކެ އިންތިހާއަށް ލޯބިވާ ފިރިއަކަށް އަދި ބައްޕައަކަށް މިކަންވީ ކެތްކުރަން އުނދަގޫ ކަމަކަށެވެ. އެ ހަގީގަތް ގަބޫލުކުރަން އޭނާ ބޭނުމެއް ނުވިއެވެ. ދިރިއުޅުމުގެ އެންމެ ހިނދުކޮޅަކަށް ވެސް އޭނާގެ އަނބިމީހާއާއި ދަރިފުޅު އޭނާގެ ހަޔާތުން ވަކިވެގެން ދިޔަކަމަށް ވިސްނާލަންވެސް ބޭނުން ނުވާތީ ރަލުގެ ކަނޑަކަށް އަމިއްލަ ނަފްސު ޣަރަޤު ކޮށްލިއެވެ. ހެނދުނު ހޭލެވުމާއި އެކު ގޮހޮރަށް އެންމެ ފުރަތަމަ ދަނީ ރަލެވެ. ރޭގަނޑު ނިދެނީ ރަލުގެ މަސްތުގައި ވާނުވާ ނޭނގި އޮއްވައެވެ.

މަސްތުކަން ކިރިޔާ ފިލާ ގަޑިއެއް އަޔަސް މީހުނާ ރީތިކޮށް ލޯބިން ވާހަކަ ދެއްކުމާއި، މީހުނަށް އަޅާލުމާއި، ތިމާގެ އާއިލާއާއި ދަރިފުޅުގެ ކަންކަމަށް ޚަރަދުކުރުމަށް ފައިސާ ހޯދުމަށް މަސައްކަތް ކުރުމަކީ އާދައެކެވެ. މިފަދަ ވަގުތުތަކުގައި ތިމާގެ ކިބައިވާ ނުބައި އާދަ ދޫކޮށް ރަގަޅު މީހަކަށް އެހީތެރިވުމަށް ގާތްމީހުންގެ ކާރިން އެދެއެވެ. ނަމަވެސް ގިނަ މީހުންގެ ވިސްނުން ހުންނަގޮތުން މިކަމަށް މީހެއްގެ އެހީތެރިކަން ނުލިބި ދުވަސްތައް ހޭދަވަމުން ދިޔައެވެ.

ރަލުގެ މަސްތުގައި ހުންނަ އިރު ވާނުވާ ނޭނގި ތިމާގެ ލޯބިވާ މަންމައަށް ވެސް ބަދުބަސް ބުނެވެން ފެށިއެވެ. އަދި ފަހުން ވިސްނާލުމުން ލަދުވެތިކަމުގައި އަމިއްލަ ނަފްސާ ކުރިމަތިލާން ނުކެރޭވަރުގެ މުޑުދާރު އެތައް ކަމެއް ކުރެވެން ފެށިއެވެ. މިފަދަ ހާލުގައި ހުއްޓާ އަޅުގަނޑުގެ ރައްޓެއްސަކާ މީނާއާއި ދިމާވެ ދެކެވުނު ވާހަކައިގައި އޭނާ ކިޔާދިނެވެ. ހުކުރު ނަމާދަކަށް ނުދާތާ 8 އަހަރު ވެއްޖެއެވެ. އެއްވެސް ނަމާދެއް ނުކުރާތާ 3 އަހަރު ވެއްޖެއެވެ. ނަމަވެސް އާއިލާ ވަކިވެގެން ދިއުމުން ކުރާ ހިތާމައިގައި މަސްތުވެގެން އިނދެވެސް އަތްނަގާ ދުޢާ ކުރަނީ ﷲގެ ހަޟްރަތުންނެވެ. އޭނާގެ އާއިލާ އަނބުރާ އޭނާއަށް ދެއްވާތޯއެވެ.

މިއިން އެނގުނު އެއްޗަކީ ދީނުގައި ފަރުޟު ކުރެއްވި އެއްވެސް ކަމެއް ނުކޮށް، މުންކަރާތްތަކަށް އަރައިގަންނަމުން ދާ މީހާގެ ހިތުގައި ﷲ ވާކަމާއި، ތިމާގެ ކޮންޓްރޯލްގެ ދަށުގައިވާ ކަންކަމަށް މަދަދަށް އެދެންވާނީ އަދި މަދަދު ދެއްވާނީ ﷲ ކަން ގަބޫލުކުރާ ކަމެވެ. ނަމަވެސް ނޭނގި އޮތްކަމަކީ ﷲ ޙަރާމްކުރެއްވި ކަމެއްކޮށް މަސްތުވެފައި އިނދެގެން ދުޢާ ކުރުމަށްވުރެ ތިމާގެ ނަފްސު ޠާހިރުކޮށް ހިނައިގަނެ ވުޟޫކޮށްގެން ނަމާދުކޮށް ދުޢާ ކުރުމުން އެކަން އިޖާބަކުރައްވާނެކަމެވެ.

މިއީ ވަރަށް ހިތާމަވެރިކަމެކެވެ. އިސްލާމް ދީނަކީ ލުއިފަސޭހަ ދީނެއް ކަމާ އެހެންކަމުން ދީނުގެ ކަންކަމުގައި އެމީހާކު ބޭނުންގޮތަކަށް ކަންކަން ކުރެވޭނެކަމަށް ގަބޫލުކުރާ ދިވެހިން، ކަންބޮޑުވާހާ ގިނައިން އުޅެއެވެ. މިމީހުނަށް ބޭނުންވަނީ އާއިލާއާއި ގާތް މީހުންގެ އަޅާލުމާއި، ދީނަށް އެނބުރި އައުމަށް ނަސޭހަތްތެރިވާނޭ ބައެކެވެ. މިހެން މަގު ގެއްލިގެންދާ މީހަކީ ވެސް މީހެއްގެ ދަރިއެއް، ފިރިއެއް، ބައްޕައެއް ނުވަތަ ބޭބެއެކެވެ. ތިމާ ގަދަ އަޅާ ސުވަރުގެ ހޯދަން މަސައްކަތް ކުރާއިރު ތިމާގެ އާއިލާގެ މެމްބަރު މިހެން ދުނިޔެއާއި އާޚިރަތް ގެއްލޭގޮތަށް ޢަމަލުތައް ބަހައްޓަން ދޫކޮށްނުލާށެވެ. ބައެއް ފަހަރަށް މިމީހުނަށް ބޭނުންވަނީ އެމީހުންގެ ވާހަކަ އަޑު އަހާނޭ މީހެކެވެ. ލޯބިން މަގުދައްކާނޭ މީހެކެވެ. ތިމާގެ މަސައްކަތުން މީހަކަށް ހެޔޮ ކަމަކަށް މަގުދެއްކިއްޖެ ނަމަ ހަމަ އެވަރުގެ ހެޔޮކަމެއް ތިމާއަށް ވެސް ހުއްޓެވެ.