މޯލްޑިވްސް ޕޯޓް ލިމިޓެޑް (އެމްޕީއެލް)ގެ މުވައްޒަފުން ތަމްރީނު ދިނުމާއި ގުޅޭ ގޮތުން މެލޭޝިއާގެ ޖޮހޯރ ޕޯޓް ބާރހަޑްއާއެކު އެ ކުންފުނިން ފަހުމުނާމާއެއްގައި ސޮއިކޮށްފިއެވެ.
ޖޮހޯރ ޕޯޓްގައި އޮތް ރަސްމިއްޔާތުގައި އެ ކުންފުނީގެ ފަރާތުން ފަހުމުނާމާގައި ސޮއިކުރެއްވީ ޑެޕިއުޓީ ސީ.އީ.އޯ އަލީ ހާޝިމް އެވެ. އަދި ޖޮހޯރ ޕޯޓްގެ ފަރާތުން ސޮއިކުރެއްވީ ސީ.އީ.އޯ މުހައްމަދު ޑެރިކް ބަޝީރު އެވެ.
މި ފަހުމުނާމާގެ ދަށުން އެމްޕީއެލްގެ މުވައްޒަފުންނަށް ކުރު މުއްދަތުގެ ތަމްރީނުތައް ޖޮހޯރ ޕޯޓް އިން ކުރިއަށް ގެންދާނެ އެވެ.
މީގެއިތުރުން، އެމްޕީއެލްގެ މުވައްޒަފުންނަށް ޖޮހޯރ ޕޯޓްގައި ކުރު މުއްދަތަކަށް މަސައްކަތްކޮށް، ތަޖުރިބާ ހޯދުމުގެ ފުރުސަތުވެސް ލިބިގެންދާނެ ކަމަށް އެ ކުންފުނިން ބުނެއެވެ.